AKP ភ្នំពេញ ថ្ងៃទី១៥ ខែឧសភា ឆ្នាំ២០២៦ -- ប្រធានាធិបតីអ៊ូហ្គង់ដា លោក យូវេរី មូសេវេនី (Yoweri Museveni) និងសមភាគីអេហ្ស៊ីបរបស់លោក គឺលោក អាប់ដេល ហ្វាតតាហ៍ អែលស៊ីស៊ី (Abdel Fattah El-Sisi) កាលពីថ្ងៃពុធ បានពិភាក្សាអំពីការប្រើប្រាស់ទឹកទន្លេនីល ពាណិជ្ជកម្ម និងសន្តិសុខតំបន់។

យោងតាមសេចក្តីថ្លែងការណ៍មួយដែលចេញដោយសភារដ្ឋ បានឱ្យដឹងថា លោក មូសេវេនី បាននិយាយថា ការរិចរិលបរិស្ថាន ជាពិសេសការរំលោភលើតំបន់សើម គឺជាបញ្ហាប្រឈមមួយដែលប៉ះពាល់ដល់អាងទន្លេនីល ដោយលោកបានកត់សម្គាល់ថា មនុស្សជាច្រើនបានឈ្លានពានតំបន់ដីសើមដើម្បីស្វែងរកដីសម្រាប់ធ្វើកសិកម្ម ដោយសារតែសម្ពាធប្រជាជន និងឱកាសសេដ្ឋកិច្ចនៅមានកម្រិត។

មេដឹកនាំអ៊ូហ្គង់ដាបានស្នើគម្រោងចិញ្ចឹមត្រីទ្រង់ទ្រាយធំជាផ្នែកមួយនៃដំណោះស្រាយ ដោយលោកបាននិយាយថា ការចិញ្ចឹមត្រីនឹងបង្កើតការងារ ការពារតំបន់ដីសើម និងបង្កើនប្រាក់ចំណូលពីការនាំចេញ។

ប្រធានាធិបតីអេហ្ស៊ីបបាននិយាយថា ប្រទេសរបស់លោកនឹងធ្វើការជាមួយប្រទេសអ៊ូហ្គង់ដា ដើម្បីបង្កើតគម្រោងចិញ្ចឹមត្រីទំនើប និងកៀរគរវិនិយោគិនអេហ្ស៊ីបឱ្យវិនិយោគលើវិស័យចិញ្ចឹមត្រីរបស់ប្រទេស។

នៅក្នុងអាងទន្លេនីល លោក អែលស៊ីស៊ី បាននិយាយថា ប្រទេសអេហ្ស៊ីបប្រឈមមុខនឹងកង្វះខាតទឹកធ្ងន់ធ្ងរ ដោយភាពអាចរកបាននៃទឹកក្នុងមនុស្សម្នាក់បានធ្លាក់ចុះក្រោម ៥០០ម៉ែត្រគូបជារៀងរាល់ឆ្នាំ។

លោកបាននិយាយថា ប្រទេសអេហ្ស៊ីបនៅតែប្តេជ្ញាចិត្តក្នុងការសន្ទនា និងកិច្ចសហប្រតិបត្តិការជាមួយប្រទេសនានាក្នុងអាងទន្លេនីល និងបានសង្កត់ធ្ងន់លើតម្រូវការសម្រាប់ការប្រើប្រាស់ធនធានទឹករួមគ្នាប្រកបដោយចីរភាព និងសមធម៌។

មេដឹកនាំទាំងពីរក៏បានអំពាវនាវឱ្យមានការបន្តការសន្ទនា និងដំណោះស្រាយដោយសន្តិវិធីចំពោះជម្លោះ ដោយលើកឡើងពីអស្ថិរភាពយូរអង្វែងនៅក្នុងប្រទេសលីប៊ី ជម្លោះនៅប៉ាឡេស្ទីន និងភាពតានតឹងដែលពាក់ព័ន្ធនឹងអ៊ីរ៉ង់៕

ដោយ៖ មូល មិនា (ប្រភព៖ ស៊ីនហួ)