AKPសៀមរាបថ្ងៃទី០៨ ខែឧសភា ឆ្នាំ ២០២៦– លោក លី សារី អភិបាលរងខេត្តសៀមរាប នៅថ្ងៃទី០៨ ខែឧសភា ឆ្នាំ២០២៦នេះ បានចុះពិនិត្យមើលមន្រ្តីនគរបាលចុះបំពេញបែបបទផ្តល់អត្តសញ្ញាណបណ្ណសញ្ជាតិខ្មែរដល់បងប្អូនប្រជាពលរដ្ឋ នៅបរិវេណវត្តប្រាសាទគោកចក ដែលស្ថិតនៅក្នុងសង្កាត់គោកចក ក្រុងសៀមរាប ខេត្តសៀមរាប។

ទន្ទឹមនឹងនោះ លោក អភិបាលរងខេត្ត ក៏បានពាវនាវដល់ប្រជាពលរដ្ឋដែលមានអត្តសញ្ញាណបណ្ណសញ្ជាតិខ្មែរ អស់សុពលភាព និងយុវជនគ្រប់អាយុ ១៥ ឆ្នាំឡើងទៅ អញ្ជើញមកបំពេញបែបបទធ្វើ ឬបន្តសុពលភាពអត្តសញ្ញាណបណ្ណថ្មី ដោយឥតគិតថ្លៃនៅតាម ប៉ុស្តិ៍នគរបាលរដ្ឋបាលឃុំ/សង្កាត់ អធិការដ្ឋាននគរបាលក្រុង/ស្រុក ស្នងការដ្ឋាននគរបាលខេត្ត និងតាមរយៈការចុះផ្តល់សេវាធ្វើអត្តសញ្ញាណប័ណ្ណសញ្ជាតិខ្មែរចល័ត របស់ស្នងការដ្ឋាននគរបាលខេត្តសៀមរាប។

លោក លី សារី មានប្រសាសថាអត្តសញ្ញាណបណ្ណសញ្ជាតិខ្មែរជាឯកសារផ្លូវការមួយ សម្រាប់បញ្ជាក់អំពីអត្តសញ្ញាណបុគ្គលម្នាក់ៗដែលមាន សញ្ជាតិខ្មែរនឹងត្រូវបានផ្តល់ជូនប្រជាពលរដ្ឋខ្មែរសម្រាប់ ប្រើប្រាស់ជាប្រយោជន៍សម្រាប់កំណត់អត្តសញ្ញាណបុគ្គល ដែលមានសញ្ជាតិជាខ្មែរ ដើម្បីធានាការចូលរួមអនុវត្តសិទ្ធ និងកាតព្វកិច្ច ជាប្រជាពលរដ្ឋខ្មែរស្របតាមច្បាប់ សម្រាប់ការបំពេញបែបបទចូលបម្រើការងារ ការចុះបញ្ជីអចលនវត្ថុ ការចុះបញ្ជីយានយន្ត ធ្វើលិខិតឆ្លងដែន បម្រើការងារបោះឆ្នោត ការប្រើប្រាស់សេវារដ្ឋបាលផ្សេងៗទៀត។

លោកឧត្តមសេនីយ៍ត្រី នៅ អេងវណ្ណនី បានឱ្យដឹងដែរថា  ចំពោះការស្នើសុំផ្តល់អត្តសញ្ញាណបណ្ណសញ្ជាតិខ្មែរ សាមីខ្លួនត្រូវភ្ជាប់ឯកសារយោងរួមមានសេចក្តីចម្លងសំបុត្រកំណើត ឬសេចក្តីចម្លងសំបុត្របញ្ជាក់កំណើត។ សៀវភៅស្នាក់នៅ ឬសៀវភៅគ្រួសារ(បញ្ជាក់នីត្យានុកូលកម្ម) ឬលិខិតបញ្ជាក់ទីលំនៅ។ចំពោះប្រជាពលរដ្ឋខ្មែរដែលកំពុងបំពេញជាបព្វជិតក្នុងព្រះពុទ្ធសាសនា ត្រូវភ្ជាប់ឯកសារបន្ថែម រួមមានឆាយា ឬសង្ឃដីកា ឬសុទ្ធិបត្រ។ ករណីលាចាកសិក្ខាបទសាមីខ្លួន ត្រូវស្នើសុំប្តូរទិន្នន័យនៅលើអត្តសញ្ញាណបណ្ណសញ្ជាតិខ្មែរ រួមមានរូបថត និងអាសយដ្ឋាន។

លោកឧត្តមសេនីយ៍ត្រី បន្ថែមថាចំពោះប្រជាពលរដ្ឋដែលប្រើប្រាស់អត្តសញ្ញាណបណ្ណសញ្ជាតិខ្មែរអស់សុពលភាព ឬ មានសុពលភាពតិចជាង១៨០ថ្ងៃ(៦ខែ)សូមអញ្ជើញទៅបំពេញបែបបទបន្តសុពលភាពឡើងវិញដោយតម្រូវភ្ជាប់ឯកសារយោងសម្រាប់ស្នើសុំរួមមានអត្តសញ្ញាណបណ្ណសញ្ជាតិខ្មែរអស់សុពលភាពច្បាប់ដើម ក្នុងករណីផ្លាស់ប្តូរអាសយដ្ឋាន សូមភ្ជាប់ឯកសារ សៀវភៅស្នាក់នៅ ឬសៀវភៅគ្រួសារ បញ្ជាក់នីត្យានុកូលកម្ម  ឬលិខិតបញ្ជាក់ទីលំនៅ៕

ដោយ៖ ឃុត សៅ