AKP ភ្នំពេញ ថ្ងៃទី២៨ ខែមេសា ឆ្នាំ២០២៦ -- យោងតាមក្រសួងដឹកជញ្ជូនរបស់ប្រទេសចិន បានឱ្យដឹងថា ប្រទេសចិនបានបង្កើតហេដ្ឋារចនាសម្ព័ន្ធសុវត្ថិភាព និងគាំទ្រផ្លូវសមុទ្រដ៏ទូលំទូលាយបំផុតមួយរបស់ពិភពលោក ដោយបង្កើតបណ្តាញជំនួយនាវាចរណ៍ពេញលេញមួយដែលគ្របដណ្តប់លើកំពង់ផែឆ្នេរសមុទ្រ និងផ្លូវដឹកជញ្ជូន។

នៅក្នុងត្រីមាសទីមួយនៃឆ្នាំនេះ កំពង់ផែឆ្នេរសមុទ្រ និងផ្លូវគោករបស់ប្រទេសចិនបានដោះស្រាយការហៅចូលនាវាចំនួន ៨,១១លានគ្រឿង និងទំនិញចំនួន ៤,៧៩៥ប៊ីលានតោន ដែលកើនឡើង ៦,៥៧% និង ២១,៧២% រៀងៗខ្លួន។

នៅពីក្រោយបណ្តាញដឹកជញ្ជូនដ៏មមាញឹកនេះ មានប្រព័ន្ធគាំទ្រយ៉ាងទូលំទូលាយដូចគ្នា។ «សេវាកម្មសុវត្ថិភាព និងគាំទ្រផ្លូវសមុទ្រ ផ្តល់ការគាំទ្របច្ចេកទេសសម្រាប់សកម្មភាពផ្លូវទឹកតាមរយៈព័ត៌មានភូមិសាស្ត្រលំហជំនួយនាវាចរណ៍ ការទំនាក់ទំនង និងការចាប់សញ្ញាបរិស្ថាន ដែលធានាសុវត្ថិភាពនាវា បង្កើនប្រសិទ្ធភាពដឹកជញ្ជូន និងគាំទ្រដល់ការអភិវឌ្ឍសេដ្ឋកិច្ចផ្លូវសមុទ្រ»។ នេះបើយោងតាមការពន្យល់របស់មន្ត្រីម្នាក់មកពីរដ្ឋបាលសុវត្ថិភាពផ្លូវសមុទ្រ (MSA) នៃក្រសួងដឹកជញ្ជូន។ ការគាំទ្រផ្លូវសមុទ្របម្រើជា «អ្នកការពារ» សុវត្ថិភាពនាវាចរណ៍។

នៅក្នុងសមុទ្រចិនខាងត្បូង ឧបករណ៍ជំនួយរុករកទាំងអស់នៅក្នុងដែនទឹកសានសាត្រូវបានបំពាក់ដោយប្រព័ន្ធផ្កាយរណបរុករក BeiDou សម្រាប់ការត្រួតពិនិត្យ និងការគ្រប់គ្រងពីចម្ងាយ ដែលជួយធានាបាននូវការឆ្លងកាត់ដោយសុវត្ថិភាពនៃនាវាជាង ១០០.០០០គ្រឿងជារៀងរាល់ឆ្នាំ។

នៅក្នុងសមុទ្រចិនខាងកើត ផែនទីសមុទ្រអេឡិចត្រូនិកដំបូងរបស់ប្រទេសចិនដែលឧទ្ទិសដល់ការនេសាទ ត្រូវបានដាក់ឱ្យដំណើរការកាលពីចុងឆ្នាំមុន ដោយរួមបញ្ចូលនូវព័ត៌មានសំខាន់ៗដូចជា តំបន់ដែលមានហានិភ័យខ្ពស់សម្រាប់ការប៉ះទង្គិចគ្នារវាងនាវាពាណិជ្ជកម្ម និងនាវានេសាទនិងផ្លូវដឹកជញ្ជូនតាមឆ្នេរសមុទ្រខាងជើង-ខាងត្បូងសំខាន់ៗ ដោយជួយបង្កើនសុវត្ថិភាពក្នុងប្រតិបត្តិការនេសាទសមុទ្រ៕

ដោយ៖ យា ចិន្ដាខន្ដី (ប្រភព៖ BRNN)