AKP ភ្នំពេញ ថ្ងៃទី១២ ខែឧសភា ឆ្នាំ២០២៦ -- នាយករដ្ឋមន្ត្រីឥណ្ឌា លោកណារេនដ្រា ម៉ូឌី (Narendra Modi) កាលពីពេលថ្មីៗនេះ បានជំរុញឱ្យប្រជាជនកាត់បន្ថយការប្រើប្រាស់ប្រេងឥន្ធនៈតាមរយៈវិធានការមួយចំនួន ដូចជាការធ្វើការងារពីផ្ទះជាដើម ខណៈដែលភាពតានតឹងកើនឡើងនៅមជ្ឈិមបូព៌ាកំពុងបន្តជំរុញឱ្យតម្លៃថាមពលសកលលោកកើនឡើង។

លោក ម៉ូឌី បាននិយាយថា «ក្នុងអំឡុងពេលនៃជំងឺរាតត្បាតកូវីដ-១៩យើងបានអនុម័តការធ្វើការងារពីផ្ទះ ការប្រជុំតាមអនឡាញ តាមសន្និសីទវីដេអូ និងបានបង្កើតប្រព័ន្ធបែបនេះជាច្រើន»។ នេះបើយោងតាមសារព័ត៌មាន India Today។

លោកបានបន្ថែមថា «យើងក៏បានស៊ាំនឹងវិធានការទាំងនេះដែរ»។

លោកបាននិយាយថា «សព្វថ្ងៃនេះ តម្រូវការនៅពេលនេះគឺថា យើងចាប់ផ្តើមការអនុវត្តទាំងនោះឡើងវិញ ព្រោះវានឹងស្ថិតនៅក្នុងផលប្រយោជន៍ជាតិ ហើយយើងត្រូវតែផ្តល់អាទិភាពដល់វិធានការទាំងនេះម្តងទៀត»។

ភាពតានតឹងក្នុងតំបន់ បានកើនឡើងចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារប្រឆាំងនឹងអ៊ីរ៉ង់នៅថ្ងៃទី២៨ ខែកុម្ភៈដែលបង្កឱ្យមានការសងសឹកពីទីក្រុងតេអេរ៉ង់ប្រឆាំងនឹងអ៊ីស្រាអែលក៏ដូចជាសម្ព័ន្ធមិត្តរបស់សហរដ្ឋអាមេរិកនៅក្នុងឈូងសមុទ្រ។

ច្រកសមុទ្រហ័រមុស ដែលជាផ្លូវទឹកសកលលោកដ៏សំខាន់មួយដែលការដឹកជញ្ជូនប្រេងប្រហែល ២០% នៃការដឹកជញ្ជូនប្រេងសកលលោកឆ្លងកាត់ ក៏បានប្រឈមមុខនឹងការរំខានយ៉ាងធ្ងន់ធ្ងរដោយសារតែជម្លោះនេះផងដែរ។

លោក ម៉ូឌី បានបន្តថា «ប្រេងសាំង-ម៉ាស៊ូតបានឡើងថ្លៃខ្លាំងនៅទូទាំងពិភពលោក»។

លោកបានបន្ថែមថា «វាជាទំនួលខុសត្រូវរបស់យើងទាំងអស់គ្នាដែលការចំណាយតាមរយៈការប្តូរប្រាក់បរទេសទៅលើការទិញប្រេងសាំង-ម៉ាស៊ូត ក៏គួរតែត្រូវបានសន្សំដោយការសន្សំសំចៃប្រេងសាំង-ម៉ាស៊ូតផងដែរ»។

លោក ម៉ូឌី ក៏បានជំរុញឱ្យប្រជាជនជៀសវាងការទិញមាសសម្រាប់ពិធីមង្គលការរយៈពេលមួយឆ្នាំ ដែលជាផ្នែកមួយនៃកិច្ចខិតខំប្រឹងប្រែងដើម្បីកាត់បន្ថយការចំណាយ។

លោកបានអំពាវនាវបន្ថែមទៀតដល់សាធារណជនឱ្យកាត់បន្ថយការប្រើប្រាស់ប្រេងដែលអាចបរិភោគបាន និងលើកទឹកចិត្តកសិករឱ្យកាត់បន្ថយការពឹងផ្អែកលើជីគីមីដែលនាំចូល៕

ដោយ៖ យា ចិន្ដាខន្ដី (ប្រភព៖ AA-AKP)