AKP ភ្នំពេញ ថ្ងៃទី០៨ ខែឧសភា ឆ្នាំ២០២៦ -- ការិយាល័យរបស់ឧបនាយករដ្ឋមន្ត្រី និងជារដ្ឋមន្ត្រីការបរទេសប៉ាគីស្ថាន បាននិយាយកាលពីថ្ងៃព្រហស្បតិ៍ថា លោក ម៉ូហាមម៉ាដ អ៊ីសាក ដារ (Mohammad Ishaq Dar) បានធ្វើការសន្ទនាតាមទូរស័ព្ទជាមួយរដ្ឋមន្ត្រីការបរទេសអ៊ីរ៉ង់ លោកសេយេដ អាប់បាស់ អារ៉ាកជី (Seyed Abbas Araghchi) ដើម្បីពិភាក្សាអំពីការអភិវឌ្ឍក្នុងតំបន់ថ្មីៗ និងកិច្ចខិតខំប្រឹងប្រែងការទូតដែលកំពុងបន្តមានគោលបំណងលើកកម្ពស់សន្តិភាព និងស្ថិរភាព។

ក្នុងអំឡុងពេលនៃការសន្ទនា ភាគីទាំងពីរបានផ្លាស់ប្តូរទស្សនៈលើបញ្ហាដែលមានការព្រួយបារម្ភទៅវិញទៅមក និងបានបញ្ជាក់ជាថ្មីអំពីសារៈសំខាន់នៃការចូលរួមការទូតជាបន្តបន្ទាប់រវាងប្រទេសប៉ាគីស្ថាន និងអ៊ីរ៉ង់។

រដ្ឋមន្ត្រីការបរទេសអ៊ីរ៉ង់បានថ្លែងអំណរគុណដល់ប្រទេសប៉ាគីស្ថានសម្រាប់ការសម្របសម្រួលការបញ្ជូនជនជាតិអ៊ីរ៉ង់ត្រឡប់ទៅស្រុកវិញមុននេះពីនាវាដែលត្រូវបានរឹបអូស ខណៈពេលដែលបានកោតសរសើរចំពោះការគាំទ្រផ្នែកការទូត និងមនុស្សធម៌ជាបន្តបន្ទាប់របស់ទីក្រុងអ៊ីស្លាម៉ាបាដក្នុងរឿងនេះ។

សេចក្តីថ្លែងការណ៍បានបន្ថែមថា ភាគីទាំងពីរបានបញ្ជាក់ជាថ្មីនូវការប្តេជ្ញាចិត្តរបស់ពួកគេក្នុងការរក្សាការសម្របសម្រួលយ៉ាងជិតស្និទ្ធលើបញ្ហាក្នុងតំបន់៕

ដោយ៖ មូល មិនា (ប្រភព៖ ស៊ីនហួ)