AKP កំពង់ធំ ថ្ងៃទី១៧ ខែឧសភាឆ្នាំ២០២៦ --

ឯកឧត្តម វង្សី វិស្សុត សមាជិកគណៈអចិន្ត្រៃយ៍នៃ​គណៈកម្មាធិការកណ្ដាលគណបក្សប្រជាជនកម្ពុជានិងជាប្រធានក្រុមការងារគណបក្សចុះមូលដ្ឋានខេត្តកំពង់ធំកាលពីថ្ងៃទី១៦ ខែឧសភា ឆ្នាំ២០២៦បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ​អគារទី​​ស្នាក់ការគណបក្សប្រជាជនកម្ពុជាស្រុកស្ទោង​ស្ថិតនៅភូមិទទា ឃុំទ្រា ស្រុកស្ទោង ខេត្តកំពង់ធំ ដែលមានរចនាបថនិងក្បូរក្បាច់រចនាតាមបែបប្រពៃណីខ្មែរយ៉ាងប្រណីត។ អគារនេះ ចែកចេញជា៣បន្ទប់ ក្នុងនោះមាន សាលប្រជុំធំ១ ដែលអាចទទួលអ្នកចូលរួមបានប្រមាណជាង១០០០នាក់,បន្ទប់ទទួលភ្ញៀវ​ចំនួន១បន្ទប់ និងបន្ទប់​សម្រាប់មន្ត្រីគណ​បក្ស​បម្រើការងារប្រចាំថ្ងៃ​ ព្រមទាំងបំពាក់គ្រឿងបរិក្ខារទំនើប ជាមួយនឹងការរៀបចំដាំដើមឈើ និងសួនលម្អផងដែរ។

ឯកឧត្តម វង្សី វិស្សុត បានកោតសរសើរនិង​វាយតម្លៃខ្ពស់​​​ចំពោះ​ឯកឧត្តម ថោ ជេដ្ឋា ប្រធានក្រុមការងារគណបក្សចុះមូលដ្ឋានស្រុកស្ទោង ដែលបានខិតខំចលនាប្រមែប្រមូលធនធាន ក្នុងការសាងសង់អគារទី​ស្នាក់ការគណបក្ស​ប្រជាជន​កម្ពុជា​ស្រុក​ស្ទោងដ៏ល្អស្អាត និងធំទូលាយ ដែលនេះជាសមិទ្ធផលគួរជាទីមោទនៈថ្មីមួយទៀត សម្រាប់ជាហេដ្ឋារចនាសម្ព័ន្ធចាំបាច់ ​បម្រើឱ្យការបំពេញមុខងារនិងបេសកកម្មរបស់​គណបក្ស ក៏ដូចជា​បម្រើដល់សេចក្ដីត្រូវការផ្សេងៗរបស់​បងប្អូន​ប្រជាពលរដ្ឋ​នៅ​មូលដ្ឋាន ស្របតាមការដ្ឋាន​ជាយុទ្ធសាស្ត្រ​របស់​ក្រុមការងារគណបក្សចុះមូលដ្ឋានខេត្តកំពង់ធំ ពិសេសគឺមានទីស្នាក់ការគណបក្សនៅគ្រប់កន្លែង ទាំងខេត្ត និងគ្រប់ស្រុក ក្រុង ឃុំ សង្កាត់ ទាំងអស់ក្នុងខេត្តកំពង់ធំ ចាប់ពីឆ្នាំ២០២៧ទៅ។ ឯកឧត្ដមក៏បានផ្ដល់នូវមូលវិចារខ្ពស់ចំពោះក្រុមការងារ ដែល​សម្រេចបាននូវសមិទ្ធផលជាច្រើន រួមទាំងការអភិវឌ្ឍវិស័យធារាសាស្ត្រនៅក្នុងខេត្តកំពង់ធំ​ទាំងមូល ដែលបានរួមចំណែកដល់ការអភិវឌ្ឍមូលដ្ឋាន ក្នុងគោលដៅបន្តដណ្តើមការគាំទ្រពីប្រជាជននិងជាក្តីសង្ឃឹមរបស់គណបក្ស​សម្រាប់ការបោះឆ្នោតឆ្នាំ២០២៧ និងឆ្នាំ២០២៨ខាងមុខនេះ។

