AKP ភ្នំពេញ ថ្ងៃទី១៥ ខែឧសភា ឆ្នាំ២០២៦ -- រដ្ឋមន្ត្រីការបរទេសប៉ាគីស្ថាន និងគុយវ៉ែត កាលពីពេលថ្មីៗនេះ បានពិភាក្សាគ្នាអំពីជម្លោះនៅមជ្ឈិមបូព៌ា ដោយផ្តោតទៅលើផលប៉ះពាល់ «កាន់តែទូលំទូលាយ» នៃការបិទច្រកសមុទ្រហ័រមុសទៅលើសេដ្ឋកិច្ចពិភពលោក។ សេចក្តីថ្លែងការណ៍ផ្លូវការមួយបាននិយាយថា អ្នកការទូតកំពូលប៉ាគីស្ថាន គឺលោក អ៊ីស្សាក ដា (Ishaq Dar) និងសមភាគីគុយវ៉ែត គឺលោក ស្សេក ចារ៉ាហ៍ ចាបឺរ អាល់-អាម៉ាដ អាល់-សាបាហ៍ (Sheikh Jarrah Jaber Al-Ahmad Al-Sabah) បានពិភាក្សាអំពីកិច្ចខិតខំប្រឹងប្រែងរបស់អ៊ីស្លាម៉ាបាដក្នុងការលើកកម្ពស់កិច្ចសន្ទនា និងការចូលរួមរវាងសហរដ្ឋអាមេរិក និងអ៊ីរ៉ង់ ដើម្បីបញ្ចប់សង្គ្រាមរបស់ពួកគេ។ នេះបើយោងតាមការសន្ទនាតាមទូរស័ព្ទរបស់ពួកគេដែលចេញផ្សាយដោយក្រសួងការបរទេស។

កិច្ចពិភាក្សានេះបានកើតឡើងចំពេលដែលដំណើរទស្សនកិច្ចដ៏សំខាន់របស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ទៅកាន់ប្រទេសចិន ជាកន្លែងដែលលោកត្រូវបានគេរំពឹងថានឹងពិភាក្សាអំពីជម្លោះនៅមជ្ឈិមបូព៌ាដែលអូសបន្លាយជាមួយសមភាគីចិន គឺលោក ស៊ី ជីនពីង (Xi Jinping) ក្នុងចំណោមបញ្ហាផ្សេងៗទៀត។

រដ្ឋមន្ត្រីការបរទេសទាំងពីរបានពិភាក្សាគ្នាអំពីផលប៉ះពាល់កាន់តែទូលំទូលាយនៃការបិទច្រកសមុទ្រហ័រមុសទៅលើសេដ្ឋកិច្ចពិភពលោក និងបានសម្តែងក្តីសង្ឃឹមសម្រាប់ដំណោះស្រាយដោយសន្តិវិធី និងយូរអង្វែងនៃស្ថានភាពដែលកំពុងបន្ត។

លោក ដា បានបញ្ជាក់សារជាថ្មីនូវការប្តេជ្ញាចិត្តរបស់ប៉ាគីស្ថានក្នុងការបន្ត «កិច្ចខិតខំប្រឹងប្រែងទាំងអស់» សម្រាប់សន្តិភាព និងស្ថិរភាពនៅក្នុងតំបន់ និងលើសពីនេះ។

ចំណែកលោក ចារ៉ាហ៍ បានកោតសរសើរចំពោះកិច្ចខិតខំប្រឹងប្រែងសន្តិភាពរបស់ទីក្រុងអ៊ីស្លាម៉ាបាដ ដើម្បីលើកកម្ពស់កិច្ចសន្ទនា និងការចូលរួមរវាងសហរដ្ឋអាមេរិក និងអ៊ីរ៉ង់ បន្ថែមពីលើការសរសើរចំពោះតួនាទី «ស្ថាបនា» របស់ប្រទេសនៅអាស៊ីខាងត្បូងមួយនេះក្នុងការជំរុញសន្តិភាព និងស្ថិរភាពក្នុងតំបន់។

ប្រទេសប៉ាគីស្ថានបានសម្របសម្រួលបទឈប់បាញ់រយៈពេលពីរសប្តាហ៍រវាងសហរដ្ឋអាមេរិក និងអ៊ីរ៉ង់នៅថ្ងៃទី០៨ ខែមេសា បន្ទាប់មក ដោយកិច្ចពិភាក្សាដ៏សំខាន់នៅទីក្រុងអ៊ីស្លាម៉ាបាដ ដែលមានការចូលរួមពីគណៈប្រតិភូជាន់ខ្ពស់មកពីប្រទេសទាំងពីរ នៅថ្ងៃទី១១ និងថ្ងៃទី១២ ខែមេសា។

ទោះជាយ៉ាងណាក៏ដោយ គ្មានភាគីណាមួយអាចឈានដល់កិច្ចព្រមព្រៀងដើម្បីបញ្ចប់សង្គ្រាមនោះទេ។

ចាប់តាំងពីពេលនោះមក ភាគីជម្លោះទាំងពីរបានផ្លាស់ប្តូររូបមន្តដើម្បីឈានដល់ចំណុចកណ្តាល ដើម្បីបន្តកិច្ចពិភាក្សាដោយផ្ទាល់ជុំទីពីរ ដើម្បីបញ្ចប់ជម្លោះ ដែលបានរំខានដល់ការផ្គត់ផ្គង់ថាមពលជាសកល និងជីវិតប្រចាំថ្ងៃនៅទូទាំងតំបន់៕

ដោយ៖ យា ចិន្ដាខន្ដី (ប្រភព៖ AA-AKP)