AKP តាកែវ ថ្ងៃទី១៧ ខែឧសភាឆ្នាំ២០២៦--

ដើម្បីលើកកម្ពស់សោភ័ណភាពទីក្រុង និងកាត់បន្ថយការកកស្ទះចរាចរណ៍ជុំវិញតំបន់ទីប្រជុំជន លោក ឌឹម គឹមសាន អភិបាលនៃគណៈអភិបាលក្រុងដូនកែវ បានដឹកនាំក្រុមការងារចម្រុះ រួមមាន លោក លោកស្រី អភិបាលរងក្រុង មន្ត្រីជំនាញ និងកងកម្លាំងប្រដាប់អាវុធ ចុះរៀបចំសណ្ដាប់ធ្នាប់សាធារណៈនិងអប់រំណែនាំ ដល់អាជីវករលក់ដូរ ទាំងនៅក្នុងនិងជុំវិញផ្សារតាកែវ។ការចុះត្រួតពិនិត្យនេះធ្វើឡើងនៅផ្សារតាកែវ ស្ថិតនៅក្នុងសង្កាត់រកាក្នុងក្រុងដូនកែវខេត្តតាកែវ កាលពីព្រឹកថ្ងៃសៅរ៍១៥រោចខែពិសាខឆ្នាំមមីអដ្ឋស័កព.ស២៥៧០ ត្រូវនឹងថ្ងៃទី16ខែឧសភាឆ្នាំ2026។

ក្នុងឱកាសចុះពិនិត្យដោយផ្ទាល់នោះ លោក ឌឹម គឹមសាន បានជួបសំណេះសំណាលយ៉ាងស្និទ្ធស្នាលជាមួយបងប្អូនអាជីវករនិងបានណែនាំ ពាក់ព័ន្ធនឹងការរៀបចំសណ្តាប់ធ្នាប់សាធារណៈនិងអនាម័យ ដល់បងប្អូនអាជីវករទាំងអស់ សូមកុំដាក់តាំងលក់ទំនិញឬសម្ភារផ្សេងៗ រំលោភមកលើចិញ្ចើមផ្លូវ និងទ្រូងផ្លូវសាធារណៈដែលធ្វើឱ្យបាត់បង់សណ្ដាប់ធ្នាប់សាធារណៈ និងបង្កការកកស្ទះដល់ការធ្វើដំណើររបស់ប្រជាពលរដ្ឋ។

លោកអភិបាលក្រុងដូនកែវ ក៏បានធ្វើការណែនាំឱ្យអាជីវករគ្រប់រូប ត្រូវចេះវេចខ្ចប់និងទុកដាក់កាកសំណល់ក៏ដូចជាសំរាម ឱ្យបានត្រឹមត្រូវតាមកន្ត្រកឬធុងសំរាម។ដើម្បីរក្សាបាននូវបរិស្ថានស្អាត និងផាសុកភាពសម្រាប់ខ្លួនយើងផ្ទាល់ និងអ្នកមកទិញទំនិញ។

លោក ឌឹម គឹមសាន បានសង្កត់ធ្ងន់ថា ការរៀបចំសណ្ដាប់ធ្នាប់នេះ មិនមែនជាការរឹតត្បិត ការរកស៊ីរបស់បងប្អូនឡើយ។ប៉ុន្តែវាជាការរួមគ្នាកសាងភាពរៀបរយ ដើម្បីទាក់ទាញម៉ូយនិងអ្នកទេសចរណ៍ ឱ្យចូលមកផ្សារតាកែវកាន់តែច្រើន ដែលជាប្រភពចំណូលដ៏ល្អ សម្រាប់លើកស្ទួយជីវភាពគ្រួសាររបសបងប្អូន កាន់តែរីកចម្រើនបន្ថែមទៀត។

លោកអភិបាលក្រុងដូនកែវ ឌឹម គឹមសាន ក៏បានបញ្ជាឱ្យកម្លាំងជំនាញរបស់រដ្ឋបាលក្រុង ត្រូវបន្តចុះអប់រំណែនាំនិងសម្របសម្រួលសណ្ដាប់ធ្នាប់សាធារណៈនេះជាប្រចាំ ដោយឈរលើគោលការណ៍អប់រំ និងការយោគយល់គ្នាទៅវិញទៅមក ដើម្បីចៀសវាងការបង្កផលប៉ះពាល់ដល់ការលក់ដូរប្រចាំថ្ងៃរបស់បងប្អូនប្រជាពលរដ្ឋ ៕

ដោយ អ៊ុច សៀង