AKP ភ្នំពេញ ថ្ងៃ២៨ ខែមេសា ឆ្នាំ២០២៦ --

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នារសៀលថ្ងៃទី២៨ ខែមេសា ឆ្នាំ២០២៦ នេះ បានដឹកនាំប្រតិភូក្រសួងចុះសួរសុខទុក្ខ និងផ្ដល់សម្ភារៈប្រើប្រាស់ គ្រឿងឧបភោគបរិភោគ រួមនឹងថវិកាឧបត្ថម្ភដល់គណៈគ្រប់គ្រង លោកគ្រូ អ្នកគ្រូ បុគ្គលិកអប់រំ ដែលកំពុងស្នាក់នៅ និងបម្រើការងារនៅមណ្ឌលភៀសសឹកភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ។ 

នាឱកាសនោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រីបានបញ្ជាក់ពីការយល់ចំពោះការលំបាករបស់លោកគ្រូ អ្នកគ្រូ និងបងប្អូនប្រជាពលរដ្ឋដែលបានរងផលប៉ះពាល់រហូតដល់បាត់បង់ផ្ទះសម្បែង និងទ្រព្យសម្បត្តិ ដោយសារបញ្ហាជម្លោះព្រំដែននាពេលកន្លងមក។ ក្នុងន័យនេះ ឯកឧត្តមបណ្ឌិតសភាចារ្យបានគូសបញ្ជាក់ថា ការគាំទ្រវិស័យអប់រំទោះស្ថិតក្នុងស្ថានភាពបណ្ដោះអាសន្ន ប៉ុន្តែការសិក្សារបស់សិស្សានុសិស្សត្រូវតែបន្ត។ ឯកឧត្តមបានណែនាំឱ្យក្រុមការងារពិនិត្យលទ្ធភាពរៀបចំបណ្ណាល័យបណ្តោះអាសន្ន ដើម្បីផ្ដល់ឱកាសឱ្យកុមារបានអាន និងសិក្សាបន្ថែម។ ចំពោះសុខុមាលភាពសិស្ស និងគ្រូ ឯកឧត្តមបានជំរុញឱ្យមានការរៀបចំអាហារដ្ឋានសម្រាប់ផ្ដល់អាហារពេលព្រឹកដល់លោកគ្រូ អ្នកគ្រូ និងសិស្សានុសិស្ស ដើម្បីធានានិរន្តរភាពនៃការរៀន និងបង្រៀនឱ្យបានរលូន។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកទឹកចិត្តដល់លោកគ្រូ អ្នកគ្រូ ឱ្យបន្តរក្សាស្មារតីរឹងមាំ និងយកចិត្តទុកដាក់បង្រៀនសិស្សានុសិស្សក្នុងកាលៈទេសៈដ៏លំបាកនេះ ដើម្បីធានាថា បុត្រធីតារបស់បងប្អូនប្រជាពលរដ្ឋនៅតែទទួលបានចំណេះដឹងជាមូលដ្ឋានគ្រឹះសម្រាប់អនាគត៕ 

ដោយ៖ ចាន់ សុភឿន (ប្រភព៖ ក្រសួងអប់រំ យុវជន និងកីឡា)