AKP ភ្នំពេញ ថ្ងៃទី១៣ ខែមេសា ឆ្នាំ២០២៦--ជាការពិតណាស់ក្នុងរដូវកាលនៃពិធីបុណ្យប្រពៃណីជាតិម្តងៗ មានដូចជា បុណ្យភ្ជុំបិណ្ឌ និងពិធីបុណ្យចូលឆ្នាំជាដើម បងប្អូនប្រជាពលរដ្ឋខ្លះបានធ្វើដំណើរទៅកម្សាន្តសប្បាយនៅទីជិត ឬទីឆ្ងាយ តាមសេចក្តីប្រាថ្នារៀងៗខ្លួន ហើយអ្នកខ្លះទៀតបានទៅជួបជុំក្រុមគ្រួសារ សាច់ញាតិ នៅឯស្រុកកំណើត ដើម្បីធ្វើបុណ្យផង និងដើម្បីសប្បាយជុំគ្នាផង។

សម្រាប់ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ នឹងត្រូវប្រព្រឹត្តទៅនៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦ បងប្អូនប្រជាពលរដ្ឋ ត្រូវធ្វើដំណើរចាកចេញពីរាជធានីភ្នំពេញទៅកម្សាន្តសប្បាយនៅទីជិត ឬទីឆ្ងាយ ឬទៅជួបជុំក្រុមគ្រួសារ សាច់ញាតិ នៅឯស្រុកកំណើត ដោយពួកគាត់ត្រូវប្រើប្រាស់ដងផ្លូវសម្រាប់ការបើកបរនូវយានយន្តគ្រប់ប្រភេទ រួមមាន រថយន្ត ត្រីចក្រយានយន្ត និងទោចក្រយានយន្ត (ម៉ូតូ) ជាដើម ដែលធ្វើឱ្យចរាចរណ៍នៅពេលនោះមានភាពមមាញឹកខ្លាំង  និងអាចមាននូវគ្រោះថ្នាក់ចរាចរណ៍ក្នុងអត្រាមួយខ្ពស់ផងដែរ។

ជាមួយនឹងការធ្វើដំណើរកាន់តែមមាញឹកក្នុងឱកាសបុណ្យចូលឆ្នាំថ្មីនេះ អ្នកប្រើប្រាស់ដងផ្លូវទាំងអស់ត្រូវមានការប្រុងប្រយ័ត្នខ្ពស់ជានិច្ច ដើម្បីបញ្ចៀសគ្រោះថ្នាក់ចរាចរណ៍គឺត្រូវ «ទៅឱ្យដល់គោលដៅ សប្បាយរួច សូមវិលត្រឡប់វិញដោយសុវត្ថិភាពទាំងអស់គ្នា» ពោលគឺ សូមទៅគ្រប់ មកគ្រប់ ដោយគ្មានបាត់សមាជិកគ្រួសារណាម្នាក់ដោយសារគ្រោះថ្នាក់ចរាចរណ៍សោះឡើយ។

លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោកមានប្រសាសន៍ថា ការបាត់បង់ក្នុងគ្រោះថ្នាក់ចរាចរណ៍ផ្លូវគោក គឺជាបាត់បង់ដ៏គួរឱ្យតក់ស្លុត និងសោកស្តាយបំផុត ខណៈដែលក្នុងមួយឆ្នាំៗគ្រោះថ្នាក់ចរាចរណ៍នៅកម្ពុជាបានឆក់យកអាយុជីវិតមនុស្សជាច្រើននាក់ ក្នុងនោះ អ្នករងរបួសធ្ងន់ស្រាលក៏មាន មិនតិចនាក់ផងដែរ  រីឯការខាតបង់វិញក៏មានច្រើន គឺប្រហែល ៤៥០លានដុល្លារអាម៉េរិក ក្នុងមួយឆ្នាំ។ 

