AKP ភ្នំពេញ ថ្ងៃទី១៨ ខែឧសភា ឆ្នាំ២០២៦ -- ប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមានអ៊ីរ៉ង់អំពីការវាយប្រហារដ៏ខ្លាំងក្លាបន្ថែមទៀត ប្រសិនបើអ៊ីរ៉ង់បដិសេធមិនធ្វើកិច្ចព្រមព្រៀងណាមួយ។

លោក ត្រាំ បានប្រាប់គេហទំព័រសារព័ត៌មាន Axios ថា «យើងចង់ធ្វើកិច្ចព្រមព្រៀង។ ពួកគេមិនមែននៅកន្លែងដែលយើងចង់ឱ្យពួកគេនៅនោះទេ។ ពួកគេនឹងត្រូវសម្រេចកិច្ចការនោះ ឬពួកគេនឹងរងការវាយប្រហារយ៉ាងធ្ងន់ធ្ងរ បើពួកគេមិនចង់បានរឿងនោះទេ» ដោយលោកបានបន្ថែមថាអ៊ីរ៉ង់នឹងត្រូវវាយប្រហារ «ខ្លាំងជាងមុន» ប្រសិនបើទីក្រុងតេអេរ៉ង់មិនមកជាមួយនឹងសំណើល្អជាងនេះ។

យោងតាមសារព័ត៌មាន ​​Axios បានឱ្យដឹងថា មេដឹកនាំអាម៉េរិករូបនេះមានគម្រោងធ្វើកិច្ចប្រជុំជាមួយមន្ត្រីសន្តិសុខកំពូលរបស់លោកនៅថ្ងៃទី១៩ ខែឧសភា ឆ្នាំ២០២៦ ដើម្បីពិភាក្សាអំពីជម្រើសយោធាបន្ថែមទៀតប្រឆាំងនឹងអ៊ីរ៉ង់។ វាក៏បាននិយាយផងដែរដោយត្រូវបានដកស្រង់ប្រភពព័ត៌មានថា នៅថ្ងៃទី១៦ ខែឧសភា លោក ត្រាំ បានជួបជាមួយអនុប្រធានាធិបតីអាម៉េរិក លោក ជេឌី វែនស៍ (JD Vance) បេសកជនពិសេសរបស់លោក ស្ទីវ វីតកូហ្វ (Steve Witkoff) រដ្ឋមន្ត្រីការបរទេស លោក ម៉ាកូ រូប៊ីអូ (Marco Rubio) និងប្រធានទីភ្នាក់ងារ CIA លោក ចន រ៉តគ្លីហ្វល (John Ratcliffe) ដើម្បីពិភាក្សាអំពីបញ្ហាអ៊ីរ៉ង់។

កាលពីព្រឹកថ្ងៃអាទិត្យ ប្រធានាធិបតីអាម៉េរិកបានជំរុញឱ្យអ៊ីរ៉ង់ធ្វើសកម្មភាពលឿនជាងមុន ដើម្បីឆ្ពោះទៅរកកិច្ចព្រមព្រៀងដែលអាចកើតមាន។

លោកបានសរសេរនៅលើបណ្តាញសង្គម Truth Social ថា «សម្រាប់អ៊ីរ៉ង់ ពេលវេលាកំពុងដើរថយក្រោយ ហើយពួកគេគួរតែអនុវត្តឱ្យលឿន បើមិនដូច្នោះទេ នឹងគ្មានអ្វីនៅសល់ពីពួកគេឡើយ។ ពេលវេលា គឺជារឿងសំខាន់»៕

ដោយ៖ យា ចិន្ដាខន្ដី (ប្រភព៖ តាសស៍)