AKP ភ្នំពេញ ថ្ងៃទី១៦ ខែមេសា ឆ្នាំ២០២៦

សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានមានប្រសាសន៍រម្លឹករងរបួសធ្ងន់ភ្នែកឆ្វេង ដោយសារសង្គ្រាមកាលពី៥១ឆ្នាំមុន (ថ្ងៃទី១៦ ខែមេសា ឆ្នាំ១៩៧៥)។

នៅលើបណ្ដាញទំនាក់ទំនងសង្គម នារសៀលថ្ងៃទី១៦ ខែមេសា ឆ្នាំ២០២៦ សម្ដេចតេជោបានសរសេរថា ៥១ឆ្នាំមុន ពេលនេះម៉ោងនេះ ខ្ញុំកំពុងសន្លប់មិនដឹងខ្លួននៅឡើយ បន្ទាប់ពីត្រូវរបួសធ្ងន់(ភ្នែកឆ្វេង) ប្រមាណម៉ោង៦ព្រឹកថ្ងៃ១៦មេសា១៩៧៥។

សម្ដេចតេជោបន្តថា  មុខព្រួញដែលដឹកនាំបញ្ជាដោយខ្ញុំផ្ទាល់ ត្រូវស្លាប់និងរបួស៣៨នាក់រាប់ទាំងរូបខ្ញុំជាមេបញ្ជាការផង។ សំណាងល្អជីវិតខ្ញុំនៅរស់តែមិត្តខ្ញុំជិត៣០នាក់បានពលីជីវិតរួចទៅហើយ។  សង្គ្រាមគឺបែបនេះហើយដែលយើងមិនចង់ជួបវាទៀតទេ។ សូមចាក់ផ្សាយឡើងវិញចម្រៀង២បទដែលមានចំណងជើងថា (ធ្លាក់ខ្លួនពិការដោយសារសង្គ្រាម) និងបទ(យល់ខុសគិតខុស)។ ជូនពរជនរួមជាតិជួបតែសេចក្ដីសុខសេចក្ដីចម្រើនក្នុងឆ្នាំថ្មីនេះ៕

ដោយ៖ ជឹម ណារី