ថ្លែងក្នុងការចុះអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោកដល់អ្នកបើកបរយានយន្ត មុនពិធីបុណ្យចូលឆ្នាំថ្មី ប្រពៃណីជាតិ កាលពីថ្ងៃទី១០ ខែមេសា ឆ្នាំ២០២៦ នៅតាមបណ្តោយផ្លូវជាតិលេខ៣ ស្ថិតក្នុងភូមិព្រៃកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ លោកជំទាវ មឹន មាណវី បានគូសបញ្ជាក់ថា គណៈកម្មាធិការជាតិសុវត្ថិភាពចរាចរណ៍ផ្លូវគោក តាមរយៈសេចក្តីអំពាវនាវស្តីពីការទប់ស្កាត់គ្រោះថ្នាក់ចរាចរណ៍ផ្លូវគោកក្នុងឱកាសនៃពិធីបុណ្យចូលឆ្នាំថ្មីនេះបានកត់សម្គាល់ថា នៅពេលមានពិធីបុណ្យនានា ការធ្វើចរាចរណ៍មានភាពមមាញឹក និងមានកំណើនខ្ពស់នូវគ្រោះថ្នាក់ចរាចរណ៍ផ្លូវគោក។ លោកជំទាវបានបន្ដថា ដូចនេះ ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោកក្នុងឱកាសពិធីបុណ្យចូលឆ្នាំថ្មី ប្រពៃណីជាតិ ឆ្នាំមមី អដ្ឋស័ក ព.ស.២៥៦៩ នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦ ខាងមុខនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក សូមធ្វើការអំពាវនាវដល់សាធារណជនជាអ្នកប្រើប្រាស់ផ្លូវគ្រប់រូប ត្រូវបើកបរដោយគោរពច្បាប់ស្តីពីចរាចរណ៍ផ្លូវគោក និងចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោក។ 
ជាមួយគ្នានេះដែរ លោកជំទាវរដ្ឋលេខាធិការបានលើកឡើងផងដែរថា បច្ចុប្បន្នការគ្រោះថ្នាក់ចរាចរណ៍ផ្លូវគោកនៅកម្ពុជាហាក់មានការកើនឡើងតិចតួច ហើយយើងក៏កំពុងមានការព្រួយបារម្ភខ្លាំងចំពោះបងប្អូនមួយចំនួន ដែលមានការធ្វេសប្រហែស ខណៈដែលរាជរដ្ឋាភិបាលបានបន្ថយនូវការរឹតបន្តឹងក្នុងការផាកពិន័យ ដោយសារតែបញ្ហាសេដ្ឋកិច្ចរបស់បងប្អូនប្រជាពលរដ្ឋមានការធ្លាក់ចុះ បណ្តាលមកពីការឈ្លានពានរបស់ប្រទេសថៃ មួយផ្នែក និងមួយផ្នែកទៀតបណ្តាលមកពីការកើតមានសង្គ្រាមនៅតាមតំបន់នានានៃពិភពលោកដែលនាំឱ្យមានផលជះមិនល្អដល់សេដ្ឋកិច្ចជាទូទៅ។ លោកជំទាវរដ្ឋលេខាធិការ និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកបានអំពាវនាវសូមឱ្យអ្នកបើកបរ កុំបើកបរលើសល្បឿនកំណត់ កុំបើកបរក្រោមឥទ្ធិពលនៃគ្រឿងស្រវឹង ឬគ្រឿងញៀន ត្រូវគោរពសិទ្ធិអាទិភាព គោរពភ្លើង ស្លាកសញ្ញាចរាចរណ៍ និងសញ្ញាបញ្ជារបស់មន្ត្រីនគរបាលចរាចរណ៍ផ្លូវគោក ត្រូវបើកបរក្នុងគន្លងផ្លូវដែលកំណត់ដោយច្បាប់ស្តីពីចរាចរណ៍ផ្លូវគោក និងមិនត្រូវបើកបរជាន់លើគំនូសសញ្ញា បែងចែកគន្លងផ្លូវ  ត្រូវប្រុងប្រយ័ត្នជានិច្ចក្នុងការបត់ ការជែង ការចត និងការឈប់ ពិសេសការបើកបរនៅពេលយប់  ត្រូវត្រួតពិនិត្យមុនចេញដំណើរនូវលក្ខណៈបច្ចេកទេសយានយន្ត ដូចជាសំបកកង់ ហ្វ្រាំង ភ្លើងបំភ្លឺ និងចង្កូតជាដើម។ ទន្ទឹមនេះ ត្រូវពាក់មួកសុវត្ថិភាពជានិច្ចក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ  មិនត្រូវលេងគប់ទឹក ឬប៉ាតម្សៅដល់អ្នកប្រើប្រាស់ផ្លូវ  សូមកុំផ្ទុកអ្នកដំណើរ ឬទំនិញលើសច្បាប់កំណត់។ល។

លោក អន ម៉ិច អាយុ ៥៥ឆ្នាំ ជាប្រជាពលរដ្ឋរស់នៅរាជធានីភ្នំពេញ បានបង្ហាញពីការគាំទ្រចំពោះសេចក្តីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ស្តីពីការទប់ស្កាត់គ្រោះថ្នាក់ចរាចរណ៍ផ្លូវគោកក្នុងឱកាសនៃពិធីបុណ្យចូលឆ្នាំថ្មី ដោយលោកបានចាត់ទុកវាជាការសំខាន់ ដែលអ្នកប្រើប្រាស់ផ្លូវទាំងអស់ ត្រូវចូលរួមអនុវត្តន៍ទាំងអស់គ្នា ដើម្បីបញ្ចៀសគ្រោះថ្នាក់ចរាចរណ៍។ លោក អន ម៉ិច បានឱ្យដឹងទៀតថា សម្រាប់ថ្ងៃបុណ្យចូលឆ្នាំថ្មីខាងមុខនេះ លោក និងក្រុមគ្រួសារត្រូវធ្វើដំណើរទៅស្រុកកំណើតនៅក្នុងខេត្ដត្បូងឃ្មុំ ដោយប្រើប្រាស់រថយន្តផ្ទាល់ខ្លួនជាមធ្យោបាយក្នុងការធ្វើដំណើរ។ លោកបានបន្ថែមថា៖ «ខ្ញុំ មានការយល់ដឹងខ្លះៗពីច្បាប់ចរាចរណ៍ផ្លូវគោក តារយៈការសិក្សា និងការប្រឡងយកបណ្ណបើកបរ។ ដូច្នេះ ខ្ញុំ នឹងខិតខំគោរពតាមច្បាប់ចរាចរណ៍ ហើយក៏សូមអ្នកដទៃទៀតចូលរួមគោរពច្បាប់ទាំងអស់គ្នាដើម្បីកាត់បន្ថយការគ្រោះថ្នាក់»។

