AKP ភ្នំពេញ ថ្ងៃទី០៨ ខែឧសភា ឆ្នាំ២០២៦--ការប្រកួតកីឡាគុនល្បុក្កតោនៃការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ បានបិទបញ្ចប់ដោយជោគជ័យ នៅរសៀលថ្ងៃទី០៨ ខែឧសភា ឆ្នាំ២០២៦ នៅសាលកីឡាសាកលវិទ្យាល័យ ភូមិន្ទភ្នំពេញ ខណៈថ្នាក់ដឹកនាំសហព័ន្ធកីឡាគុនល្បុក្កតោកម្ពុជាបានលើកទឹកចិត្តដល់កីឡាការ កីឡាការិនីវ័យក្មេងក្នុងកម្រិតបឋមសិក្សានេះបន្តការហ្វឹកហាត់ប្រកបដោយវិន័យ សីលធម៌ ហើយសូមយកគុណតម្លៃនៃគុនល្បុក្កតោទៅអនុវត្តក្នុងជីវិតប្រចាំថ្ងៃ។

នេះជាការលើកឡើងប្រកបដោយស្នាមញញឹមរបស់លោក អ៊ួ តារា អគ្គលេខាធិការ តំណាងឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និងជាប្រធានសហព័ន្ធកីឡាគុនល្បុក្កតោកម្ពុជា នៅក្នុងពិធីបិទការប្រកួត នៅពេលដែលលោកបានឃើញធនធានបន្តវេនប្រភេទកីឡាមរតកវប្បធម៌ជាតិខ្មែរមួយនេះបង្ហាញស្នៀតគុនបានយ៉ាងល្អប្រសើរ។

លោកអគ្គលេខាធិការរូបនេះបានមើលឃើញពីការសម្តែងស្នៀតគុនខ្លះទាល់តែកម្រិតយុវជនទើបអាចធ្វើបានល្អ ប៉ុន្តែការសម្តែងវិញ្ញាសារ៣នាក់ចុងក្រោយ គឺកីឡាករជាកុមារកម្រិតបឋមសិក្សាអាចធ្វើទៅរួចបានល្អដែរ ដូច្នេះលោកពិតជារីករាយ ហើយសូមអរគុណចំណោះការខិតខំប្រឹងប្រែងរបស់កីឡាករ ក៏ដូចជាគ្រូបង្វឹកដែលប្រឹងប្រែងបង្ហាត់បង្រៀនសិស្សគុន។

ក្នុងនាមតំណាងប្រធានសហព័ន្ធ លោកបន្ថែមថា ក្នុងរយៈពេលប្រកួត២ថ្ងៃមកនេះ យើងទាំងអស់គ្នាបានឃើញមិនត្រឹមតែការប្រកួតប្រជែងប៉ុណ្ណោះទេ ប៉ុន្តែយើងក៏បានឃើញនូវស្មារតីពិតប្រាកដនៃគុនល្បុក្កតោ ដែលពោរពេញដោយវិន័យ ការគោរព ភាពក្លាហាន សាមគ្គីភាព និងការតស៊ូមិនរាថយ។ កីឡាករ កីឡាការិនី ដែលជាសិស្សានុសិស្សទាំងអស់ ដែលបានឡើងប្រកួតនៅលើទីលាន នាពេលនេះ គឺសុទ្ធតែជាអ្នកឈ្នះ ព្រោះក្មួយៗបានបង្ហាញពីភាពអង់អាច ការខិតខំប្រឹងប្រែង និងស្មារតីរបស់អ្នកកីឡាពិតប្រាកដ។ ចំពោះកីឡាករ កីឡាការិនី ដែលទទួលបានមេដាយថ្ងៃនេះ ក្នុងនាមសហព័ន្ធបានអបអរសាទរយ៉ាងស្មោះស្ម័គ្រ ដោយនេះស្តែងឱ្យឃើញពីការខិតខំប្រឹងប្រែងរបស់ក្មួយៗ បាននាំមកនូវកិត្តិយសជូនសាលារៀន គ្រួសារ និងសហគមន៍របស់ខ្លួន។

