AKP ភ្នំពេញ ថ្ងៃទី២៣ ខែមេសា ឆ្នាំ២០២៦–«ខ្ញុំព្រះករុណា ខ្ញុំសូមគូសបញ្ជាក់ប្រកបដោយ មោទនភាពថា ព្រះរាជាណាចក្រកម្ពុជា គឺជាប្រទេសដំបូងគេនៅក្នុងចំណោមប្រទេសស្ថិតនៅមហាអនុតំបន់ទន្លេមេគង្គ ដែលសម្រេចបាននូវគោលដៅផែនការយុទ្ធសាស្ត្រជាតិលុបបំបាត់ជំងឺគ្រុនចាញ់តាមផែនការ»។ នេះជាការគូសបញ្ជាក់របស់ សម្ដេចធិបតី។

យោងតាមសារលិខិត ក្នុងឱកាសប្រារព្ធទិវាជាតិប្រយុទ្ធនឹងជំងឺគ្រុនចាញ់ ក្រោមប្រធានបទ “ប្តេជ្ញាបញ្ចប់ជំងឺគ្រុនចាញ់៖ ឥឡូវនេះ យើងអាចធ្វើបាន និងយើងត្រូវតែធ្វើ” ផ្ញើជូនជនរួមជាតិ នាថ្ងៃទី២៣ ខែមេសា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា សមិទ្ធផលដ៏ ត្រចះត្រចង់នេះ ពិតជាគំរូមេរៀនដ៏ល្អមួយនៃជំហានដំបូងរបស់ផែនការយុទ្ធសាស្ត្រជាតិ ជាត្រីវិស័យច្បាស់លាស់ ត្រឹមត្រូវ ដែលយើងត្រូវបន្តដំណើរដ៏វែងឆ្ងាយទៀតប្រកបដោយស្ថិរភាព ប្រសិទ្ធភាព ស័ក្តិសិទ្ធិភាព សមធម៌ និង បរិយាបន្ន ក្នុងបរិបទបច្ចេកវិទ្យាឌីជីថល ក្រោមឥរិយាបថទទួលខុសត្រូវខ្ពស់ក្នុងឆន្ទៈប្តេជ្ញារួមគ្នាបង្ការ ទប់ស្កាត់ និង ធានាថាជំងឺគ្រុនចាញ់នឹងមិនកើតមានក្នុងប្រទេសកម្ពុជាឡើងវិញ គិតចាប់ពីឆ្នាំ២០២៦-២០៣៥ ព្រមទាំងបង្ការ ទប់ស្កាត់ទាន់ពេលវេលានៃការរីករាលដាលជំងឺគ្រុនចាញ់នាំចូលពីបណ្តាប្រទេសផ្សេងទៀត ដែលនៅមានជំងឺគ្រុនចាញ់នៅឡើយ។

ក្នុងសារលិខិតនេះ  បានបង្កប់ខ្លឹមសារបន្ថែមថា ជានិរន្តរ! យើងប្តេជ្ញាថែរក្សាសមិទ្ធផល “កម្ពុជាគ្មានជំងឺគ្រុនចាញ់” ដែលជាជោគជ័យជាប្រវត្តិសាស្ត្រឱ្យនៅស្ថិតស្ថេរ

ប្រធានបទនៃទិវាគ្រុនចាញ់ពិភពលោក និងទិវាជាតិប្រយុទ្ធនឹងជំងឺគ្រុនចាញ់ ថ្ងៃទី២៥ ខែមេសា ឆ្នាំ២០២៦ និងសមិទ្ធផលដែលព្រះរាជាណាចក្រកម្ពុជាសម្រេចបាននាពេលនេះ ពិតជាបានឆ្លុះបញ្ចាំង និងបង្ហាញឱ្យឃើញ យ៉ាងច្បាស់ថា ការលុបបំបាត់ជំងឺគ្រុនចាញ់ គឺយើងពិតជាអាចធ្វើបាន និងត្រូវតែធ្វើទាំងអស់គ្នា ទាំងបុគ្គល គ្រួសារ និងសហគមន៍នៅគ្រប់កម្រិត ព្រមទាំងការសហការពីគ្រប់ភាគី ទាំងកម្រិតជាតិនិងអន្តរជាតិ។ ទន្ទឹមនេះ តួនាទីចម្បង របស់យើងទាំងអស់គ្នា គឺត្រូវតែការពារខ្លួនយើងកុំឱ្យសត្វមូសខាំ និងរួសរាន់ស្វែងរកសេវាពិនិត្យពិគ្រោះសុខភាពដែល នៅជិតបំផុត បើសង្ស័យថាអាចទទួលការចម្លងជំងឺគ្រុនចាញ់បន្ទាប់ពីបានស្នាក់នៅក្នុងភូមិសាស្ត្រមានការចម្លងជំងឺ គ្រុនចាញ់។ ការបញ្ចប់ជំងឺគ្រុនចាញ់ ត្រូវតែជាគោលដៅរួមគ្នាតែមួយ សម្រាប់បង្ការខ្លួនយើងគ្រប់ៗរូប បង្ការគ្រួសារ គ្រប់ៗគ្នា និងបង្កើនជីវភាពគ្រួសារនិងសេដ្ឋកិច្ចសង្គម។

