AKP ភ្នំពេញ ថ្ងៃទី០១ ខែឧសភា ឆ្នាំ២០២៦ -- ក្រុមការងារមន្ទីរបរិស្ថានខេត្តកណ្ដាល សហការជាមួយរដ្ឋបាលស្រុកអង្គស្នួល និងអាជ្ញាធរមូលដ្ឋាន បានចុះពិនិត្យទីតាំងសិប្បកម្មស្លរចម្រាញ់យកផ្លាកទីន ដែលបង្កផលប៉ះពាល់ដល់ការរស់នៅរបស់ប្រជាពលរដ្ឋស្ថិតនៅភូមិអូរ ឃុំម្កាក់ ស្រុកអង្គស្នួល ខេត្តកណ្ដាល។

ក្រសួងបរិស្ថានបានឱ្យដឹងនៅថ្ងៃទី០១ ខែ ឧសភា ឆ្នាំ២០២៦ នេះថា បន្ទាប់ពីមានសេចក្តីរាយការណ៍របស់សារព័ត៌មានរួចមក មន្រ្តីជំនាញបានចុះពិនិត្យកាលពីថ្ងៃទី២៩ ខែមេសា ឆ្នាំ២០២៦ ដោយបានរកឃើញករណីដំណើការរបស់សិប្បកម្មមិនត្រឹមត្រូវតាមបច្ចេកទេស ដែលប៉ះពាល់បរិស្ថាន និងការរស់នៅរបស់ប្រជាពលរដ្ឋ។ នៅចំពោះមុខមន្រ្តីជំនាញ បានចាត់វិធានដូចជា៖ ១. ម្ចាស់សិប្បកម្មត្រូវផ្អាកសកម្មភាពទាំងស្រុងរហូតដល់បំពេញបែបបទនីតិវិធីច្បាប់បានរួចរាល់។

២.ត្រូវទទួលរងវិន័យអន្តរការតាមច្បាប់ករណីដំណើរការសិប្បកម្មដោយពុំមានលិខិតអនុញ្ញាត។ ៣.ម្ចាស់សិប្បកម្មត្រូវបំពាក់ឧបករណ៍ចម្រោះផ្សែង និងក្លិន ចៀសវាងប៉ះពាល់ដល់បរិស្ថាន។ ៤.ម្ចាស់សិប្បកម្មត្រូវបញ្ឈប់យកប្រេងខ្មៅយកទៅដុតដេញផ្តាច់សំណបន្តទៀត។ ៥.ម្ចាស់សិប្បកម្មត្រូវកែបច្ចេកទេសឡចម្រាញ់បន្ថែមទៀតដោយធានាមិនបង្កផលប៉ះពាល់ដល់ប្រជាពលរដ្ឋ និងបរិស្ថានជុំវិញ។

៦.ម្ចាស់សិប្បកម្មត្រូវរៀបចំកិច្ចសន្យាការពារបរិស្ថានជាមួយមន្ទីរបរិស្ថានខេត្តកណ្តាលឱ្យបានរួចរាល់ក្នុងរយៈពេល ៣០ថ្ងៃនៃថ្ងៃធ្វើការ ចាប់ពីថ្ងៃធ្វើកំណត់ហេតុនេះតទៅ។ ៧.ម្ចាស់សិប្បកម្មត្រូវគ្រប់គ្រងសំណល់ផេះធ្យូងថ្មឱ្យបានត្រឹមត្រូវ និង ៨.ម្ចាស់សិប្បកម្មត្រូវគោរព និងអនុវត្តច្បាប់ពាក់ព័ន្ធនានាឱ្យមានប្រសិទ្ធភាព៕

ដោយ៖ មករា