បន្ថែមពីលើនេះ អគ្គលេខាធិការក៏បានថ្លែងអំណរគុណយ៉ាងជ្រាលជ្រៅចំពោះគណៈកម្មការរៀបចំ លោកគ្រូ អ្នកគ្រូ គ្រូបង្វឹក អាជ្ញាកណ្ដាល អ្នកស្ម័គ្រចិត្ត មាតាបិតា អាណាព្យាបាល និងអ្នកគាំទ្រទាំងអស់ ដែលបានចូលរួមចំណែកធ្វើឱ្យកម្មវិធីនេះប្រព្រឹត្តទៅដោយជោគជ័យ និងប្រកបដោយភាពអធិកអធម។ លោកក៏បានថ្លែងអំណរគុណយ៉ាងស្មោះចំពោះលោកគ្រូ អ្នកគ្រូ និងគ្រូបង្វឹកទាំងអស់ ដែលបានលះបង់កម្លាំងកាយចិត្ត ក្នុងការបណ្តុះបណ្តាល និងជំរុញទឹកចិត្តដល់ក្មួយៗកីឡាករ កីឡាការិនី។ ការលះបង់របស់លោកអ្នក គឺជាកម្លាំងដ៏សំខាន់ក្នុងការអភិរក្ស និងអភិវឌ្ឍគុនល្បុក្កតោសម្រាប់អនាគត។

«សូមបន្តហ្វឹកហាត់ប្រកបដោយវិន័យ និងសិលធម៌ ហើយសូមយកគុណតម្លៃនៃគុនល្បុក្កតោទៅអនុវត្តក្នុងជីវិតប្រចាំថ្ងៃ ដោយចេះគោរពអ្នកដទៃ មានភាពរឹងមាំក្នុងពេលជួបការលំបាក និងខិតខំប្រឹងប្រែងដើម្បីសម្រេចក្តីស្រមៃរបស់ខ្លួន។ ជំនួសមុខឱ្យថ្នាក់ដឹកនាំនៃគណៈកម្មាធិការប្រតិបត្តិសហព័ន្ធកីឡាគុណល្បុកតោកម្ពុជា លោកបានអំពាវនាវឱ្យអ្នកទាំងអស់គ្នាបន្តរួមសហការគ្នា ក្នុងការអភិរក្ស លើកស្ទួយ និងផ្សព្វផ្សាយគុនល្បុក្កតោខ្មែរឱ្យកាន់តែរីកចម្រើន និងល្បីល្បាញទាំងនៅលើឆាកជាតិ និងអន្តរជាតិ»។ លោក អ៊ួ តារា បានបន្ថែម។

យោងតាមលទ្ធផលបច្ចេកទេសរបស់សហព័ន្ធកីឡាគុនល្បុក្កតោកម្ពុជាបានឱ្យដឹងថា កីឡាករ កីឡាការិនីមកពីខេត្តរតនគិរី ដណ្តើមបានចំណាត់ថ្នាក់លេខ១ ដោយដណ្តើមបានមេដាយសរុប ៨គ្រឿង (មាស៧ និងប្រាក់១) ខេត្តកំពង់ស្ពឺ ចំណាត់ថ្នាក់លេខ២ មេដាយសរុប ៥គ្រឿង (មាស១ ប្រាក់៣ សំរឹទ្ធ១)  ខេត្តកំពង់ឆ្នាំង លេខ៣ មេដាយសរុប៥គ្រឿង (មាស ១ ប្រាក់២ និងសំរឹទ្ធ២) ខណៈលេខ៣ ដណ្តើមបានដោយខេត្តបន្ទាយមានជ័យជាមួយមេដាយសរុប ៣គ្រឿង ក្នុងនោះមេដាយមាស១ និងមេដាយប្រាក់២គ្រៀង។ ក្រៅពីនេះ មាន៦ខេត្តទៀតទទួលបានមេដាយប្រាក់ និងសំរឹទ្ធ និងឈរនៅលេខរៀងបន្តបន្ទាប់។ ការប្រកួតឆ្នាំនេះមានការចូលរួមកើនឡើងរហូតដល់ ១០រាជធានី-ខេត្ត៕

ដោយ ហេង ណាលីន