AKP បន្ទាយមានជ័យ ថ្ងៃទី១០ ខែមេសា ឆ្នាំ២០២៦-- បរិយាកាសសប្បាយរីករាយនៃពិធីបុណ្យចូលឆ្នាំថ្មីប្រពៃណីជាតិខ្មែរកាន់តែខិតជិតចូលមកដល់ ខណៈដែលរដ្ឋបាលខេត្តបន្ទាយមានជ័យ កំពុងសម្រុកដុតដៃដុតជើងរៀបចំទីតាំងសង្ក្រាន្តតាមបណ្តាក្រុង-ស្រុកនានា ដើម្បីបង្កលក្ខណៈសប្បាយរីករាយជូនបងប្អូនប្រជាពលរដ្ឋនោះ។

ជាក់ស្តែង កាលពីថ្ងៃទី០៩ ខែមេសា ឆ្នាំ២០២៦ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ រួមជាមួយឯកឧត្ដម ប្លែក វ៉ារី ប្រធានក្រុមប្រឹក្សាខេត្ត និងមានការអមដំណើរដោយលោកអភិបាលរងខេត្ត ព្រមទាំងក្រុមការងារបច្ចេកទេស បានចុះទៅពិនិត្យដោយផ្ទាល់នូវដំណើរការរៀបចំទីតាំង «សង្ក្រាន្តជំរំភៀសសឹក» ដែលស្ថិតនៅក្នុងភូមិស្លក្រាម ឃុំស្លក្រាម ស្រុកស្វាយចេក (តំបន់ផ្ទះអតីតយុទ្ធជន)។

ក្នុងការចុះពិនិត្យនេះ ឯកឧត្តម អ៊ុំ រាត្រី បានសង្កត់ធ្ងន់លើការរៀបចំឱ្យមានសោភ័ណភាព និងសុវត្ថិភាពខ្ពស់បំផុត។ ការជ្រើសរើសយកតំបន់ផ្ទះអតីតយុទ្ធជនជាទីតាំងប្រារព្ធសង្ក្រាន្ត គឺជាការផ្តល់តម្លៃ និងនាំយកភាពសប្បាយរីករាយមកដល់កៀកមាត់ទ្វារផ្ទះរបស់បងប្អូនអតីតយុទ្ធជនដែលប្រជាពលរដ្ឋភៀសសឹកកំពុងចូលទៅរស់នៅបណ្តោះអាសន្ន តាមការរៀបចំរបស់រាជរដ្ឋាភិបាល និងប្រជាពលរដ្ឋក្នុងមូលដ្ឋានដាច់ស្រយាលឱ្យមានឱកាសអបអរសាទរឆ្នាំថ្មីយ៉ាងអធិកអធម។

«សង្ក្រាន្តជំរំភៀសសឹក» ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦ ខាងមុខនេះ នឹងក្លាយជាផ្ទាំងទស្សនីយភាពដ៏រស់រវើក តាមរយៈការដាក់បញ្ចូលនូវល្បែងប្រជាប្រិយខ្មែរគ្រប់ទម្រង់ រួមមានល្បែងកម្សាន្ត ចោលឈូង បោះអង្គញ់ ទាញព្រ័ត្រ និងឡើងសសរខ្លាញ់ជាដើម។ សិល្បៈតន្ត្រី ការប្រគំតន្ត្រីស្គរដៃបែបប្រពៃណី បង្កបរិយាកាសរាំលេងកម្សាន្តយ៉ាងកុះករ។

មិនត្រឹមតែសប្បាយនៅពេលថ្ងៃនោះទេ នាពេលរាត្រីក៏មានការរៀបចំកម្មវិធីពិសេសៗដូចជាការប្រកួតប្រដាល់គុនខ្មែរដែលជាអត្តសញ្ញាណជាតិ ដើម្បីផ្តល់ភាពជក់ចិត្តដិតអារម្មណ៍ដល់អ្នកទស្សនា។ល្ខោនបាសាក់ ការសម្តែងសិល្បៈបុរាណដ៏ចំណាស់ ដើម្បីថែរក្សាវប្បធម៌ និងបម្រើអារម្មណ៍ចាស់ព្រឹទ្ធាចារ្យ ក៏ដូចជាយុវជនជំនាន់ក្រោយ។

ជាមួយគ្នានោះ ឯកឧត្តមអភិបាលខេត្តក៏បានណែនាំដល់អាជ្ញាធរមូលដ្ឋាន និងកងកម្លាំងពាក់ព័ន្ធ ត្រូវពង្រឹងកិច្ចការពារសន្តិសុខ សណ្តាប់ធ្នាប់ឱ្យបានល្អប្រសើរ ដើម្បីធានាថា បងប្អូនប្រជាពលរដ្ឋដែលមកលេងកម្សាន្តក្នុង «សង្ក្រាន្តជំរំភៀសសឹក» នឹងទទួលបាននូវស្នាមញញឹម សេចក្តីសប្បាយរីករាយ និងសុវត្ថិភាពជួបជុំគ្រួសារក្នុងឱកាសបុណ្យចូលឆ្នាំថ្មីនេះ៕

ដោយ ឈុន សារ៉ាត