AKP សៀមរាប ថ្ងៃទី២២ ខែមេសា ឆ្នាំ២០២៦--កម្លាំងប្រជាការពារសណ្តាប់ធ្នាប់សាធារណៈរបស់រដ្ឋបាលក្រុងសៀមរាបខេត្តសៀមរាបចំនួន៣០នាក់ កាលពីរសៀលថ្ងៃទី២១ ខែមេសា ឆ្នាំ២០២៦ បានទទួលអំណោយជាគ្រឿងឧបភោគបរិភោគ និងសម្ភារប្រើប្រាស់ ពីព្រះចៅអធិការវត្តប្រាសាទគោកចក និងអាជ្ញាធរក្រុងសៀមរាប ដើម្បីលើកទឹកចិត្តដល់ពួកគាត់ ក្នុងការចូលរួមរៀបចំសណ្តាប់ធ្នាប់សាធារណៈក្នុងក្រុងសៀមរាបក្នុងពិធីបុណ្យចូលឆ្នាំថ្មីប្រពៃណីជាតិខ្មែរកន្លងមកនេះ។

ព្រះគ្រូវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក មានថេរដីកាថា ការចែកជូនគ្រឿងឧបភោគបរិភោគ និងសម្ភារប្រើប្រាស់នាពេលនេះ គឺជាការបង្ហាញពីការយកចិត្តទុកដាក់ និងអរគុណរបស់ព្រះសង្ឃ និងអាជ្ញាធរក្រុង ជូនដល់កម្លាំងបងប្អូនប្រជាការពាររៀបចំសណ្តាប់ធ្នាប់ ដែលជាកម្លាំងដ៏សំខាន់ដែលបានលះបង់ទាំងកម្លាំងកាយកម្លាំងចិត្តពេលវេលាដើម្បីចូលរួមការងារសង្គមនិងជួយសម្រួលដល់ការលំបាកក្នុងការបំពេញការងារ ក្នុងការការពារសន្តិសុខ សុវត្ថិភាព និងសណ្តាប់ធ្នាប់ក្នុងមូលដ្ឋាន។

លោក ហាយ យង់ អភិបាលរងក្រុងសៀមរាបក៏បានកោតសសើរចំពោះការលះបង់ កម្លាំងកាយចិត្ត និងពេលវេលាដ៏មានតម្លៃរបស់បងប្អូនកម្លាំងប្រជាការពាររៀបចំសណ្តាប់ធ្នាប់ទាំងអស់ ក្នុងការចូលរួមថែរក្សាសន្តិសុខ និងរៀបចំសណ្តាប់ធ្នាប់សាធារណៈនៅក្នុងមូលដ្ឋានរបស់យើង។

លោកបន្តថា ទោះបីជាស្ថិតក្នុងស្ថានភាពអាកាសធាតុបែបណាក៏ដោយ បងប្អូនតែងតែមានវត្តមាននៅតាមដងផ្លូវ តាមទីសាធារណៈ ដើម្បីជួយសម្រួលចរាចរណ៍ និងរៀបចំសណ្តាប់ធ្នាប់ឱ្យមានរបៀបរៀបរយហើយការចូលរួមយាមល្បាត និងតាមដានសភាពការណ៍ក្នុងភូមិ/សង្កាត់ គឺបានជួយកាត់បន្ថយបទល្មើសផ្សេងៗ និងធ្វើឱ្យប្រជាពលរដ្ឋមានភាពកក់ក្តៅក្នុងចិត្ត ដោយបងប្អូនមានស្មារតីសហការនិងបានបង្ហាញនូវសាមគ្គីភាពយ៉ាងល្អប្រសើរជាមួយអាជ្ញាធរ ក្នុងការបម្រើផលប្រយោជន៍រួមដោយមិនគិតពីការនឿយហត់។

លោកអភិបាលរងក្រុងសៀមរាបបានមានប្រសាសន៍បញ្ជាក់បន្ថែមថា ការរៀបចំសណ្តាប់ធ្នាប់សាធារណៈល្អ និងភាពសុខសាន្តរបស់ប្រជាពលរដ្ឋ គឺកើតចេញពីការចូលរួមចំណែកដោយស្ម័គ្រចិត្ត និងការទទួលខុសត្រូវខ្ពស់របស់បងប្អូនទាំងអស់គ្នា។ លោកសង្ឃឹមថា បងប្អូនកម្លាំងប្រជាការពារសណ្តាប់ធ្នាប់សាធារណៈរបស់រដ្ឋបាលក្រុងសៀមរាបនឹងបន្តស្មារតីដ៏ល្អប្រពៃនេះ ដើម្បីរួមគ្នាអភិវឌ្ឍមូលដ្ឋានរបស់យើងឱ្យកាន់តែមានសណ្តាប់ធ្នាប់ និងសុវត្ថិភាពជានិច្ចផងដែរ៕

ដោយ ឃុត សៅ