AKP កំពង់ធំ ថ្ងៃទី២៥ ខែមេសា ឆ្នាំ២០២៦--

ក្រសួងទេសចរណ៍ និងរដ្ឋបាលខេត្តកំពង់ធំ បានរៀបចំកិច្ចប្រជុំពិភាក្សាលម្អិតលើកទីពីរស្តីពីព្រឹត្តិការណ៍ជិះកង់ និងរត់ឆ្លងឧបសគ្គ "ផ្លូវឆ្ពោះទៅរាជធានីឥសានបុរៈចេនឡាមុនសម័យអង្គរ" ប្រាសាទសំបូរព្រៃគុក ជាមួយមន្ទីរអង្គភាពពាក់ព័ន្ធនានាជុំវិញខេត្ត កាលពីរសៀលថ្ងៃទី២៤ ខែមេសា ឆ្នាំ២០២៦ នៅសាលប្រជុំមន្ទីរទេសចរណ៍ខេត្តកំពង់ធំ។

ឯកឧត្តម វ៉ាហេង ដាវុធ រដ្ឋលេខាធិការក្រសួងទេសចរណ៍ បានបញ្ជាក់ថា យើងប្រជុំគ្នាថ្ងៃនេះក្នុងគោលបំណងដើម្បីឱ្យប្រាកដថាមន្ទីរពាក់ព័ន្ធ កងកម្លាំងទាំងបីបានសហការជាមួយគ្នានឹងមានផែនការរួចរាល់សំរាប់ព្រឹត្តិការណ៍ដ៏មានសារៈសំខាន់នេះ ពិសេសមន្ទីរទេសចរណ៍ខេត្ត មន្ទីរវប្បធម៌ខេត្ត និងអាជ្ញាធរសំបូរព្រៃគុក។

ឯកឧត្តមរដ្ឋលេខាធិការបានបន្តថាយើងនឹងមានកិច្ចប្រជុំពិភាក្សាលើកទី៣នៅថ្ងៃទី១៦ ខែឧសភា ឆ្នាំ២០២៦ ដើម្បីផ្ទៀងផ្ទាត់និងវាយតម្លៃលើផែនការលម្អិតចុងក្រោយសំរាប់ភារកិច្ចនិងការទទួលខុសត្រូវរបស់ជំនាញ អាជ្ញាធរទាំងអស់ដើម្បីធ្វើឱ្យប្រាកដថាព្រឹត្តិការណ៍នេះនឹងដំណើរការដោយរលូន។

លោក ហាន កុសល អភិបាលរងខេត្ត បានលើកឡើងថា ការរៀបចំព្រឹត្តិការណ៍ជិះកង់និងរត់ឆ្លងឧបសគ្គនេះក្នុងគោលបំណងដើម្បីបង្ហាញពីការរួបរួមសាមគ្គីគ្នាជាប្រជាជាតិតែមួយ ព្រមទាំងលើកទឹកចិត្តដល់ប្រជាពលរដ្ឋទាំងអស់ចូលរួមឱ្យបានច្រើនកុះករ ដើម្បីជាតិមាតុភូមិ ដើម្បីសុខភាពព្រមទាំងលើកទឹកចិត្តដល់វីរកងទ័ពនៅសមរភូមិមុខក្នុងការការពារដែនអធិបតេយ្យភាពកម្ពុជា។

ឯកឧត្តម វ៉ាហេង ដាវុធ សង្ឃឹមថា មហាព្រឹត្តិការណ៍នេះនឹងទទួលបានការគាំទ្រពីគ្រប់ទិសទីទាំងអស់ពិសេសប្រព័ន្ធផ្សព្វផ្សាយដែលជាផ្នែកមួយយ៉ាងសំខាន់ក្នុងការបង្កើតឱ្យមានភាពទាក់ទាញល្បីល្បាញ និងកំណើនទេសចរណ៍ក៏ដូចជាជួយដល់ជីវភាពរស់នៅរបស់ប្រជាពលរដ្ឋកាន់តែប្រសើរឡើង។ 

សូមបញ្ជាក់ថា ព្រឹត្តិការណ៍ជិះកង់ និងរត់ឆ្លងឧបសគ្គ មានឈ្មោះថា "ផ្លូវឆ្ពោះទៅរាជធានីឥសានបុរៈចេនឡាមុនសម័យអង្គរ" ប្រព្រឹត្តទៅនៅថ្ងៃទី០៥ ខែកក្កដា ឆ្នាំ២០២៦ខាងមុខនេះដែលមានអ្នកចូលរួមរាប់ពាន់នាក់ ដោយធ្វើដំណើរពីស្ពានចាស់ក្នុងទីរួមខេត្តកំពង់ធំឆ្ពោះទៅរមណីយដ្ឋានប្រាសាទសំបូរព្រៃគុក៕

ដោយ ស៊ុម វណ្ណា