AKP ភ្នំពេញ ថ្ងៃទី១០ ខែមេសា ឆ្នាំ២០២៦--  មជ្ឈមណ្ឌលជាតិគ្រប់គ្រងកងកម្លាំង រក្សាសន្តិភាព បោសសំអាតមីន និងកាកសំណល់សង្គ្រាម ដឹកនាំដោយ ឯកឧត្តម ឧត្តមសេនីយ៍ទោ សែម រតនា អគ្គនាយកស្តីទី បានចេញសារលិខិតជូនពរជូនចំពោះនាយទាហាន នាយទាហានរង និងពលទាហានទាំងអស់ដែលកំពុងបំពេញបេសកកម្ម រក្សាសន្តិភាពរបស់អង្គការសហប្រជាជាតិនៅប្រទេសស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល កុងហ្គោ និងអង្គភាពចំណុះឱ្យមជ្ឈមណ្ឌលជាតិក្នុងព្រះរាជាណាចក្រកម្ពុជា នាឱកាសបុណ្យចូលឆ្នាំថ្មីប្រពៃណីជាតិខ្មែរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៧០។

  ក្នុងសារលិខិតនេះ ឯកឧត្តម ឧត្តមសេនីយ៍ទោ សែម រតនា ក្នុងនាមថ្នាក់ដឹកនាំមជ្ឈមណ្ឌលជាតិរក្សាសន្តិភាព និងក្នុងនាមឯកឧត្តមផ្ទាល់ បានចូលរួមកោតសរសើរ និងវាយតម្លៃខ្ពស់ដល់គ្រប់កងកម្លាំងដែលកំពុងបំពេញបេសកកម្មរក្សាសន្តិភាពអង្គការសហប្រជាជាតិជាប្រវត្តិសាស្ត្រនៅក្នុងប្រទេសស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល កុងហ្គោ និងអង្គភាពចំណុះឱ្យមជ្ឈមណ្ឌលជាតិទាំងមូល ដែលបានយកអស់កម្លាំងកាយចិត្ត ប្រាជ្ញាស្មារតី ខិតខំប្រឹងប្រែងបំពេញកាតព្វកិច្ចប្រកបដោយស្មារតីទទួលខុសត្រូវរយៈពេលពេញមួយឆ្នាំកន្លងទៅដោយទទួលបានសមិទ្ធផល និងស្នាដៃជាច្រើនជូនមជ្ឈមណ្ឌលជាតិ ក៏ដូចជាការចូលរួមចំណែកជាមួយរាជរដ្ឋាភិបាល ដើម្បីបុព្វហេតុការពារជាតិ ការអភិវឌ្ឍ សន្តិភាព និងកិច្ចសហប្រតិបត្តិការអន្តរជាតិ និងជាកិត្តិយសដ៏ខ្ពង់ខ្ពស់របស់យើងទាំងអស់គ្នា ដែលទទួលបាននូវទំនុកចិត្តពីប្រមុខរាជរដ្ឋាភិបាលកម្ពុជា ព្រមទាំងពីឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ តាមរយៈការលើកកម្ពស់កិត្យានុ ភាពព្រះរាជាណាចក្រកម្ពុជា និងកងយោធពលខេមរភូមិន្ទទាំងមូលនៅលើឆាកអន្តរជាតិ។

  ដើម្បីជាការឆ្លើយតបទៅនឹងពលិកម្ម និងវីរភាពដ៏ឧត្តុងឧត្តមខាងលើនៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ក្នុងនាមថ្នាក់ដឹកនាំមជ្ឈមណ្ឌលជាតិ ឯកឧត្តម ឧត្តមសេនីយ៍ទោ សែម រតនា សូមសំដែងនូវការគោរពដឹងគុណយ៉ាងជ្រាលជ្រៅចំពោះលោកឪពុក អ្នកម្តាយ បងប្រុស បងស្រី ប្អូនៗ ក្មួយៗទាំងអស់ ដែលបានសម្រេចចិត្តដ៏ត្រឹមត្រូវដើម្បីឱ្យកូនចៅ ប្តីសី សាច់ញាតិ បងប្អូន ទៅបំពេញបេសកកម្មសហប្រជាជាតិ ហើយក៏សូមផ្ញើនូវក្តីនឹករលឹកពីចម្ងាយជូនចំពោះនាយទាហាន នាយទាហានរង និងពលទាហាន ដែលកំពុងបំពេញបេសកកម្មរក្សាសន្តិភាពរបស់អង្គការសហប្រជាជាតិ និងអង្គភាពចំណុះឱ្យមជ្ឈមណ្ឌលជាតិទាំងអស់ សូមបន្តទទួលបាននូវសុខសុវត្ថិភាព និងចៀសផុតពីជំងឺតម្កាត់ទាំងពួង។

  សូមទេវតាឆ្នាំថ្មីព្រះនាមរាក្យសាទេវីប្រទានពរជ័យបវរសួស្តី សិរីមង្គល វិបុលសុខ មហាប្រសើរជូនដល់នាយទាហាន នាយទាហានរង និងពលទាហានទាំងអស់ ព្រមទាំងក្រុមគ្រួសារ បងប្អូនញាតិមិត្តទាំងក្នុង និងក្រៅប្រទេសប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕

ដោយ៖ ចាន់ សុភឿន