ឯកឧត្ដម វង្សី វិស្សុត ក៏បាននាំមកជាមួយនូវការសាកសួរសុខទុក្ខ ​ពីសំណាក់​សម្តេចអគ្គមហាសេនាបតី​តេជោ​ ហ៊ុន សែន និងសម្តេចមហាបវរធិបតី ហ៊ុន ម៉ាណែត ជូនចំពោះថ្នាក់ដឹកនាំ មន្ត្រីគណបក្សគ្រប់ថ្នាក់ ព្រមទាំងសមាជិក សមាជិកាគណបក្សទាំងអស់ ដែលបានខិតខំបំពេញការងារកន្លងមក បម្រើឱ្យបុព្វហេតុជាតិនិងគណបក្ស ក៏ដូចជាបម្រើឱ្យប្រជាជនស្រុកស្ទោងទាំងមូលនិងសូមអរគុណចំពោះប្រជាពលរដ្ឋស្រុកស្ទោង ដែលបានបោះឆ្នោតជូនគណបក្សប្រជាជនកម្ពុជា ក្នុងអាណត្តិកន្លងមក ទាំងការបោះឆ្នោតជ្រើសរើសក្រុមប្រឹក្សាឃុំ សង្កាត់ និងការបោះឆ្នោតជ្រើសតាំងតំណាងរាស្ត្រ។

ឯកឧត្តម វង្សី វិស្សុត បានមានប្រសាសន៍ថា ក្នុងរយៈពេលជាងពីរឆ្នាំកន្លងមកនេះ ខេត្តកំពង់ធំ កំពុងស្ថិតក្នុងចលនការវិជ្ជមាន ស្របតាមការដ្ឋានយុទ្ធសាស្រ្តទាំង៣ ដែលបានដាក់ចេញ ហើយសមិទ្ធផលនិងលទ្ធផលការងារជាច្រើនបានលេចឡើងជាបណ្តើរៗ ទាំងក្នុងក្របខណ្ឌការងារ​កសាងនិងពង្រឹងគណបក្ស ទាំងក្នុងក្របខណ្ឌការងារអភិវឌ្ឍមូលដ្ឋានលើគ្រប់វិស័យ និងការលើកកម្ពស់ជីវភាពប្រជាជន ជាពិសេសគម្រោងអភិវឌ្ឍហេដ្ឋារចនាសម្ព័ន្ធចាំបាច់នានា និងគម្រោងវិនិយោគធំៗ ក្នុងវិស័យកសិកម្មនិងកសិ-ឧស្សាហកម្មបានលេចចេញជារូបរាងឡើងជាបន្តបន្ទាប់។

ឯកឧត្តម វង្សី វិស្សុត បានបន្តថា សមិទ្ធផលនិងលទ្ធផលការងារទាំងនេះ បាននិងកំពុងធ្វើឱ្យខេត្តកំពង់ធំមានការប្រែមុខមាត់ថ្មី និងកំពុងប្រែក្លាយសក្តានុពលរបស់ខេត្តកំពង់ធំ ដែលជាខេត្តមានផ្ទៃដីធំជាងគេ នៅចំចំណុចកណ្តាលប្រទេស សម្បូរទៅដោយធនធានទឹក និងមានប្រជាជនជិតមួយលាននាក់ ឱ្យទៅជាមូលដ្ឋានសេដ្ឋកិច្ច និងមូលដ្ឋាននយោបាយ កាន់តែរឹងមាំ និងអាចឈរជើងយូរអង្វែង រួមទាំងជះឥទ្ធិពលទៅដល់​ខេត្តជុំវិញជាច្រើនទៀត ដើម្បីសម្រេចចក្ខុវិស័យរបស់ សម្ដេចតេជោ ហ៊ុន សែន និង សម្តេចធិបតី ហ៊ុន ម៉ាណែត «ប្រែក្លាយខេត្តកំពង់ធំ​ឱ្យទៅជាបង្គោលនិងមូលដ្ឋានគាំទ្រដ៏រឹងមាំរបស់គណបក្សប្រជាជនកម្ពុជា» និង «ប្រែក្លាយខេត្តកំពង់ធំ លែងជាខេត្តមួយដែលទៅហួសមកហួស ទាំងវិស័យទេសចរណ៍ វិនិយោគ ពាណិជ្ជកម្ម និងទាំងគម្រោងអភិវឌ្ឍន៍»។

