AKPកំពង់ធំថ្ងៃទី១៨ខែឧសភា ឆ្នាំ២០២៦--នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤នាព្រឹកថ្ងៃទី១៨ខែឧសភាឆ្នាំ២០២៦បានផ្សព្វផ្សាយប្រសាសន៍សំខាន់ៗ របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាដែលបានថ្លែងក្នុងពិធីខួបលើកទី១៩ ទិវាអតីតយុទ្ធជន និងនិវត្តជនកម្ពុជាថ្ងៃទី១២ ឧសភា ២០២៦នៅភ្នំពេញកាលពីថ្ងៃទី ១៥ ខែឧសភា ឆ្នាំ ២០២៦ ស្ដីពីវិធានការពង្រឹងប្រៀបការពារជាតិ និងការកំណែទម្រង់កងយោធពលខេមរភូមិន្ទ ដើម្បីឱ្យមានប្រសិទ្ធភាពក្នុងភារកិច្ចការពារបូរណភាពទឹកដី និងការដឹកនាំបញ្ជាព្រមទាំងការធានាផ្សេងៗ បម្រើឱ្យជីវភាពរស់នៅ និង​សុខុមាលភាពរបស់កងយោធពលខេមរភូមិន្ទ ក្រោមអធិប តីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ។

ឧត្តមសេនីយ៍ទោ សោម ស៊ុន បានផ្សព្វ ផ្សាយពីសភាពការណ៍វិវត្តន៍ថ្មីៗ នៅ​តាមខ្សែបន្ទាត់ព្រំដែនកម្ពុជា ថៃ និងការខិតខំប្រឹងប្រែងរបស់រាជរដ្ឋាភិបាល ក្នុងការដោះស្រាយបញ្ហាព្រំដែន តាមយន្តការដែលមានស្រាប់​ ដោយសន្តិវិធី តាមច្បាប់អន្តរជាតិ និងកិច្ចព្រមព្រៀងនានាដែលមានជាធរមាន​។ ជាមួយនោះដែរ សម្ដេចមហាបវរធិបតី ហ៊ុន ម៉ាណែត ក៏បានថ្លែងអំណរគុណដល់ថ្នាក់ដឹក នាំក្រសួងស្ថាប័ន​នានា​របស់រាជរដ្ឋា ភិបាល និងអាជ្ញាធរដែនដី នៅ​គ្រប់​លំដាប់​ថ្នាក់​ ដែលបានខិតខំសម្រប សម្រួល ដោះស្រាយ បញ្ហាជីវភាព ការស្នាក់នៅ​ និង​ការបម្រេីសុខុមាលភាពជូនបងប្អូនប្រជាពលរដ្ឋភៀសសឹក នៅតាម​ព្រំដែន​កម្ពុជា​ ថៃ​ ដែលរងផលប៉ះពាល់ដោយសង្គ្រាមឈ្លានពានពីពួកទាហានសៀម ហើយរាជរដ្ឋាភិបាលកម្ពុជា មិនទទួលស្គាល់ការកំណត់ខ្សែបន្ទាត់ព្រំដែនដោយការប្រើប្រាស់កម្លាំងយោធាជាដាច់ ខាត ។

ឧត្តមសេនីយ៍ទោ សោម ស៊ុន ក៏​បានផ្សព្វផ្សាយអនុសាសន៍សំខាន់ៗ របស់សម្ដេចមហាបវរធិបតី ហ៊ុន ម៉ាណែត ក្នុងការកសាងប្រៀបការពារជាតិ ការ​អនុវត្តន៍​ច្បាប់​កាតព្វកិច្ច​យោធា​ ការធ្វើកំណែទម្រង់កងយោពលខេមរភូមិន្ទ ក្នុងនោះ ការអនុវត្តនូវវិធានការបង្រួមក្បាល ពង្រីកដងខ្លួន ធ្វើយ៉ាងណាឱ្យកងយោធពលខេមរភូមិន្ទ មានកម្លាំងគ្រប់គ្រាន់ក្នុងភារកិច្ចការពារបូរណភាព ទឹកដី នៃ​ព្រះ​រាជាណាចក្រ​កម្ពុជា​ ហើយ​នៅក្នុងឱកាសនោះផងដែរ​ សម្ដេចធិបតី ក៏បានបញ្ជាក់​អំពីការរៀបចំកែទម្រង់ការដឹកនាំបញ្ជា និងកិច្ចការធានាលេីគ្រប់វិស័យក្នុង​ការ​ដោះស្រាយជីវភាពកងទ័ព​ដោយ​ស្នើ​សុំ​ឱ្យក្រសួង​ការ​ពារ​ជាតិ​ និង​ក្រសួង​សេដ្ឋកិច្ចនិងហិរញ្ញវត្ថុសិក្សាឡើងវិញការរៀបចំបើកប្រាក់បៀវត្សជូនយោធិនតាមប្រព័ន្ធធនាគារ ។ ការរៀបចំវិស័យសុខាភិបាល ដែលត្រូវពង្រឹងបន្ថែមសមត្ថភាពវេជ្ជបណ្ឌិតក្រុមគ្រូពេទ្យ និងជំរុញដល់ស្ថាប័នពាក់ព័ន្ធក្នុងការផ្តល់ថ្នាំពេទ្យ​ ឧបករណ៍បរិក្ខាពេទ្យ គ្រប់​គ្រាន់​ ដើម្បីតាមមន្ទីរពេទ្យ និង​គិលានដ្ឋាននានារបស់កងទ័ព អាចព្យាបាលកងទ័ព និងប្រជាពលរដ្ឋដែលរស់នៅជុំវិញទីតាំងបោះទ័ពបាន ទៀត​ផង​។

នាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានប្រកាសគាំទ្រពេញទំហឹងនូវអនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការពង្រឹងធនធានមនុស្ស ការកំណែទម្រង់រចនាសម្ព័ន្ធចាត់តាំង ដើម្បីពង្រឹងប្រៀបការពារជាតិរបស់យើងឱ្យបាន​រឹងមាំ​ និងប្ដេជ្ញាចិត្តអនុវត្តតាមអនុសាសន៍របស់សម្តេចឱ្យទទួលបានជោគជ័យ និងមានប្រសិទ្ធភាពខ្ពស់៕

ដោយ៖ ស៊ុម វណ្ណា