AKP ភ្នំពេញ ថ្ងៃទី៨ ខែឧសភា ឆ្នាំ២០២៦--នៅទីស្តីការក្រសួង លោកជំទាវបណ្ឌិត គឹម សេដ្ឋានី រដ្ឋមន្ត្រីស្ដីទីក្រសួងអប់រំ យុវជន និងកីឡា នារសៀលថ្ងៃទី០៧ ខែឧសភា ឆ្នាំ២០២៦ បានទទួលជួបពិភាក្សាការងារជាមួយតំណាងគ្រឹះស្ថានបោះពុម្ពផ្សាយនៃសាកលវិទ្យាល័យ Oxford (OUP) ក្រោមការសម្របសម្រួលពី ឯកឧត្តម Dominic Williams ឯកអគ្គរាជទូតចក្រភពអង់គ្លេស ប្រចាំព្រះរាជាណាចក្រកម្ពុជា។

ក្នុងជំនួបនេះមានការបង្ហាញពីគំនិតផ្តួចផ្តើមអប់រំអន្តរជាតិ ដោយតំណាងសាកលវិទ្យាល័យ Oxford (OUP) បានបង្ហាញជូនក្រសួងនូវកម្មវិធី «International Education Initiative» ដែលជាផែនការយុទ្ធសាស្ត្រក្នុងការលើកកម្ពស់គុណភាពអប់រំកម្រិតសកល។ ការទទួលស្គាល់សញ្ញាបត្រ OxfordAQA ដោយភាគីទាំងពីរបានពិភាក្សាលម្អិតអំពីលទ្ធភាព និងយន្តការក្នុងការទទួលស្គាល់សញ្ញាបត្រ OxfordAQA (រួមមានកម្រិត International GCSEs និង A-Level) នៅក្នុងព្រះរាជាណាចក្រកម្ពុជា។ សញ្ញាបត្រនេះ ត្រូវបានបង្កើតឡើងក្រោមក្របខណ្ឌកិច្ចសហការរវាង OUP និង AQA ដែលជាស្ថាប័នប្រឡងដ៏ធំបំផុតនៅចក្រភពអង់គ្លេស។

តាងនាមក្រសួងអប់រំ យុវជន និងកីឡា លោកជំទាវបណ្ឌិត រដ្ឋមន្ត្រីស្ដីទីបានថ្លែងអំណរគុណយ៉ាងជ្រាលជ្រៅដល់ស្ថានទូតអង់គ្លេសសម្រាប់ការគាំទ្រ ក្នុងការអភិវឌ្ឍន៍គុណភាពអប់រំនៅកម្ពុជានាពេលកន្លងមក និងសូមវាយតម្លៃខ្ពស់ចំពោះការធ្វើបទបង្ហាញរបស់ក្រុមការងារជំនាញលើកិច្ចការនេះ។

បច្ចុប្បន្ន កម្មវិធីអន្តរជាតិ Oxford (Oxford International Program) បាន និងកំពុងរីកចម្រើនយ៉ាងឆាប់រហ័ស ដោយបានពង្រីកវត្តមានរហូតដល់១២ បរិវេណសាលា (12 Campuses) និងផ្តល់សេវាអប់រំដល់សិស្សានុសិស្សជាង៣.០០០នាក់។ ចំណុចទាំងនេះបានសបញ្ជាក់ពីតម្រូវការខ្ពស់របស់សិស្សានុ សិស្សកម្ពុជាចំពោះការអប់រំដែលមានស្ដង់ដារទទួលស្គាល់ជាសកល ជាពិសេសប្រព័ន្ធអប់រំនៃចក្រភពអង់គ្លេស។ ផ្អែកលើមូលដ្ឋាននេះ ក្រសួងអប់រំ យុវជន និងកីឡានឹងបន្តពិនិត្យលើសំណើកិច្ចសហការឱ្យបានលម្អិតបន្ថែមទៀត ដើម្បីធានាឱ្យបានថា ការអនុវត្តន៍កម្មវិធីសិក្សា និងស្ដង់ដារគ្រូបង្រៀននៅតែបន្តរួមចំណែកដល់ការលើកកម្ពស់គុណភាពអប់រំ និងផ្តល់អត្ថប្រយោជន៍ជាអតិបរមាដល់យុវជនកម្ពុជា៕

ដោយ ចាន់ សុភឿន (ប្រភព៖ ក្រសួងអប់រំ)