AKP បាត់ដំបង ថ្ងៃទី១៨ ខែឧសភា ឆ្នាំ២០២៦—ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្ដរជាតិ និងឯកឧត្តម អ៊ូអិណុ អាត់ស៊ុស៊ិ (UENO Atsushi)ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា ដែលពិធីនេះធ្វើឡើងនៅថ្ងៃទី១៨ ខែឧសភា ឆ្នាំ ២០២៦ បានអញ្ជើញចូលរួមក្នុងពិធីផ្ទេរ-ប្រគល់សមិទ្ធផលគម្រោងសមាហរណកម្មការបោសសម្អាតមីននិងសង្គ្រោះជនពិការដោយសារមីនដំណាក់ កាលទី២និងការបើកគម្រោងថ្មីដំណាក់កាលទី៣គាំទ្រហិរញ្ញប្បទានដោយរដ្ឋាភិបាលជប៉ុន នៅមណ្ឌលអភិវឌ្ឍន៍មរតកតេជោ ស្ថិតនៅក្នុងស្រុកគាស់ក្រឡ ខេត្តបាត់ដំបង។

តាមរយៈរបាយការណ៍ស្វាគមន៍ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង បានគូសបញ្ជាក់ថា អង្គភាពស៊ីម៉ាក់ និងប្រតិបត្តិករដោះមីន ដទៃទៀត បានដើរតួនាទីយ៉ាងសំខាន់ក្នុងបេសកកម្មបោសសម្អាតមីន និងគ្រាប់មិនទាន់ផ្ទុះ ជាពិសេស ក្នុងភូមិសាស្ត្រទឹកដីនៃខេត្តបាត់ដំបងរួម ជាមួយ នឹងដៃគូអភិវឌ្ឍន៍ដទៃទៀតបានជួយបោសសម្អាតមីន និងធ្វើការអភិវឌ្ឍយ៉ាងសកម្មបំផុតតាមបណ្តាស្រុកមួយចំនួនដូចជា៖ស្រុករតនមណ្ឌល ស្រុកបវេល ស្រុកបាណន់ ស្រុកសំឡូត ស្រុកគាស់ក្រឡ ស្រុកមោងឫស្សី និងស្រុករុក្ខគិរីជាដើម ដែលទទួលការគម្រាមកំហែងដោយសារគ្រាប់មីន និងគ្រាប់មិនទាន់ផ្ទុះ បានធ្វើការប្រែមុខមាត់ថ្មីដល់ជីវភាពរស់នៅរបស់ប្រជាពលរដ្ឋកាន់តែល្អប្រសើរទ្វេឡើងក្នុងការសាងសង់លំនៅដ្ឋាន និងការពង្រីកដីសម្រាប់ធ្វើកសិកម្ម ការ ស្តារឡើងវិញនូវហេដ្ឋារចនាសម្ព័ន្ធសាធារណៈ ដូចជាការកសាងសាលារៀន ផ្លូវថ្នល់ ជីកស្រះ អណ្តូងទឹក និងប្រព័ន្ធប្រឡាយទឹកជាដើម ដែលសមិទ្ធផល ទាំងអស់នេះជាមោទនភាពយ៉ាងខ្លាំងសម្រាប់ប្រជាពលរដ្ឋខេត្តបាត់ដំបង។

ក្នុងនាមប្រជាពលរដ្ឋ និងអាជ្ញាធរមានសមត្ថកិច្ចគ្រប់លំដាប់ថ្នាក់នៅក្នុងខេត្តបាត់ដំបងទាំងមូល ឯកឧត្តម សុខ លូ បានសម្ដែងការកោតសសើរដល់វីរភាព ដ៏អង់អាចក្លាហាន និងកិច្ចខិតខំប្រឹងប្រែងរបស់អ្នកឯកទេសបោសសម្អាតមីន ថ្នាក់ដឹកនាំអង្គភាពស៊ីម៉ាក់និងដៃគូអភិវឌ្ឍន៍ទាំងអស់ជាពិសេស រាជរដ្ឋាភិបា លដែលមានឆន្ទៈមោះមុតក្រោមការដឹកនាំដ៏ភ្លឺស្វាងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឱ្យអត្រា គ្រោះថ្នាក់ដោយសារគ្រាប់មីន និងយុទ្ធភណ្ឌមិនទាន់ផ្ទុះក្នុងខេត្តបាត់ដំបងមានការធ្លាក់ចុះគួរឱ្យកត់សម្គាល់ និងមានការអភិវឌ្ឍន៍លើគ្រប់វិស័យ ជាពិសេ សការអភិវឌ្ឍនៅតាមទីជនបទនៅតំបន់ដែលបានបោសសម្អាតមីនរួច។

ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា ស៊ីម៉ាក់ ថ្លែងឱ្យដឹងថា ក្នុងរយៈ ពេលជាង៣៤ឆ្នាំកម្លងមកនេះ ដោយគិតត្រឹមខែមីនា ឆ្នាំ២០២៦នេះ អង្គភាពស៊ីម៉ាក់ បានធ្វើការបោសសម្អាតផ្ទៃដីសរុប២១៣.៦៧៧ហិកតា និងរំដោះតំប ន់សង្ស័យបានជាង១២០  ០០០ហិកតា រុករកឃើញកម្ទេចចោលគ្រាប់មីននិងគ្រាប់មិនទាន់ផ្ទុះគ្រប់ប្រភេទជាង៣,២លានគ្រាប់។លទ្ធផលខាងលើនេះផ្ដល់ផលប្រយោជន៍ជូនប្រជាពលរដ្ឋដោយផ្ទាល់ និងដោយប្រយោលចំនួនជាង២លានគ្រួសារ។លទ្ធផលនេះមានចំនួនប្រមាណ៧១% នៃសមិទ្ធផលសរុបនៃប្រតិបត្តិករទាំងអស់ក្នុងក្របខ័ណ្ឌទូទាំងប្រទេស។

ឯកឧត្តម ប្រាក់ សុខុន មានប្រសាសន៍ថា ជប៉ុនបានជួយគាំទ្រសកម្មភាពមីនតាំងពីដើមទសវត្សរ៍៩០មកម្ល៉េះ ផ្សារភ្ជាប់ការបោសសម្អាតមីនជាមួយនឹង ការអភិវឌ្ឍសហគមន៍តាមរយៈនៃការកសាងផ្លូវ ប្រើប្រាស់ដីដែល បោសសម្អាតរួចសម្រាប់ប្រយោជន៍សហគមន៍ និងលើកកម្ពស់ជីវភាពរស់នៅរបស់អ្នកភូមិ។ជាមួយនឹងការសម្ពោធសមិទ្ធផលនានា ដែលសម្រេចក្នុងដំណាក់កាលទី២នៃគម្រោងសមាហរណកម្មការបោសសម្អាតមីន និងសង្គ្រោះ ជនពិការដោយ សារមីននេះយើងក៏ចាប់ផ្តើមប្រតិបត្តិការដំណាក់កាលទី៣នៃគម្រោងនេះដែរដែលជាគម្រោងគ្របដណ្តប់ខេត្តចំនួន៣ជាប់ ព្រំដែនគឺខេត្ត៖ បាត់ដំបង ពោធិ៍សាត់ និងកោះកុង ។ ចាប់តាំងពីដើមទសវត្សរ៍៩០មក ជប៉ុនបានផ្ដល់ជំនួយសម្រាប់ការបោសសម្អាតមីនសរុបជាង ២០០លាន ដុល្លារអាម៉េរិក​ដែលជាជំនួយសម្រាប់សកម្មភាពមីនច្រើនជាងគេសម្រាប់កម្ពុជា។ជាមួយគ្នានេះ ជប៉ុន និងកម្ពុជាក៏កំពុង សហការគ្នាក្នុងគំនិតផ្ដួចផ្ដើម​សកម្មភាព​មីននៅក្នុងប្រទេសទី៣។តាមរយៈគម្រោងនេះកម្ពុជាបានជួយបណ្ដុះបណ្តាលអ្នកបោសសម្អាតមីនអ៊ុយក្រែនបានចំនួន០៣លើកដែលនេះគឺជាសកម្មភាពមនុស្សធម៌សុទ្ធសាធដូចគ្នានឹងសកម្មភាពរបស់កងដោះមីនកម្ពុជាក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ នៅប្រទេសស៊ូដង់ ម៉ាលី លីបង់ សាធារណរដ្ឋ​អាហ្វ្រិក​កណ្ដាល និងប្រទេសស៊ិប។

តាងនាមសម្តេចមហាបវរធិបតីនាយករដ្ឋមន្តី រាជរដ្ឋាភិបាល និងប្រជាជនកម្ពុជាទាំងមូល ឯកឧត្តម ប្រាក់ សុខុន បានថ្លែង អំណរគុណយ៉ាង​ជ្រាល​ជ្រៅបំ​ផុត​ចំពោះរដ្ឋាភិបាលជប៉ុន ក៏ដូចជាដៃគូផ្តល់ជំនួយផ្សេងៗទៀត មានចិន អាម៉េរិក អូស្ត្រាលី ប៊ែលហ្ស៊ិក កាណាដា សហគមន៍អឺរ៉ុប អាល្លឺម៉ង់ ន័រវេស្ស ស៊ុយអែត អង់គ្លេស និងអង្គការជាដៃគូនានា ដែលបានជួយ គាំទ្រដល់សកម្មភាពបោសសម្អាតមីនក្នុងប្រទេសកម្ពុជា។

ឯកឧត្តម សង្ឃឹមយ៉ាងមុតមាំទៅលើស្មារតីសហប្រតិបត្តិការ ពីបណ្ដាប្រទេសជាដៃគូទាំងអស់ក្នុងការបន្តគាំទ្រដល់សកម្មភាពបោសសម្អាតមីន និងយុទ្ធភ​ណ្ឌ​មិន​ទាន់ផ្ទុះដើម្បីឱ្យកម្ពុជាសម្រេចបាននូវគោលដៅគ្មានផលប៉ះពាល់ដោយសារមីននៅឆ្នាំ២០៣០ខាងមុខនេះ ៕

ដោយ៖ ណយ នឿន (ប្រភព៖ដ្ឋបាលខេត្តបាត់ដំបត)