AKP ភ្នំពេញ ថ្ងៃទី២៣ ខែមេសា ឆ្នាំ២០២៦ -- ការបោសសម្អាតមីនចេញពីច្រកសមុទ្រហ័រមុស (Hormuz) អាចចំណាយពេលរហូតដល់ប្រាំមួយខែហើយទំនងជាមិនចាប់ផ្តើមរហូតដល់សង្គ្រាមរវាងសហរដ្ឋអាមេរិកជាមួយអ៊ីរ៉ង់បញ្ចប់ជាផ្លូវការនោះទេ។ នេះបើយោងតាមការចុះផ្សាយរបស់កាសែតវ៉ាស៊ីនតោនប៉ុស្តិ៍កាលពីថ្ងៃពុធ ដោយដកស្រង់សម្តីមន្ត្រីដែលដឹងពីសេចក្តីសង្ខេបសម្ងាត់របស់មន្ទីរបញ្ចកោណផ្ញើទៅកាន់សភា។

អ្នកតាក់តែងច្បាប់ត្រូវបានគេប្រាប់ថា អ៊ីរ៉ង់ប្រហែលជាបានដាក់មីនចំនួន ២០គ្រាប់ ឬច្រើនជាងនេះនៅក្នុង និងជុំវិញច្រកផ្លូវទឹកនោះ ដោយខ្លះត្រូវបានដាក់ពង្រាយពីចម្ងាយដោយប្រើបច្ចេកវិទ្យា GPS ដែលធ្វើឱ្យការរុករកមានការពិបាក។ នេះបើយោងតាមការចុះផ្សាយរបស់សារព័ត៌មាននោះ។

ការវាយតម្លៃនេះបានធ្វើឱ្យអ្នកតាក់តែងច្បាប់ប្រជាធិបតេយ្យ និងសាធារណរដ្ឋខកចិត្ត ព្រោះវាបង្ហាញថា ផលប៉ះពាល់សេដ្ឋកិច្ចនៃជម្លោះ រួមទាំងតម្លៃប្រេង និងសាំងកើនឡើង អាចបន្តរហូតដល់ដាច់ឆ្នាំនេះ។

ការជជែកវែកញែកអំពីមីននៅក្នុងច្រកសមុទ្រហ័រមុសមិនមែនជារឿងថ្មីនោះទេ។ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានស្នើឱ្យអ៊ីរ៉ង់ដកមីនចេញ ហើយថា «ឧបករណ៍ទម្លាក់មីន»របស់អ៊ីរ៉ង់ភាគច្រើនត្រូវបានបំផ្លាញនៅក្នុងការវាយប្រហាររបស់សហរដ្ឋអាមេរិក។ អ៊ីរ៉ង់បានបដិសេធការដាក់មីននៅក្នុងច្រកផ្លូវទឹកនេះដោយបានហៅការចោទប្រកាន់នោះថា ជាការឃោសនារបស់សហរដ្ឋអាមេរិក បើទោះបីជាប្រព័ន្ធផ្សព្វផ្សាយអ៊ីរ៉ង់បានរាយការណ៍ថា កងឆ្មាំបដិវត្តន៍អ៊ីស្លាមបានចេញផែនទីឆ្លងកាត់សុវត្ថិភាពនៅក្នុងតំបន់នោះក៏ដោយ។

របាយការណ៍​អំពី​ការ​ដាក់​មីន​របស់​អ៊ីរ៉ង់​នៅ​ក្នុង​ច្រក​សមុទ្រ​បាន​លេច​ចេញ​ជា​លើក​ដំបូង​នៅ​ដើម​ខែ​មីនា ដោយ​មន្ត្រី​អាម៉េរិក​បាន​លើក​ឡើង​ថាទូក​តូចៗ​ត្រូវ​បាន​ប្រើ​សម្រាប់​ដាក់​ពង្រាយ​បន្ទាប់​ពី​នាវា​ធំៗ​ត្រូវ​បាន​លិច។

មន្ទីរបញ្ចកោណ​មិន​បាន​ឆ្លើយ​តប​នឹង​សំណួរ​របស់​អ្នកសារព័ត៌មានទេដោយទីបញ្ជាការ​កណ្តាល​អាម៉េរិក​បាន​បដិសេធ​មិន​ធ្វើ​អត្ថាធិប្បាយហើយ​សេតវិមាន​បាន​បញ្ជូន​ការ​សាកសួរ​ទៅកាន់​មន្ទីរបញ្ចកោណវិញ៕

ដោយ៖ យា ចិន្ដាខន្ដី (ប្រភព៖ AA-AKP)