AKP កំពង់ធំ ថ្ងៃទី១៧ ខែឧសភា ឆ្នាំ២០២៦--

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានប្រចាំការនិងជាប្រធានលេខាធិការដ្ឋានសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំនាព្រឹកថ្ងៃទី១៧ ខែឧសភា ឆ្នាំ២០២៦នេះបានអញ្ជើញជាអធិបតីភាព ក្នុងពិធីបញ្ចុះបឋមសីលាសាងសង់សាលប្រជុំបើកចំហរ១ខ្នង មានទំហំ ៣៦០ការ៉េដែលជាអំណោយរបស់ឯកឧត្តម នួន ផារ័ត្ន អភិបាលខេត្ត ប្រធានគណៈកម្មាធិការសមាគមអតីតយុទ្ធជននិងនិវត្តជនកម្ពុជា ខេត្តកំពង់ធំ ជូនដល់បងប្អូនអតីតយុទ្ធជន សម្រាប់ប្រើប្រាស់ជាប្រយោជន៍រួម នៅក្នុងមណ្ឌលអភិវឌ្ឍន៍អតីតយុទ្ធជនមរតកតេជោធិបតីថ្លុកព្រីង ស្ថិតនៅក្នុងឃុំក្រយា ស្រុកសន្ទុក ខេត្តកំពង់ធំ ដោយមានការអញ្ជើញចូលរួមពីនាយទាហាន នាយទាហានរងនិងពលទាហាន នៃបញ្ជាការដ្ឋានតំបន់ប្រតិបត្តិការសឹករកកំពង់ធំ និងបងប្អូនអតីតយុទ្ធជនយ៉ាងច្រើនកុះករ។

លោកវរសេនីយ៍ទោ ទិត ចាន់ នាយសេនាធិការរង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ទទួលបន្ទុកគ្រប់គ្រងមណ្ឌលអភិវឌ្ឍន៍អតីតយុទ្ធជន មរតកតេជោធិបតីថ្លុកព្រីងនិងជាប្រធានដឹកនាំការសាងសង់សាលប្រជុំនេះបានបញ្ជាក់ថា គម្រោងសាងសង់សាលប្រជុំថ្មីនេះ មានតម្លៃជាង១ម៉ឺនដុល្លារសហរដ្ឋអាមេរិកដែលជាតម្រូវការចាំបាច់របស់បងប្អូនអតីតយុទ្ធជន ក្នុងការប្រើប្រាស់ជាប្រយោជន៍រូម ក្នុងជីវភាពប្រចាំថ្ងៃ ហើយការសាងសង់និងដំណើរការចាប់ពីពេលនេះតទៅ ឱ្យបានរួចរាល់ក្នុងរយៈពេលមួយខែទៀតខាងមុខនេះ ។

ឧត្តមសេនីយ៍ទោ សោម ស៊ុន បានថ្លែងនូវការគោរព អរគុណយ៉ាងជ្រាលជ្រៅជាទីបំផុត ចំពោះឯកឧត្តម នួន ផារ័ត្ន និងលោកជំទាវ ដែលបានឧបត្ថម្ភថវិកាចំនួន១ម៉ឺនដុល្លារក្នុងការសាងសង់ សាលប្រជុំបើកចំហរសម្រាប់បងប្អូនអតីតយុទ្ធជនបានប្រើប្រាស់ក្នុងការជួបជុំប្រារព្ធពិធីផ្សេងៗ បម្រើឱ្យសង្គមនិងការជួបជុំក្នុងពិធីបុណ្យនានា ក្នុងវិស័យព្រះពុទ្ធសាសនាផងដែរ។ ហើយ​កន្លង​ទៅ​នេះ​ ឯកឧត្តម នួន ផារ័ត្ន ក៍បានផ្ដល់អំពូលសូឡា ចំនួន ៧៥ដើម ដាក់បំភ្លឺតាមដងផ្លូវក្នុងមណ្ឌលអភិវឌ្ឍន៍អតីតយុទ្ធជន មរតកតេជោធិបតីថ្លុកព្រីងរួចមកហើយ។ជាមួយ​នេះ​ដែរ​ឧត្ដមសេនីយ៍​សោម​ ស៊ុនក៍បាន​ថ្លែងអំណរគុណដល់បងប្អូនអតីតយុទ្ធជន ដែលបានចូលរួមចំណែកជាថវិកាបន្ថែមក្នុងការសាងសង់សាលប្រជុំនេះផងដែរ។

ឧត្តមសេនីយ៍ទោ សោម ស៊ុន បានណែនាំ ដល់ក្រុមការងារ និងក្រុមជាងសំណង់ទាំងអស់ ដែលមានភារកិច្ចសាងសង់សាលប្រជុំនេះត្រូវយកចិត្តទុកដាក់បំពេញភារកិច្ចប្រកបដោយស្មារតីទទួលខុសត្រូវខ្ពស់។ត្រូវធ្វើការសាងសង់ប្រកបដោយគុណភាព និងសោភ័ណភាព សម្រាប់ប្រើប្រាស់បានយូរអង្វែងតទៅនិងបានសំណូមពរដល់បងប្អូនអតីតយុទ្ធជន ដែលមានកម្លាំងពលំមាំមួន ត្រូវជួយគ្នាជាកម្លាំងពលកម្មក្នុងការ

សាងសង់  ជៀសវាងការចំណាយថវិកាក្នុងតម្លៃពលកម្មថ្លៃ​ដែលនាំឱ្យប៉ះពាល់ដល់គម្រោងថវិកាដែលត្រូវសាងសង់៕ដោយ ស៊ុម វណ្ណា