AKP ភ្នំពេញ ថ្ងៃទី២១ ខែមេសា ឆ្នាំ២០២៦--ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអះអាងថា ចាប់តាំងពីការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណដ្ឋគុយបា នាថ្ងៃទី១៥ ខែមេសា ឆ្នាំ១៩៦០ ក្រោមព្រះរាជតម្រិះផ្តួចផ្តើមរបស់ សម្តេចព្រះ នរោត្តម សីហនុ ព្រះបរមរតនកោដ្ឋ និង ឯកឧត្តម Fidel Castro អគ្គមគ្គុទេសក៏បដិវត្តន៍គុយបា ប្រទេសយើងទាំងពីរបានបន្តពង្រឹងទំនាក់ទំនង និងកិច្ចសហប្រតិបត្តិការទ្វេភាគីយ៉ាងជិតស្និទ្ធលើវិស័យនានា ដូចជា នយោបាយ អប់រំ សុខាភិបាល កីឡា និងវិស័យព័ត៌មាន។
ក្នុងឱកាសពិព័រណ៍រូបថត អបអរខួប៦៥ឆ្នាំ នៃទំនាក់ទំនងការទូត រវាងព្រះរាជាណាចក្រកម្ពុជា និងសាធារណរដ្ឋគុយបា នាថ្ងៃអង្គារ ៥កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី២១ ខែមេសា ឆ្នាំ២០២៦ នៅសាលចតុម្មុខមង្គល នៃក្រសួងព័ត៌មាន ឯកឧត្តម រដ្ឋមន្ត្រីក្រសួងព័ត៌មាន បានមានប្រសាសន៍ថា ទំនាក់ទំនងកម្ពុជា-គុយបា ត្រូវបានបង្កើតឡើងដោយឈរលើមូលដ្ឋាននៃការគោរពគ្នាទៅវិញទៅមក ការយោគយល់ និងការគាំទ្រគ្នានៅលើឆាកអន្តរជាតិ។

ឯកឧត្តម នេត្រ ភក្ត្រា បានគូសបញ្ជាក់ថា «ប្រទេសទាំងពីរមានឧត្តមគតិរួមគ្នា គឺឯករាជ្យភាព យុត្តិធម៌ និងសាមគ្គីភាពអន្តរជាតិ ដែលជាគ្រឹះសម្រាប់ភាពជាដៃគូដ៏រឹងមាំអស់រយៈពេលជាង៦ ទសវត្សរ៍មកហើយ ដោយឆ្លងកាត់ទាំងបញ្ហាប្រឈម ទាំងកាលានុវត្តភាព ការផ្លាស់ប្តូរ និងស្របតាមបំណងប្រាថ្នារបស់ប្រទេសជាតិយើងទាំងពីរ»។
បើតាម ឯកឧត្តម រដ្ឋមន្ត្រីក្រសួងព័ត៌មាន សាធារណរដ្ឋគុយបា មិនត្រឹមតែជាដៃគូសហប្រតិបត្តិការរបស់ព្រះរាជាណាចក្រកម្ពុជា ប៉ុន្តែជាមិត្តស្និទ្ធស្នាល និងស្មោះត្រង់ដែលបានឈរនៅក្បែរគ្នា ក្នុងគ្រប់កាលៈទេសៈផងដែរ។ ក្នុងគ្រាលំបាកកន្លងមក គុយបាបានផ្តល់នូវការគាំទ្រដ៏មានតម្លៃដល់វិស័យសុខាភិបាល និងការអភិវឌ្ឍធនធានមនុស្ស។ 

សកម្មភាពទាំងនេះ បានរួមចំណែកយ៉ាងសំខាន់ក្នុងការកសាង និងអភិវឌ្ឍប្រទេសកម្ពុជា។ ក្រុមគ្រូពេទ្យគុយបា បានធ្វើការជាមួយបុគ្គលិកសុខាភិបាលកម្ពុជា ដើម្បីស្តារនិងអភិវឌ្ឍប្រព័ន្ធសុខាភិបាល និងជួយសង្គ្រោះជីវិតប្រជាពលរដ្ឋជាច្រើន។ គុយបាក៏បានផ្តល់ថ្នាំពេទ្យ និងជំនួយមនុស្សធម៌ផ្សេងៗដែលមានសារៈសំខាន់យ៉ាងខ្លាំង នៅពេលដែលកម្ពុជាមានតម្រូវការយ៉ាងបន្ទាន់។ 
លើសពីនេះ គុយបាក៏បានផ្តល់នូវអាហារូបករណ៍ដល់និស្សិតកម្ពុជា ដែលបច្ចុប្បន្ននេះ និស្សិតកម្ពុជាទាំងនោះបានក្លាយជាវេជ្ជបណ្ឌិត វិស្វករ អ្នកអប់រំ និងមន្ត្រីរាជការ កំពុងជួយអភិវឌ្ឍប្រទេសជាតិ។ ក្នុងនាមរាជរដ្ឋាភិបាលកម្ពុជា និងប្រជាជនកម្ពុជា ឯកឧត្តម នេត្រ ភក្ត្រា សូមឆ្លៀតឱកាសនេះ សម្តែងនូវការដឹងគុណយ៉ាងជ្រាលជ្រៅចំពោះរដ្ឋាភិបាល និងប្រជាជនគុយបា  ចំពោះជំនួយឧបត្ថម្ភគាំទ្រនាពេលកន្លងមក និងមិត្តភាពដ៏មានតម្លៃនេះ។

