AKP សៀមរាប ថ្ងៃទី១៣ ខែមេសា ឆ្នាំ២០២៦--ប្រជាពលរដ្ឋដែលបានស្ម័គ្រចិត្តចាកចេញពីរមណីយដ្ឋានអង្គរ មកតាំងទីលំនៅថ្មីក្នុងក្រុងរុនតាឯកតេជោសែន កំពុងបង្ហាញនូវផ្លែផ្កាវិជ្ជមានក្នុងជីវភាពរស់នៅ តាមរយៈការចាប់យកមុខរបរកសិកម្មចម្រុះ។ ជាក់ស្ដែង កសិករគំរូចំនួន៨គ្រួសារ កំពុងរីករាយនឹងការប្រមូលផលបន្លែ ផ្លែឈើ និងការចិញ្ចឹមសត្វ បន្ទាប់ពីទទួលបានការគាំទ្រពេញទំហឹងទាំងផ្នែកសម្ភារ និងបច្ចេកទេស។

ជោគជ័យរបស់កសិករទាំង៨គ្រួសារនេះកើតចេញពីការយកចិត្តទុកដាក់ខ្ពស់របស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា ដែលបានឧបត្ថម្ភនូវពូជដំណាំ ពូជសត្វ និងសម្ភារកសិកម្មចាំបាច់នានា។ ទន្ទឹមនឹងនោះ មន្ត្រីជំនាញនៃអាជ្ញាធរជាតិអប្សរា បានចុះជួយបណ្តុះបណ្តាលបច្ចេកទេសផ្ទាល់ដល់មូលដ្ឋាន ដើម្បីធានាថាការដាំដុះ និងការចិញ្ចឹមសត្វទទួលបានទិន្នផលខ្ពស់។

អ្នកស្រី ប្រាក់ សុធារី រស់នៅដីឡូត៍លេខ V២៣៨០ ជាគ្រួសារមួយក្នុងចំណោមគ្រួសារទាំង ៨ ដែលទទួលបានការជួយគាំទ្រ បានឱ្យដឹងថា អស់រយៈពេលជាង ៣ ឆ្នាំមកហើយ ដែលអ្នកស្រីបានចូលមករស់នៅក្នុងក្រុងរុនតាឯកតេជោសែន។ ដោយមានវ័យចំណាស់ មិនចង់ចាកចេញទៅឆ្ងាយរកការងារធ្វើ អ្នកស្រីក៏សម្រេចដាំដុះបន្លែបង្ការជុំវិញផ្ទះ និងចិញ្ចឹមសត្វសម្រាប់ផ្គត់ផ្គង់ការហូបចុកប្រចាំថ្ងៃ។ ក្រោយមក អ្នកស្រីទទួលបានការគាំទ្រជាពូជដំណាំ ពូជខ្យង ពូជមាន់ អាងសម្រាប់ចិញ្ចឹមខ្យង និងរោងគ្របដំណាំ ព្រមជាមួយការយកចិត្តទុកដាក់បណ្ដុះបណ្ដាលបច្ចេកទេសពីអាជ្ញាធរជាតិអប្សរា ទើបធ្វើឱ្យអ្នកស្រីអាចទទួលបានជោគជ័យ។ 

អ្នកស្រីបន្ថែមថា បន្លែបង្ការរួមមាន ស្លឹកខ្ទឹម ជីគ្រប់មុខ ឃ្លោក និងននោង រួមទាំងការចិញ្ចឹមខ្យង និងមាន់ អាចធ្វើជាម្ហូបអាហារប្រចាំថ្ងៃបាន ស្ទើរតែមិនចាំបាច់ទិញពីខាងក្រៅ និងអាចលក់ដូរបានជាបន្តបន្ទាប់ដើម្បីផ្គត់ផ្គង់ជីវភាព។ លើសពីនេះ អ្នកស្រីក៏មានគម្រោងសាងសង់កន្លែងសម្រាប់ចិញ្ចឹមបង្កងបន្ថែមទៀតនាពេលអនាគត។

លោក ស៊ុន កែវពិសី អនុប្រធានអង្គភាពគ្រប់គ្រងភូមិធម្មជាតិរុនតាឯក បានឱ្យដឹងថា អស់រយៈពេល២ឆ្នាំមកហើយ ដែលគម្រោងចុះជួយកសិករក្នុងតំបន់នេះបានដំណើរការសាកល្បង ដោយទទួលបានការជួយឧបត្ថម្ភគាំទ្រពីលោកជំទាវបណ្ឌិតសភាចារ្យ ភឿង សកុណា។ លោកថា កសិករដែលបានស្ម័គ្រចិត្តទទួលយកចំណេះដឹង និងសម្ភារបច្ចេកទេស ទទួលបានជោគជ័យលើការងារដាំដុះ និងចិញ្ចឹមសត្វ ហើយក្លាយជាកសិករគំរូ។ ផលប្រយោជន៍ជាច្រើនដែលកសិករទទួលបាន គឺក្រៅពីមានបន្លែបង្ការសម្រាប់ធ្វើម្ហូប ក៏អាចលក់ដូរយកប្រាក់កម្រៃ ដោយមិនចាំបាច់ទៅរកការងារធ្វើឆ្ងាយពីផ្ទះ ឬធ្វើចំណាកស្រុកឡើយ។

សូមជម្រាបថា ថ្នាក់ដឹកនាំនៃអាជ្ញាធរជាតិអប្សរាបានយកចិត្តទុកដាក់ជួយជ្រោមជ្រែងដល់ពលរដ្ឋតាមមូលដ្ឋានគោលដៅ ដោយផ្ដោតលើផ្នែកកសិកម្មជាអាទិភាព។ ចំពោះសម្ភារកសិកម្មដែលត្រូវបានផ្ដល់ជូនរួមមាន៖ អាងចិញ្ចឹមខ្យង ពូជដំណាំ បន្លែ ដើមឈើហូបផ្លែ ពូជមាន់ រោងគ្របដំណាំ លូផលិតជីកំប៉ុស្ត ចកសូឡា រោងការពារកម្ដៅថ្ងៃ (UV) សម្រាប់ដាំបន្លែលើទឹក ប្រព័ន្ធស្រោចស្រព ទុយោ និងសម្ភារបម្រើការងារកសិកម្មជាច្រើនទៀត៕

ដោយ AKP