ឯកឧត្តម វង្សី វិស្សុត បានផ្ដល់ការណែនាំដល់ក្រុមការងារ និងមន្រ្តីគណបក្សគ្រប់រូប ត្រូវបន្តអនុវត្តយ៉ាងសកម្ម បុរេសកម្ម និងការទទួលខុសត្រូវខ្ពស់នូវការដ្ឋានយុទ្ធសាស្ត្រទាំង៣ ដោយត្រូវបន្តយកចិត្តទុកដាក់ដោះស្រាយបញ្ហាសេដ្ឋកិច្ច និងជីវភាពរស់នៅ​ប្រចាំថ្ងៃរបស់ប្រជាជន ប្រាក់ចំណូល ការងារ ការប្រកបអាជីវកម្ម និងមុខរបរផ្សេងៗ ពិសេសជំរុញការធ្វើពិពិធកម្ម​កសិករទំនើប, ការគាំទ្រដល់ការពង្រឹងមូលដ្ឋាន​សេដ្ឋកិច្ច និងការលើកកម្ពស់សមត្ថភាពផលិតកម្ម ព្រមទាំងរៀបចំប្រព័ន្ធ Ecosystem ឱ្យបានល្អ​ តាមរយៈការបន្តការប្រឹងប្រែងកសាងហេដ្ឋារចនាសម្ព័ន្ធរូបវន្តឱ្យបានកាន់តែច្រើននិងមានប្រសិទ្ធភាព ក៏ដូចជាលើកកម្ពស់សមត្ថភាពជំនាញ បច្ចេកទេស សមត្ថភាពផលិតកសាងបណ្ដាញទីផ្សារ និងកសាងការយល់ដឹង និងបណ្ដុះសមត្ថភាពក្នុងការប្រើប្រាស់ឥណទានឱ្យមានប្រសិទ្ធភាពនិងចីរភាព។

ទន្ទឹមនេះត្រូវយកចិត្តទុកដាក់លើការផ្តល់សេវាគ្រប់ប្រភេទ ប្រកបដោយគុណភាព និងប្រសិទ្ធភាព ដូចជា សេវាសន្តិសុខនិងសណ្តាប់ធ្នាប់, សេវាប្រជាពលរដ្ឋ, សេវាសង្គម​ អប់រំ និងសុខាភិបាល, សេវាយុត្តិធម៌,ការដោះស្រាយទំនាស់ក្រៅប្រព័ន្ធតុលាការ, សេវាសុរិយោដី,សេវាធុរកិច្ច ដោយត្រូវជួយសម្របសម្រួល និងគាំទ្រដល់អ្នកធ្វើអាជីវកម្ម និងសហគ្រិន ព្រមទាំងការផ្ដល់ឱកាស ការសិក្សារៀនសូត្រ ការគាំពារសង្គម និងកម្មវិធីជាតិជំនួយសង្គម ជួយដល់គ្រួសារក្រីក្រ គ្រួសារជួបទុក្ខលំបាក និងជនចាស់​ជរាអត់ទីពឹង ព្រមទាំងគ្រួសារយុទ្ធជនពលី និងយុទ្ធជនដែលកំពុងឈរជើងនៅជួរមុខ ដើម្បីធានាថាមិនឱ្យមានអ្នកណាម្នាក់ដាច់បាយហូប ឬអត់អង្ករច្រកឆ្នាំងនោះឡើយ។ បើយើង​ធ្វើកិច្ចការទាំងនេះបានល្អ ផ្ដល់សេវាល្អ ប្រជាជនមានជីវភាពធូរធារ នឹងគ្មានប្រជាជនណាខឹងយើងនោះទេ។

