AKP ត្បូងឃ្មុំ ថ្ងៃទី២៨ ខែមេសា ឆ្នាំ២០២៦--ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ បានអញ្ជើញជាអធិបតីក្នុងពិធីសម្ពោធឆ្លងឧបដ្ឋានសាលា កុដិ និងសមិទ្ធផលនានា នៅក្នុងវត្តសិរីគង្គា ហៅវត្តបឹងព្រួល ស្ថិតក្នុងឃុំបឹងព្រួល ស្រុកត្បូងឃ្មុំ កាលពីថ្ងៃទី២៧ ខែមេសា ឆ្នាំ២០២៦ ដោយមានការនិមន្តចូលរួមពីសំណាក់ព្រះសទ្ធាភិញាណ វ៉ាន ដាវី ព្រះរាជាគណៈថ្នាក់កិត្តិយស ព្រះធម្មធរគណខេត្ត និងជាព្រះមធុរធម្មរង្សី ព្រះអនុគណស្រុកត្បូងឃ្មុំ រួមនិងព្រះមន្រ្តីសង្ឃ ព្រមទាំងមានការអមដំណើរដោយឯកឧត្តម លោកជំទាវ អភិបាលរងខេត្ត មន្ត្រីរាជការ កងកម្លាំងប្រដាប់អាវុធ និងប្រជាពុទ្ធបរិស័ទយ៉ាងកុះករ។ ជាពិសេស ក៏មានវត្តមានរបស់បងប្អូនសាសនិកឥស្លាម ដែលបានចូលរួមក្នុងពិធីនេះយ៉ាងច្រើនកុះករ ដោយបង្ហាញឱ្យឃើញពីសាមគ្គីភាព និងសុខដុមនីយកម្មសាសនាយ៉ាងស្អិតរមួតនៅក្នុងមូលដ្ឋាន។

យោងតាមរបាយការណ៍របស់លោក សេង សុខខឿន អភិបាលស្រុកត្បូងឃ្មុំ បានឱ្យដឹងថា វត្តសិរីគង្គា ដែលមានអាយុកាល ៤៥ឆ្នាំ (កសាងតាំងពីឆ្នាំ១៩៨១) បានសម្រេចនូវសមិទ្ធផលថ្មីៗជាច្រើនរួមមាន៖ ឧបដ្ឋានសាលា កុដិថ្មពីរជាន់ របង ក្លោងទ្វារ ព្រះស្តូប ចេតិយ និងហេដ្ឋារចនាសម្ព័ន្ធនានាជុំវិញវត្ត។ សមិទ្ធផលទាំងនេះ ចំណាយថវិកាសរុបអស់ចំនួន ២៤៦,៦៤២ ដុល្លារអាមេរិក ដែលបានមកពីសទ្ធាជ្រះថ្លារបស់ ឯកឧត្តម គន់ គីម និងលោកជំទាវ ចំនួន ៨,០០០ដុល្លារ រួមជាមួយសប្បុរសជន និងពុទ្ធបរិស័ទជិតឆ្ងាយ។

ក្នុងឱកាសនេះ ឯកឧត្តម ប៉ែន កុសល្យ អភិបាលខេត្តត្បូងឃ្មុំ បានមានប្រសាសន៍ថា សមិទ្ធផលទាំងនេះ បានកើតឡើង ដោយមានការចូលរួមចំណែកពីពុទ្ធបរិស័ទ និងសប្បុរសជន ពីទីជិតឆ្ងាយ ក្រោមការជឿជាក់ និងការដឹកនាំ របស់ព្រះចៅអធិការ ជាពិសេស ភាពឆ្លាវៃ របស់ព្រះចៅអធិការ និងគណៈកម្មការ អាចារ្យវត្ត ក្នុងការកៀគរថវិកា ពីសប្បុរសជន ក៏ដូចជាពុទ្ធបរិស័ទជិតឆ្ងាយ ដើម្បី ដោះស្រាយការងារប្រចាំថ្ងៃ និងការអភិវឌ្ឍទីអារាមរបស់ខ្លួន ពោលគឺ វត្តអារាមនីមួយៗ ពុំមានប្រាក់ចំណូលប្រចាំថ្ងៃ ដើម្បីយកមកផ្គត់ផ្គង់ព្រះសង្ឃ ក៏ដូចជា កិច្ចការមួយចំនួនទៀត រួមទាំង ការកសាងសមិទ្ធផលនានា នៅក្នុងវត្តបានឡើយ។

ឯកឧត្តមអភិបាលខេត្តបានគូសបញ្ជាក់ថា យើងបានសម្ពោធឆ្លងឧបដ្ឋានសាលា កុដិ និងសមិទ្ធផលនានាមួយចំនួនទៀត ហើយនាថ្ងៃខាងមុខ យើងនឹងមានកសាងនូវសមិទ្ធ ជាបន្តបន្ទាប់ទៀត ពោលគឺអាស្រ័យទៅលើធនធានដែលយើងមានផងដែរ។ ដូច្នេះ ការកសាងសមិទ្ធផលនៅទីនេះ ត្រូវទាមទារឱ្យមានការចូលរួមចំណែក ពីពុទ្ធបរិស័ទ ក៏ដូចជា សប្បុរសជន ជាប្រចាំ និងតាមកម្លាំងសទ្ធាជ្រះថ្លា ដើម្បីលើកកម្ពស់តម្លៃនៃវិស័យព្រះពុទ្ធសាសនាឱ្យថ្កុំថ្កើងរុងរឿង ទ្វេឡើងថែមទៀត។

ក្រៅពីការងារសាសនា ឯកឧត្តមអភិបាលខេត្តក៏បានឆ្លៀតឱកាសផ្ដាំផ្ញើ និងក្រើនរម្លឹកដល់អាជ្ញាធរស្រុក-ឃុំ ត្រូវបន្តយកចិត្តទុកដាក់ដោះស្រាយបញ្ហាប្រឈម និងសំណូមពររបស់ពលរដ្ឋឱ្យបានទាន់ពេលវេលា។ ជាពិសេស ត្រូវរឹតបន្តឹងការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ដោយផ្តោតសំខាន់លើការបង្ក្រាបគ្រឿងញៀន និងក្មេងទំនើង ដើម្បីធានាឱ្យបាននូវសន្តិសុខ សណ្ដាប់ធ្នាប់ និងភាពសុខសាន្តជូនប្រជាពលរដ្ឋក្នុងមូលដ្ឋានទាំងមូល៕

ដោយ AKP