ថ្លែងក្នុងកិច្ចប្រជុំគណៈបញ្ជាការឯកភាពរាជធានី កាលពីថ្ងៃទី៨ ខែមេសា ឆ្នាំ២០២៦ នៅសាលារាជធានីភ្នំពេញ ឯកឧត្ដម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការ នៃស្នងការដ្ឋាននគរបាលរាជធានីភ្នំពេញបានគូសបញ្ជាក់ថា អាជ្ញាធររាជធានីភ្នំពេញ បានត្រៀមប្រើប្រាស់កម្លាំងប្រមាណ ៣ ៦០០ នាក់ ដើម្បីការពារសន្តិសុខ សណ្ដាប់ធ្នាប់ និងសុវត្ថិភាព ជូនភ្ញៀវទេសចរជាតិ-អន្ដរជាតិ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ។ ឯកឧត្ដម ឧត្តមសេនីយ៍ឯកបានលើកឡើងថា កម្លាំងអគ្គស្នងការនគរបាលជាតិ ក៏ដូចជាស្នងការដ្ឋាននគរបាលរាជធានីភ្នំពេញបានត្រៀមលក្ខណៈរួចរាល់ហើយ ដើម្បីធានាឱ្យបានទាំងស្រុងនូវសន្ដិសុខ សណ្ដាប់ធ្នាប់ និងសុវត្ថិភាពរបៀបរៀបរយសាធារណៈ ជូនប្រជាពលរដ្ឋ ដែលអញ្ជើញមកកម្សាន្ដសប្បាយក្នុងពិធីបុណ្យចូលឆ្នាំថ្មីប្រពៃណីជាតិខ្មែរ និងព្រឹត្ដិការណ៍ “នគរសង្ក្រាន្ដ” នៅរាជធានីភ្នំពេញ។
ឯកឧត្ដម ឧត្តមសេនីយ៍ឯក អគ្គស្នងការរងនគរបាលជាតិ និងជាស្នងការ នៃស្នងការដ្ឋាននគរបាលរាជធានីភ្នំពេញបានបន្ថែមថា កម្លាំងទាំងនេះ នឹងបែងចែកជាក្រុមសម្រួលចរាចរណ៍ ការពារកន្លែងជួបជុំ ជួយអន្ដរាគមន៍ភ្លាមៗ ឱ្យទាន់ពេលវេលា ពេលមានហេតុការណ៏កើតឡើង និងកម្លាំងអន្តរាគមន៍ពិសេស ដើម្បីធានាដល់ការដើរលេងកម្សាន្ដ និងផ្ដល់ភាពសប្បាយរីករាយជូនបងប្អូនប្រជាពលរដ្ឋរយៈពេល៦ថ្ងៃ ដែលបងប្អូន អញ្ជើញមកទស្សនាកម្សាន្ដ សង្ក្រាន្ដ នៅរាជធានីភ្នំពេញ។  
សូមរម្លឹកផងដែរថា ក្នុងទិវាអន្តរជាតិរម្លឹកជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី២០ និងពិធីសម្ពោធដាក់ឱ្យប្រើប្រាស់ជាផ្លូវការសួនសុវត្ថិភាពចរាចរណ៍ផ្លូវគោក ក្នុងខេត្តកំពង់ឆ្នាំង កាលពីកន្លងទៅ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណ:កម្មាធិការជាតិសុវត្ថិភាពចរាចរណ៍ផ្លូវគោកបានមានប្រសាសន៍ថា គ្រោះថ្នាក់ចរាចរណ៍ផ្លូវគោកបានបង្កផលប៉ះពាល់ដល់អាយុជីវិត និងទ្រព្យសម្បត្តិប្រជាពលរដ្ឋជារៀងរាល់ថ្ងៃ និងក្លាយជាជំងឺរ៉ាំរ៉ៃបន្ថែម ជាបន្ទុកលំបាកជាច្រើនដល់សង្គមជាតិ៕

ដោយ៖ ចាន់ សុភឿន