AKP ភ្នំពេញ ថ្ងៃទី១៥ ខែឧសភា ឆ្នាំ២០២៦ -- ប្រធានាធិបតីចិន លោក ស៊ី ជីនពីង បាននិយាយកាលពីថ្ងៃព្រហស្បតិ៍ថា ទ្វាររបស់ប្រទេសចិនចំពោះធុរកិច្ចអាម៉េរិកនឹង «បើកចំហ» បន្ថែមទៀត ខណៈដែលលោកបានជួបជាមួយនាយកប្រតិបត្តិអាម៉េរិកសំខាន់ៗនៅទីក្រុងប៉េកាំង ក្នុងអំឡុងពេលកិច្ចប្រជុំកំពូលជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ។

លោក ត្រាំ បានណែនាំដល់ថ្នាក់ដឹកនាំធុរកិច្ចដែលអមដំណើរលោកឱ្យលោក ស៊ី បានស្គាល់ ខណៈដែលលោកប្រធានាធិបតីចិនបានរៀបចំគណៈប្រតិភូអាម៉េរិកនៅសាលធំប្រជាជន ដែលជាអគាររដ្ឋរបស់ប្រទេសចិន។

គណៈប្រតិភូធុរកិច្ចអាម៉េរិកដែលអមដំណើរលោក ត្រាំ រួមមានលោក ចេនសិន ហ័ង (Jensen Huang) មកពីក្រុមហ៊ុន Nvidia លោក អេឡុន ម៉ាស់ (Elon Musk) មកពីក្រុមហ៊ុន Tesla លោក ធីម ឃុក (Tim Cook) មកពីក្រុមហ៊ុន Apple លោក ឡារី ហ្វីនក៍ (Larry Fink) មកពីក្រុមហ៊ុន BlackRock លោក ស្តេហ្វេន ស្ស្វាមេន (Stephen Schwarzman) មកពីក្រុមហ៊ុន Blackstone លោក ឃែលលី អូតបឺក (Kelly Ortberg) មកពីក្រុមហ៊ុន Boeing លោក ប្រាយអេន ស៊ីកេស (Brian Sikes) មកពីក្រុមហ៊ុន Cargill លោក ចេន ហ្រ្វេសស័រ (Jane Fraser) មកពីក្រុមហ៊ុន Citigroup លោក ឡារី ឃុល (Larry Culp) មកពីក្រុមហ៊ុន GE Aerospace លោក ដាវីដ សូឡូម៉ុន (David Solomon) មកពីក្រុមហ៊ុន Goldman Sachs លោក សេនជេយ ម៉េរ៉ូត្រា (Sanjay Mehrotraមកពីក្រុមហ៊ុន Micron និងលោក គ្រីស្ទីណូ អាម៉ុន (Cristiano Amon) មកពីក្រុមហ៊ុន Qualcomm។

ថ្នាក់ដឹកនាំធុរកិច្ចទាំងនោះបានសម្តែងក្តីសង្ឃឹមក្នុងការពង្រឹងប្រតិបត្តិការរបស់ពួកគេនៅក្នុងប្រទេសចិន និងពង្រឹងកិច្ចសហប្រតិបត្តិការជាមួយប្រទេសនេះ។

លោក ស៊ី បាននិយាយថា ក្រុមហ៊ុនធុរកិច្ចអាម៉េរិកបានចូលរួមយ៉ាងសកម្មក្នុងការកែទម្រង់ និងការបើកចំហរបស់ប្រទេសចិន ហើយភាគីទាំងពីរទទួលបានអត្ថប្រយោជន៍ពីទំនាក់ទំនងនេះ។

លោក ស៊ី បាននិយាយថា ទ្វារបើកចំហរបស់ប្រទេសចិន «នឹងបើកចំហរកាន់តែទូលំទូលាយ» ហើយប្រទេសនេះស្វាគមន៍សហរដ្ឋអាមេរិកក្នុងការពង្រឹងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកជាមួយប្រទេសចិន ដោយលោកបានបន្ថែមថា លោកជឿជាក់ថា ក្រុមហ៊ុនធុរកិច្ចអាម៉េរិកនឹងមានទស្សនវិស័យកាន់តែទូលំទូលាយនៅក្នុងទីផ្សារចិន។

មុនពេលហោះហើរទៅកាន់ទីក្រុងប៉េកាំង ប្រធានាធិបតីអាម៉េរិកបាននិយាយថា លោកនឹងធ្វើ «សំណើដំបូងបំផុត» របស់លោកទៅកាន់លោក ស៊ី ដើម្បី «បើកចំហរ» ប្រទេសចិនចំពោះធុរកិច្ចអាម៉េរិក។

ពាណិជ្ជកម្មទ្វេភាគីរវាងប្រទេសទាំងពីរមានចំនួនសរុបប្រមាណ ៤១៤,៧ប៊ីលានដុល្លារអាម៉េរិកនៅក្នុងឆ្នាំ២០២៥៕

ដោយ៖ យា ចិន្ដាខន្ដី (ប្រភព៖ AA-AKP)