AKP ភ្នំពេញ ថ្ងៃទី១២ ខែឧសភា ឆ្នាំ២០២៦--សហព័ន្ធកីឡាទាញព្រ័ត្រកម្ពុជាបានរៀបចំមហាសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារបន្តឆ្នាំ២០២៦ នៅអគារគណៈកម្មាធិការជាតិអូឡាំពិកកម្ពុជា ក្រោមវត្តមានឯកឧត្តម សាម៉ន បណ្ឌិត្យ អនុប្រធានសហព័ន្ធកីឡាទាញព្រ័ត្រកម្ពុជា និងសមាជិកប្រតិបត្តិសហព័ន្ធកីឡាទាញព្រ័ត្រកម្ពុជាជាច្រើនរូប។

លោក ចាប រតនា អគ្គលេខាធិការ សហព័ន្ធកីឡាទាញព្រ័ត្រកម្ពុជាបានលើកឡើងថា ជារួម លទ្ធផលការងារដែលសហព័ន្ធសម្រេចបានក្នុងឆ្នាំកន្លងទៅនេះ គឺជាសមិទ្ធផលដ៏ធំធេង និងជាមោទនភាពថ្មីមួយទៀត សម្រាប់វិស័យកីឡាទាញព្រ័ត្រកម្ពុជា។ ឆ្លងតាមរយៈការខិតខំប្រឹងប្រែងយ៉ាងសកម្មយើងអាចសរុបវាយតម្លៃលើចំណុចគន្លឹះសំខាន់ៗដូចជា ១.ការងាររដ្ឋបាលនិងគ្រប់គ្រង៖ សហព័ន្ធបានពង្រឹងរចនាសម្ព័ន្ធផ្ទៃក្នុងឱ្យកាន់តែមានប្រសិទ្ធភាព និងតម្លាភាព និងសហការគ្នាបានយ៉ាងរលូន ដែលជាឆ្អឹងខ្នងដ៏រឹងមាំក្នុងការទ្រទ្រង់រាល់សកម្មភាពរបស់សហព័ន្ធ។ ២.ការបណ្តុះបណ្តាលធនធានមនុស្ស៖ យើងបានយកចិត្តទុកដាក់ខ្ពស់លើការកសាងសមត្ថភាពដល់មន្រ្តីបច្ចេកទេស អាជ្ញាកណ្តាល ចៅក្រម និងគ្រូបង្វឹក តាមរយៈវគ្គបណ្តុះបណ្តាលនានា ដែលធ្វើឱ្យធនធានមនុស្សរបស់យើងមានចំណេះដឹង និងជំនាញច្បាស់លាស់ស្របតាមស្តង់ដាអន្តរជាតិ។ ៣.ការរៀបចំការប្រកួតជើងឯកថ្នាក់ជាតិ បញ្ចប់ថ្មីៗនេះទទួលបានជោគជ័យយ៉ាងត្រចេះត្រចង់ទាំងផ្នែកបច្ចេកទេសការប្រកួតនិងចំនួនអ្នកចូលរួម។

នេះសរបញ្ជាក់ឱ្យឃើញពីការរីកចម្រើននៃកម្រិតសមត្ថភាពរបស់កីឡាករ កីឡាការិនីនិងការគាំទ្រកាន់តែច្រើនពីសំណាក់សាធារណជន។ ជោគជ័យទាំងនេះមិនអាចកើតឡើងបានឡើយ ប្រសិនបើគ្មានការណែនាំពី ក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា ក៏ដូចជាការលះបង់កម្លាំងកាយចិត្ត និងសាមគ្គីផ្ទៃក្នុងរបស់សមាជិកសហព័ន្ធ កីឡាករ និងដៃគូពាក់ព័ន្ធទាំងអស់។

លោក ចាប រតនា បន្ថែមថា ផ្អែកលើមូលដ្ឋានជោគជ័យទាំងនេះ សហព័ន្ធកីឡាទាញព្រ័ត្រកម្ពុជា មានការប្តេជ្ញាចិត្តយ៉ាងមុតមាំក្នុងការបន្តបេសកម្មអភិវឌ្ឍន៍វិស័យកីឡាមួយនេះឱ្យកាន់តែបោះជំហានទៅមុខយ៉ាងរឹងមាំ ដើម្បីត្រៀមដណ្តើមជោគជ័យជូនជាតិមាតុភូមិ ក្នុងព្រឹត្តិការណ៍ប្រកួតលើឆាកអន្តរជាតិនានា នាពេលអនាគត។ ជាមួយគ្នានេះដែរ បន្ទាប់ពីជោគយ៉ាងត្រចេះត្រចង់កាលពីឆ្នាំកន្លងទៅ សម្រាប់ទិសដៅបន្តក្នុងឆ្នាំ២០២៦នេះ អគ្គលេខាធិការ បានបង្ហាញការប្តេជ្ញាខ្ពស់ថា សមាជិកទាំងអស់នៃសហព័ន្ធនិងប្រឹងប្រែងអស់ពីកម្លាំងកាយចិត្តរៀបចុះយុទ្ធសាស្រ្តឱ្យកាន់តែមុតស្រួចដើម្បីជំរុញឱ្យសហព័ន្ធកាន់តែមានការអភិវឌ្ឍនិងកាន់តែមានសក្តានុពល។

ឯកឧត្តម សាម៉ន បណ្ឌិត្យ អនុប្រធានសហព័ន្ធកីឡាទាញព្រ័ត្រកម្ពុជាបានកោតសើរនិងវាយតម្លៃខ្ពស់ ចំពោះការខិតខំប្រឹងប្រែងរបស់សមាជិកទាំងអស់ ដែលសម្រចបានសមិទ្ធផលជោគជ័យនាពេលកន្លងមក។ ចំពោះបញ្ហាមួយចំនួនដែលសហព័ន្ធកំពុងប្រឈមដូចជា ការស្នើសុំឱ្យមានការហ្វឹកហាត់ប្រមូលផ្តុំក្រុមជម្រើសជាតិ ដែលនឹងត្រូវស្នើសុំគោលការណ៍ពីក្រសួងអប់រំនោះ ឯកឧត្តមនឹងខិតខំសម្របសម្រួលដើម្បីឱ្យក្រសួងអប់រំ យុវជន និងកីឡាអនុញាតប្រមូលផ្តុំដូចជាសហព័ន្ធជាតិនានា ដើម្បីអភិវឌ្ឍសមត្ថភាពឈានទៅដណ្តើមមេដាយពីការប្រកួតលើឆាកអន្តរជាតិមកជូនជាតិ។ មិនត្រឹមប៉ុណ្ណោះ ឯកឧត្តម ក៏និងជំរុញសំណើរស្នើសុំក្រសួងអប់រំយុវជននិងកីឡាដាក់បញ្ចូលកីឡាទាញព្រ័ត្រទៅក្នុងកម្មវិធីប្រកួតកីឡា បឋមសិក្សា មធ្យមសិក្សា និងឧត្តមសិក្សា ដើម្បីស្វែងរកធនធានបន្តវេនពីគ្រឹះស្ថានសិក្សាផងដែរ៕

ដោយ ហេង ណាលីន