AKP ភ្នំពេញ ថ្ងៃទី១៩ ខែមេសា ឆ្នាំ២០២៦–

រសៀលថ្ងៃអាទិត្យនេះ ឯកឧត្តមកិត្តិសង្គហបណ្ឌិត គន់ គីម បានចុះជួបបងប្អូនប្រជាពលរដ្ឋភៀសសឹកតាមខ្នងផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជា បន្ទាប់ពីប៉ុន្មានថ្ងៃមុននេះមានភ្លៀង និងខ្យល់កន្រ្តាក់ ក្នុងខេត្តបន្ទាយមានជ័យ។

ការប្រែប្រួលអាកាសធាតុ ដោយសារខ្យល់កន្រ្តាក់បានប៉ះពាល់ផ្ទះប្រជាពលរដ្ឋក្នុងមូលដ្ឋានភូមិ-ឃុំ ស្រុក ក្នុងខេត្តបន្ទាយមានជ័យ។ ដោយឡែក ចំពោះផ្ទះបងប្អូនប្រជាពលរដ្ឋមួយចំនួនតូច ក៏មានការប៉ះពាល់ទៅលើដំបូល និងជញ្ជាំងស្របពេលក្រុមការងារកំពុងពន្លឿនសកម្មភាពការងារសាងសង់។ ពាក់ព័ន្ធនឹងបញ្ហានេះ ឯកឧត្តមកិត្តិសង្គហបណ្ឌិត បានឲ្យអាជ្ញាធរខេត្ត និងក្រុមការងារចុះពិនិត្យជូនប្រជាពលរដ្ឋ។

តាមរយៈការចុះជួបផ្ទាល់ជាមួយបងប្អូនភៀសសឹក ឯកឧត្តមកិត្តិសង្គហបណ្ឌិត សូមសម្តែងការអរគុណ ចំពោះការយោគយល់របស់បងប្អូនភៀសសឹក និងតែងតែផ្តល់ព័ត៌មាន និងរាយការណ៍ទៅកាន់អាជ្ញាធរមូលដ្ឋាន ដើម្បីអន្តរាគមន៍ដោះស្រាយបញ្ហាបានទាន់ពេលវេលា។

បន្ទាប់ពីចុះជួបប្រជាពលរដ្ឋភៀសសឹក ឯកឧត្តមកិត្តិសង្គហបណ្ឌិត បានចុះពិនិត្យ និងជំរុញសកម្មភាពការងារខួងអណ្តូងទឹកសម្រាប់ប្រជាពលរដ្ឋភៀសសឹកប្រើប្រាស់ឲ្យបានឆាប់រហ័សផងដែរ៕

ដោយ៖ គង់ សិរីរ័ត្ន