ឯកឧត្តម វង្សី វិស្សុត ក៏បានណែនាំបន្ថែមលើការងារកសាងនិងពង្រឹងគណបក្ស តាមរយៈការពង្រឹងការដឹកនាំនៅគ្រប់ថ្នាក់​ ចាប់ពីភូមិ ឃុំ សង្កាត់ ក្រុង ស្រុក រហូតដល់ខេត្ត ឱ្យបានយល់ដឹងអំពីគណបក្សឱ្យបានច្បាស់លាស់ ស្គាល់គោលដៅ ឈរលើមាគ៌ាតែមួយ និងអនុវត្តតាមការចាត់តាំងឱ្យស្រុះគ្នា,ខិតខំកសាងហេដ្ឋារចនាសម្ព័ន្ធគណបក្ស​ឱ្យបានរឹងមាំ, ពង្រឹង ពង្រីក និងកសាងសមាជិកគណបក្ស ទាំងបរិមាណនិងគុណភាព ស្របតាមគោលការណ៍ 
«សមាជិកគណបក្ស១រូប គឺជាសំឡេងគាំទ្រគណបក្ស១សន្លឹក», រៀបចំប្រព័ន្ធនិងពង្រឹងរបៀបរបបការងារ រួមមាន ​របបចុះមូលដ្ឋាន របបប្រជុំ របបរាយការណ៍ ទន្ទឹម​នឹងការជំរុញការអនុវត្តរបបតាមដាននិងត្រួតពិនិត្យ ព្រមទាំងពង្រឹងសាមគ្គីភាពឯកភាពផ្ទៃក្នុងរឹងមាំងឯកឧត្ដម វង្សី វិស្សុត ក៏បានជំរុញឱ្យមន្ត្រីគណបក្សគ្រប់រូប ពង្រឹងភាពជាម្ចាស់លើបញ្ហា ខិតខំធ្វើអំពើល្អ អំពើត្រឹមត្រូវ និងធ្វើឱ្យដូចភ្លៀងរលឹម ធ្វើឱ្យអស់លទ្ធភាព ដោយភាពស្មោះត្រង់ និងហ៊ានលះបង់ ដើម្បីដណ្តើមបេះដូងរបស់ប្រជាជន ដណ្តើមការស្រឡាញ់ និងការទុកចិត្តពីប្រជាជន។

ទន្ទឹមនេះ ត្រូវគិតអំពីសតិអារម្មណ៍ កង្វល់ និងសេចក្តីត្រូវការរបស់ប្រជាជន ហើយត្រូវចេះដោះឱ្យចំបញ្ហា។ ឯកឧត្ដមក៏បានផ្តល់ការណែនាំដល់ក្រុមការងារតាមក្រុងស្រុកនីមួយៗត្រូវត្រៀមស្តុកទុកនូវអង្ករ និងអំបិល ទឹកត្រី ទឹកស៊ីអីវ សម្រាប់ចែកជូនដល់ប្រជាជនទីទាល់ក្រខ្លាំង និងជនចាស់ជរាជាដើម ព្រមទាំងត្រូវប្រកាន់យកនូវទស្សនៈធ្វើជាម្ចាស់លើបញ្ហា ចេះធ្វើការជាក្រុម ដើម្បីធ្វើការដោះស្រាយ និងសហការដោះស្រាយបញ្ហាទាំងនោះឱ្យមានប្រសិទ្ធភាព ព្រមទាំងត្រូវបន្តខិតខំពង្រឹងនិងបង្កើនសមត្ថភាពជាប្រចាំ បន្តធ្វើល្អ អំពើត្រឹមត្រូវ ត្រូវចេះកែខ្លួនក្នុងពេលមានកំហុស និងត្រូវប្រឹងឱ្យខ្លាំងជាងមុនជាដរាប ដើម្បីចូលរួមទប់ស្កាត់រាល់ឧបាយកលទុច្ចរិត រួមចំណែកដល់ការអភិវឌ្ឍមូលដ្ឋាន និងការថែរក្សាសន្តិភាព និងភាពសុខសាន្តជូនប្រជាជន។

ក្នុងឱកាសនោះផងដែរ ឯកឧត្ដម វង្សី វិស្សុត បាននាំយកនូវអំណោយជាថវិកា និងសម្ភារៈបរិក្ខារមួយចំនួនជូន​ដល់សមាជិកសមាជិកាដែលបានចូលរួមកម្មវិធី និងគណៈកម្មាធិការគណបក្សនៅមូលដ្ឋានផងដែរ៕

ដោយ ស៊ុម វណ្ណា (ប្រភព÷ទីស្ដីការគណៈរដ្ឋមន្ត្រី)