AKP ភ្នំពេញ ថ្ងៃទី១០ ខែមេសា ឆ្នាំ២០២៦-- សម្តេចកិត្តិសង្គហបណ្ឌិតម៉ែន សំអន បានបញ្ជក់ថា វិស័យឯកជនបានរុញសេដ្ឋកិច្ចជាតិឱ្យកាន់តែរឹងមាំ និងមានភាពទាក់ទាញខ្លាំងពីអ្នកវិនិយោគទុនបរទេសកាន់ច្រើនឡើងនៅកម្ពុជា រាជរដ្ឋាភិបាលក៏សូមគាំទ្រ និងលើកទឹកចិត្ដឱ្យវិស័យឯកជននានាមកបណ្ដាក់ទុនវិនិយោគកាន់តែច្រើនថែមទៀត។

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា បានបញ្ជាក់បែបនេះ ក្នុងពិធីកាត់ខ្សែបូសម្ពោធដាក់ឱ្យដំណើរការជាផ្លូវការនូវក្រុមហ៊ុន SSN Food Industry Co., Ltd និងហាងកាហ្វេ Kave Kafe ដែលមានទីតាំងស្ថិតនៅអគារលេខ១ តាមបណ្តោយផ្លូវជាតិលេខ១ ខណ្ឌច្បារអំពៅ រាជធានីភ្នំពេញ នាព្រឹកថ្ងៃសុក្រ ទី១០ ខែមេសា ឆ្នាំ២០២៦។

សម្តេចកិត្តិសង្គហបណ្ឌិតបានមានប្រសាសន៍ថា វិសយ័ឯកជនកំពុងចូលរួមយ៉ាងខ្លាំងក្លាជួយសង្គម និងបានរុញសេដ្ឋកិច្ចកម្ពុជា ឱ្យមានការរីកចម្រើននាពេលបច្ចុប្បន្ន វិសយ័ឯកជនមិនត្រឹមតែរុញសេដ្ឋកិច្ចកម្ពុជាឱ្យរីកចម្រើនប៉ុណ្ណោះទេ ថែមទាំងជួយកិច្ចការមនុស្សធម៌ និងការងារសង្គម ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ថែមទៀតផង។

កញ្ញា ស៊ុយ ស្រីណុច នាយកប្រតិបត្តិនៃក្រុមហ៊ុនSSN Food Industry Co., Ltd  បានបញ្ជាក់ថា ក្រុមហ៊ុនសូមប្តេជ្ញាចិត្តយ៉ាងមោះមុតមាំ ក្នុងការផ្តល់ជូនអតិថិជននូវបទពិសោធន៍ដ៏ល្អឥតខ្ចោះលើផ្នែកម្ហូបអាហារ ភេសជ្ជៈ សេវាកម្មទេសចរណ៍ និងកីឡា ប្រកបដោយគុណភាព និងស្តង់ដារ។ បច្ចុប្បន្ន ក្រុមហ៊ុនកំពុងជោគជ័យលើការគ្រប់គ្រងភោជនីយដ្ឋាន Little Sheep Hot Pot ចំនួន ៣សាខា និងគ្រោងនឹងបើកសម្ពោធសាខាទី៤ នៅផ្សារទំនើបអ៊ីអនម៉ល ភ្នំពេញ នាពេលឆាប់ៗខាងមុខ ដើម្បីឆ្លើយតបនឹងការគាំទ្ររបស់អតិថិជន។ លើសពីនេះ ក្រុមហ៊ុនក៏កំពុងពង្រីកបន្ថែមទៀតលើវិស័យកីឡា និងការកម្សាន្ត តាមរយៈគម្រោង “Hay Ground” ដែលនឹងក្លាយជាមជ្ឈមណ្ឌលសម្រាប់សកម្មភាពកីឡាសុខភាព និងការរស់នៅបែបប្រណិតភាព។

កញ្ញា ស៊ុយ ស្រីណុច បានអរគុណចំពោះសម្តេចកិត្តិសង្គហបណ្ឌិត ដែលបានចំណាយពេលវេលាដ៏មានតម្លៃ ផ្ដល់កិត្តិយស និងការលើកទឹកចិត្តយ៉ាងធំធេងសម្រាប់សហគ្រិនក្នុងស្រុក។ អ្វីដែលកាន់តែពិសេសនោះ ក្រុមហ៊ុន SSN មិនត្រឹមតែផ្ដោតលើអាជីវកម្មប៉ុណ្ណោះទេ ប៉ុន្តែថែមទាំងបានចូលរួមចំណែកយ៉ាងសកម្ម ក្នុងកិច្ចការមនុស្សធម៌ និងការងារសង្គម ស្របតាម យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧។ ក្រុមហ៊ុនប្ដេជ្ញាបង្កើតឱកាសការងារ ពង្រឹងសមត្ថភាពធនធានមនុស្ស និងអនុវត្តអាជីវកម្មដោយផ្អែកលើសុចរិតភាព តម្លាភាព និងការទទួលខុសត្រូវខ្ពស់។ វត្តមានអញ្ជើញចូលរួមពីសំណាក់ សម្តេចកិត្តិសង្គហបណ្ឌិត ម៉ែន សំអន គឺជាសក្ខីភាពសបញ្ជាក់ពីការយកចិត្តទុកដាក់របស់ថ្នាក់ដឹកនាំ ចំពោះការវិនិយោគទុនក្នុងស្រុក ដែលជាកម្លាំងចលករយ៉ាងសំខាន់ក្នុងការជំរុញសេដ្ឋកិច្ចជាតិឱ្យកាន់តែរឹងមាំ និងមានភាពទាក់ទាញខ្លាំងឡើង។

សូមបញ្ជាក់ថា ក្រុមហ៊ុន SSN គឺជាក្រុមហ៊ុនវិនិយោគពហុវិស័យ ដែលផ្ដោតសំខាន់លើវិស័យកសិកម្ម ឧស្សាហកម្មចំណីអាហារ និងសេវាកម្ម ដោយប្រកាន់ខ្ជាប់នូវការផ្ដល់តម្លៃជូនអតិថិជនជាចម្បងបំផុត៕

ដោយ សួស សំរិត