AKP ភ្នំពេញ ថ្ងៃទី១១ ខែឧសភា ឆ្នាំ២០២៦ -- អាស៊ានបានបញ្ជាក់សារជាថ្មីនូវការប្តេជ្ញាចិត្តរបស់ខ្លួនក្នុងការសម្រេចបាននូវអព្យាក្រឹតភាពកាបូន និងកំណើនប្រកបដោយចីរភាពនៅត្រឹមឆ្នាំ២០៣០។ ផ្នែកសំខាន់មួយនៃយុទ្ធសាស្ត្រនេះ គឺផែនការសកម្មភាពវិនិយោគក្នុងតំបន់ ដែលមានគោលបំណងដាក់ប្លុកនេះឱ្យក្លាយជាគោលដៅបង្រួបបង្រួមសម្រាប់ការវិនិយោគបៃតង។ ផែនការនេះផ្តោតសំខាន់ទៅលើការទាក់ទាញដើមទុនសម្រាប់វិស័យអាទិភាព ដូចជាឧបករណ៍ថាមពលកកើតឡើងវិញ ការចាប់យកកាបូន ជីវឥន្ធនៈ និងសម្ភារៈសំណង់ប្រកបដោយចីរភាព ដើម្បីជំរុញការងើបឡើងវិញក្រោយជំងឺរាតត្បាត។

ដើម្បីពង្រឹងសន្តិសុខថាមពល បណ្តាថ្នាក់ដឹកនាំកំពុងពន្លឿនផែនការសកម្មភាពអាស៊ានសម្រាប់កិច្ចសហប្រតិបត្តិការថាមពល។ គំនិតផ្តួចផ្តើមនេះកំណត់គោលដៅដ៏មហិច្ឆតាឆ្នាំ២០៣០ រួមទាំងការកាត់បន្ថយអាំងតង់ស៊ីតេថាមពល ៤០% និងបង្កើនចំណែកថាមពលកកើតឡើងវិញនៃសមត្ថភាពថាមពលរបស់តំបន់ឱ្យដល់ ៤៥%។ យុទ្ធសាស្ត្រនេះសង្កត់ធ្ងន់ទៅលើការធ្វើឱ្យប្រភពថាមពលមានភាពចម្រុះ ការធ្វើឌីជីថលូបនីយកម្មបណ្តាញអគ្គិសនីឆ្លាតវៃ និងការជំរុញបច្ចេកវិទ្យាថ្មីៗ ដើម្បីបង្កើតប្រព័ន្ធថាមពលក្នុងតំបន់ដែលមានភាពធន់ និងប្រកួតប្រជែងជាងមុន។

លើសពីនេះទៀត ប្លុកកំពុងដំណើរការយុទ្ធសាស្ត្ររបស់ខ្លួនសម្រាប់អព្យាក្រឹតភាពកាបូន ដើម្បីកាត់បន្ថយកាបូនពីខ្សែសង្វាក់តម្លៃក្នុងតំបន់ និងទាក់ទាញហិរញ្ញប្បទានបៃតងបន្ថែមទៀត។ កិច្ចខិតខំប្រឹងប្រែងក៏កំពុងដំណើរការដើម្បីបញ្ចប់ផែនការអនុវត្តសេដ្ឋកិច្ចខៀវអាស៊ាន ដែលផ្តោតទៅលើការប្រើប្រាស់ធនធានសមុទ្រ និងទឹកសាបប្រកបដោយចីរភាព។ តាមរយៈការគូសផែនទី និងការកំណត់ឱកាសហិរញ្ញវត្ថុថ្មីៗ អាស៊ានខិតខំធ្វើសមាហរណកម្មសុខភាពផ្លូវសមុទ្រជាមួយនឹងភាពធន់ផ្នែកសេដ្ឋកិច្ចរយៈពេលវែង៕

ដោយ៖ យា ចិន្ដាខន្ដី (ប្រភព៖ VNA)