លោកជំទាវ Milena Caridad Zaldívar Piedra ឯកអគ្គរដ្ឋទូតសាធារណរដ្ឋគុយបា ប្រចាំព្រះរាជាណាចក្រកម្ពុជា បានមានប្រសាសន៍ថា ចំណងមិត្តភាពរវាងប្រជាជន និងប្រជាជនដែលបានបង្កើតក្នុងរយៈពេលជាច្រើន ឆ្នាំក៏មាននៅក្នុងពិព័រណ៍រូបថតនេះផងដែរ តាមរយៈការបណ្តុះបណ្តាលធនធានមនុស្ស និងការផ្លាស់ប្តូរអន្តរសភារវាងប្រទេសទាំងពីរ។ សមាជិកសភាដែលមានភាពរួសរាយរាក់ទាក់ និងនិស្សិតបញ្ចប់ការសិក្សានៅសាកលវិទ្យាល័យគុយបា គឺជាសសរស្តម្ភដ៏សំខាន់នៃសាមគ្គីភាព ជាប្រវត្តិសាស្ត្រ គាំទ្រដល់បុព្វហេតុដ៏ត្រឹមត្រូវរបស់ប្រជាជនគុយបា និងធ្វើជាគំរូមួយ អំពីរបៀបដែលស្នេហាត្រូវបានសងវិញដោយក្តីស្រឡាញ់។ ទំនាក់ទំនងដែល មិនអាចបំបែកបាន ទាំងនេះក៏បានពង្រឹងទំនាក់ទំនងទ្វេភាគីផងដែរ។ វាជាកិត្តិយសដែលមាននៅក្នុងសាល ប្រជុំដ៏អស្ចារ្យនេះនៃអ្នកដែលបានធ្វើជាតួឯកនៃមិត្តភាពជាប្រវត្តិសាស្ត្រនេះ ហើយបន្ត បង្កើតចំណងនៃកិច្ចសហប្រតិបត្តិការសម្រាប់អនាគតនៃភាពរុងរឿងរួមគ្នា។

លោកជំទាវ ឯកអគ្គរដ្ឋទូត បានសង្កត់ធ្ងន់ថា «អស់រយៈពេលជាង៦៥ឆ្នាំមកនេះ គុយបា និងព្រះរាជាណាចក្រកម្ពុជាបានពង្រឹង ទំនាក់ទំនងពិសេស និងប្រពៃណីរបស់ពួកគេ ដោយផ្អែកលើគោលការណ៍រួមដ៏រឹងមាំ ការគោរព និងការយោគយល់គ្នាទៅវិញទៅមក និងការការពារសន្តិភាព និងហេតុផលត្រឹមត្រូវនៅក្នុង ក្របខ័ណ្ឌនៃច្បាប់អន្តរជាតិ។ ប្រជាជនគុយបានឹងដឹងគុណជានិច្ចចំពោះការគាំទ្រ ដ៏យូរអង្វែង របស់កម្ពុជាចំពោះការតស៊ូរបស់ប្រជាជនគុយបាដើម្បីការពារអធិបតេយ្យភាព និងឯករាជ្យរបស់ពួកគេ»។

ប្រទេសទាំងពីរ បានរក្សាកម្រិតខ្ពស់នៃការគាំទ្រក្នុងក្របខ័ណ្ឌនៃកិច្ចសហ ប្រតិបត្តិការ ពហុភាគីសំខាន់ៗ ដែលដឹកនាំដោយគោលការណ៍នៃការសម្រេច ចិត្ត ដោយខ្លួនឯងរបស់ប្រជាជន ការគោរពបូរណភាពទឹកដីនៃរដ្ឋ ការដោះស្រាយជម្លោះ ដោយសន្តិវិធី និងការមិនប្រើប្រាស់ កម្លាំង និងការមិនធ្វើអន្តរាគមន៍ ព្រមទាំងការគោរព ការការពារ និងការលើកកម្ពស់ សិទ្ធិមនុស្ស និងវប្បធម៌៕
ដោយ៖ គង់ សិរីរ័ត្ន, រូបថត៖ ខឹម សុវណ្ណារ៉ា