AKP ភ្នំពេញ ថ្ងៃទី២០ ខែមេសា ឆ្នាំ២០២៦ -- ប្រធានាធិបតីអ៊ីរ៉ង់ លោក ម៉ាសូដ ប៉េហ្សេសគីអាន់ (Masoud Pezeshkian) បាននិយាយថា គ្មាននរណាម្នាក់ផ្តល់សិទ្ធិឱ្យរដ្ឋបាលអាម៉េរិកដកហូតឱកាសអភិវឌ្ឍន៍ថាមពលនុយក្លេអ៊ែររបស់អ៊ីរ៉ង់នោះទេ។

លោកបានពន្យល់ថា «ប្រធានាធិបតីអាម៉េរិក [លោក ដូណាល់ ត្រាំ] ប្រកាសថា អ៊ីរ៉ង់មិនគួរប្រើប្រាស់សិទ្ធិនុយក្លេអ៊ែររបស់ខ្លួនទេ ប៉ុន្តែមិនបានពន្យល់ពីមូលហេតុនោះទេ។ ហើយតើលោកជានរណានៅក្នុងលោកនេះដែលដកហូតសិទ្ធិស្របច្បាប់របស់ប្រជាជាតិមួយ? ពីទស្សនៈនៃគោលការណ៍របស់មនុស្ស មនុស្សគ្រប់រូបមានសេរីភាពដោយមិនគិតពីសាសនា ជំនឿ ពូជសាសន៍ និងជនជាតិភាគតិច គួរតែរីករាយនឹងសិទ្ធិដែលមិនអាចកាត់ផ្តាច់បានរបស់ខ្លួន ហើយយើងក៏ទាមទារផងដែរថា នៅក្នុងប្រព័ន្ធអន្តរជាតិ ប្រជាជនទាំងអស់ត្រូវបានប្រព្រឹត្តដោយឈរលើមូលដ្ឋាននៃយុត្តិធម៌ និងស្មើភាព»។

នៅពេលមុននេះ ប្រធានាធិបតីអាម៉េរិក លោក ដូណាល់ ត្រាំ បាននិយាយថា គណៈប្រតិភូសហរដ្ឋអាមេរិក និងអ៊ីរ៉ង់បានឯកភាពគ្នាទៅលើបញ្ហាភាគច្រើន ប៉ុន្តែបញ្ហានុយក្លេអ៊ែរនៅតែមិនទាន់ដោះស្រាយបាន។លោកបានពន្យល់ថា «ចំណុចភាគច្រើនត្រូវបានឯកភាពគ្នា ប៉ុន្តែចំណុចតែមួយគត់ដែលសំខាន់ គឺនុយក្លេអ៊ែរ»។

អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov)បាននិយាយនៅក្នុងបទសម្ភាសន៍មួយជាមួយសារព័ត៌មានឥណ្ឌាធូដេថា អ៊ីរ៉ង់គួរតែមានសិទ្ធិទទួលបានថាមពលនុយក្លេអ៊ែរដោយសន្តិវិធី ដូចប្រទេសដទៃទៀតនៅក្នុងពិភពលោកដែរ។

អ៊ីរ៉ង់បានចាប់ផ្តើមអភិវឌ្ឍន៍កម្មវិធីនុយក្លេអ៊ែររបស់ខ្លួននៅក្នុងទសវត្សរ៍ឆ្នាំ១៩៥០ ក្នុងរជ្ជកាលរបស់ស្តេច ស្សាហ៍ ម៉ូហាំម៉ាដ រ៉េហ្សា ប៉ាហ៍ឡាវី (Shah Mohammad Reza Pahlavi) ដោយមានការគាំទ្រពីសហរដ្ឋអាមេរិក។ នៅក្នុងឆ្នាំ១៩៥៨ ប្រទេសនេះបានក្លាយជាសមាជិកនៃទីភ្នាក់ងារថាមពលបរមាណូអន្តរជាតិ (IAEA)។ នៅក្នុងឆ្នាំ១៩៦៨ ទីក្រុងតេអេរ៉ង់បានចុះហត្ថលេខាលើ NPT និងបានផ្តល់សច្ចាប័ននៅក្នុងឆ្នាំ១៩៧០។បន្ទាប់ពីការផ្តួលរំលំរបប ស្សាហ៍ ក្នុងឆ្នាំ១៩៧៩ និងការប្រកាសសាធារណរដ្ឋអ៊ីស្លាម កម្មវិធីនុយក្លេអ៊ែរត្រូវបានផ្អាករហូតដល់អាជ្ញាធរបានបន្តអភិវឌ្ឍន៍បច្ចេកវិទ្យានុយក្លេអ៊ែរនៅចុងទសវត្សរ៍ឆ្នាំ១៩៨០។ ចាប់តាំងពីឆ្នាំ២០០៣ មកហ្វាតវ៉ា (សេចក្តីសម្រេចសាសនា) ដែលចេញដោយមេដឹកនាំកំពូលអ៊ីរ៉ង់ លោក អាយ៉ាតូឡោះ អាលី ខាំមេណី (Ayatollah Ali Khamenei) បានចូលជាធរមាននៅក្នុងប្រទេសអ៊ីរ៉ង់ ដោយហាមឃាត់ការអភិវឌ្ឍអាវុធនុយក្លេអ៊ែរ៕

ដោយ៖ យា ចិន្ដាខន្ដី (ប្រភព៖ តាសស៍)