AKP កំពង់ចាម ថ្ងៃទី២០ ខែមេសា ឆ្នាំ២០២៦--ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណ:កម្មាធិការសាខាកាកបាទក្រហមកម្ពុជាខេត្ត និងក្រុមការងារ នៅព្រឹកថ្ងៃចន្ទទី២០ ខែមេសា ឆ្នាំ ២០២៦នេះបានអញ្ជើញចុះសួរសុខទុក្ខ នាំយកអំណោយមនុស្សធម៌ដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅប្រគេនព្រះសង្ឃគង់នៅវត្តជំនីក ឃុំពាមប្រធ្នោះ ស្រុកកោះសូទិន ដែលរងគ្រោះដោយអគ្គីភ័យ  មូលហេតុ ឆ្លងចរន្តអគ្គិសនី បណ្តាលឱ្យកុដិថ្មទំហំ ១២ម × ១៥ម និង ឧបដ្ឋានសាលាសង់អំពីឈើ ទំហំ ២៥ម× ២៥ម ត្រូវភ្លើងឆេះអស់ទាំងស្រុង កាលពីម៉ោង ៥ល្ងាចថ្ងៃទី ១៩ ខែមេសា  ឆ្នាំ ២០២៦។     
ក្នុងឱកាស ចុះទៅជួបផ្ទាល់ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណ:កម្មាធិការសាខាកាកបាទក្រហមកម្ពុជាខេត្ត បានសម្តែងការសោកស្តាយជាពន់ពេក ជាមួយព្រះចៅអធិការ និងគណៈកម្មការ អាចារ្យវត្ត ចំពោះឧបទ្ទវហេតុដែលបានកើតឡើងនេះ និងបាននាំមកនូវផ្តាំផ្ញើសួរសុខទុក្ខពីសំណាក់ ឯកឧត្តមសន្តិបណ្ឌិត នេត សាវឿន ប្រធានកិត្តិយសសាខា  ជាពិសេសពីសំណាក់សម្ដេចកិតិ្ត ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែតដែលជានិច្ចកាល សម្ដេចតែងតែ យកចិត្តទុកដាក់គិតគូរ អំពីសុខទុក្ខរបស់ប្រជាពលរដ្ឋដែលរងគ្រោះ និងងាយរងគ្រោះបំផុត នៅគ្រប់ទីកន្លែង ដោយចាត់តំណាង ចុះអន្តរាគមន៍ នាំយកអំណោយមនុស្សធម៌ ជួយសម្រាលទុក្ខលំបាក ទាន់ពេលវេលា ស្របតាមទិសស្លោក " ទីណាមានទុក្ខលំបាក ទីនោះមានកាកបាទក្រហមកម្ពុជា "។   
ឯកឧត្តម អភិបាលខេត្តក៏បានធ្វើការអំពាវនាវដល់ពលរដ្ឋគ្រប់រូបមិនថា ប្រជាពលរដ្ឋឬព្រះសង្ឃតាមវត្តទេ ត្រូវតែប្រុងប្រយ័ត្ន អំពីគ្រោះមហន្តរាយជាយថាហេតុណាមួយ ពិសេសគ្រោះអគ្គីភ័យ ព្រោះរដូវនេះជារដូវក្តៅងាយរងគ្រោះថា មុននឹងចេញពីលំនៅដ្ឋាន ត្រូវពន្លត់ភ្លើង ធូប ទៀន ចង្ក្រាន ហ្គាស បិទកុងតាក់ភ្លើងជាមុនសិន ហើយត្រូវយកចិត្តទុកដាក់ ថែទាំសុខភាពឲ្យបានល្អ ដោយប្រកាន់ខ្ជាប់នូវអនាម័យ សុខភាព ស្អាត ៣យ៉ាង  "ហូបស្អាត ផឹកស្អាត និងរស់នៅស្អាត"។
    
ចំពោះអំណោយ ដែល ឯកឧត្តម អ៊ុន ចាន់ដា យកទៅប្រគេនព្រះគ្រូចៅអធិការវត្តជំនីក រួមមាន៖ អង្ករ ២០០គក្រ ត្រីខ ៨យួរ  ទឹកត្រី ៨យួរ ទឹកស៊ីអ៊ីវ ៨យួរ  មី ៨កេស  តង់ធំ៨ និង ថវិកាសរុបចំនួន ៧.០០០.០០០រៀល ក្នុងនោះថវិការដ្ឋបាលខេត្តចំនួន ៥.០០០.០០០រៀលផងដែរ៕ 

ដោយ ឆាយ ម៉ុត