ស្របពេលជាមួយគ្នានេះ សម្ដេចធិបតី បានឧទ្ទិសខ្លឹមសារ និងអត្ថន័យនៃទិវាជាតិប្រយុទ្ធនឹងជំងឺគ្រុនចាញ់ ក្រោមប្រធានបទ “ប្តេជ្ញាបញ្ចប់ជំងឺគ្រុនចាញ់៖ ឥឡូវនេះ យើងអាចធ្វើបាន និងយើងត្រូវតែធ្វើ” ស្ថិតនៅជាស្មារតី និងការប្តេជ្ញាចិត្តរបស់ប្រជាពលរដ្ឋម្នាក់ៗ តាមរយៈការរួមសាមគ្គី និងការខិតខំប្រឹងប្រែងរួមគ្នាពីគ្រប់ភាគីពាក់ព័ន្ធ ដើម្បីកម្ពុជាអាចបន្តថែរក្សាសមិទ្ធផលសម្រេចបានប្រកបដោយចីរភាព និងសូមឱ្យការចូលរួមរបស់ប្រជាពលរដ្ឋគ្រប់រូប ក្លាយជាកម្លាំងដ៏សំខាន់ក្នុងការការពារសុខភាពសាធារណៈដែលនឹងរួមចំណែកដល់ការអភិវឌ្ឍប្រទេសជាតិ ក៏ដូចជា ឧត្តមប្រយោជន៍ជាតិមាតុភូមិរបស់យើង។

សូមរម្លឹកជូនថា ឆ្នាំ២០២៥ កន្លងមកនេះ ព្រះរាជាណាចក្រកម្ពុជា បានបោះជំហានទៅមុខគួរជាទីមោទនៈ និងអបអរសាទរ ក្រៃលែង ដោយសម្រេចបានយ៉ាងពេញលេញលើគ្រប់គោលដៅគន្លឹះរបស់ “ផែនការយុទ្ធសាស្ត្រជាតិលុបបំបាត់ជំងឺ គ្រុនចាញ់ក្នុងព្រះរាជាណាចក្រកម្ពុជាឆ្នាំ២០១១-២០២៥” ជាលទ្ធផលមិនមានករណីឆ្លងជំងឺគ្រុនចាញ់ថ្មីក្នុងប្រទេស កម្ពុជានោះទេ គិតចាប់ពីត្រីមាសទី៤ ឆ្នាំ២០២៥ ព្រមទាំងមិនមានករណីស្លាប់ដោយសារជំងឺគ្រុនចាញ់ រាប់ចាប់ពី ឆ្នាំ២០១៨ រហូតមកដល់បច្ចុប្បន្ន។ សមិទ្ធផលជោគជ័យនេះ បានបង្ហាញយ៉ាងច្បាស់ពីការចូលរួមអនុវត្តភារកិច្ច យ៉ាងសកម្មប្រកបដោយសមត្ថភាព ការប្តេជ្ញាចិត្ត និងការទទួលខុសត្រូវខ្ពស់របស់យើងទាំងអស់គ្នា ដែលសម្ដេចធិបតី សូមសម្តែងនូវការកោតសរសើរដោយស្មោះដល់ថ្នាក់ដឹកនាំ មន្ត្រីរាជការ បុគ្គលិកនៅគ្រប់កម្រិតនៃក្រសួងសុខាភិបាល មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ ក្រសួង ស្ថាប័ន អង្គភាពពាក់ព័ន្ធ អាជ្ញាធរមូលដ្ឋាន អ្នកស្ម័គ្រចិត្តភូមិ ប្រជាជនគ្រប់រូបតាមសហគមន៍ ព្រមទាំងដៃគូវិនិយោគ ទាំងជាតិនិងអន្តរជាតិ ដែលបានចូលរួមបំពេញការងារ និងគាំទ្រផែនការយុទ្ធសាស្ត្រជាតិរហូតសម្រេចបានសមិទ្ធផលជាប្រវត្តិសាស្ត្រនេះ៕

ដោយ៖ គង់ សិរីរ័ត្ន