AKP ព្រះវិហារ ថ្ងៃទី០៩ ខែមេសា ឆ្នាំ២០២៦ --ឯកឧត្តម សុខ សប្បាយណា សមាជិកគណៈអចិន្ត្រៃយ៍សហភាពសហព័ន្ធយុវជនកម្ពុជា តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា អមដំណើរដោយ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ កាលពីរសៀលថ្ងៃទី០៨ ខែមេសា ឆ្នាំ២០២៦ បានអញ្ជើញចុះជួបសំណេះសំណាល សាកសួរសុខទុក្ខ និងនាំយកអំណោយរបស់ ឯកឧត្តម ហ៊ុន ម៉ានី ជូនដល់វីរកងទ័ពដែលកំពុងឈរជើងបំពេញភារកិច្ចការពារបូរណភាពទឹកដី តាមខ្សែបន្ទាត់ព្រំដែនកម្ពុជា ថៃ ក្នុងភូមិសាស្ត្រខេត្តព្រះវិហារ។

ឯកឧត្តម សុខ សប្បាយណា បានមាន ប្រសាសន៍ថា អំណោយដែលបាននាំយកមកឧបត្ថម្ភនាឱកាសនោះមាន ស្បៀងអាហារ គ្រឿងឧបភោគបរិភោគ សម្ភារប្រើប្រាស់ សម្ភារសំណង់ ថវិកា ក្រម៉ាខ្មែរ និងនំអំបុកជាច្រើនកំប៉ុង។ អ្វីដែលកាន់តែពិសេស និងមានអត្ថន័យជ្រាលជ្រៅបំផុតនោះ គឺប្រតិភូបានពាំនាំនូវ សារលិខិតសាកសួរសុខទុក្ខ ដែលជាសំណេរផ្ទាល់ដៃរបស់ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និងសំណេររបស់ ឯកឧត្តម ហ៊ុន ម៉ានី ព្រមទាំងសារលិខិតពីបងប្អូនប្រជា ពលរដ្ឋ និងបងប្អូនមានពិការភាព ផ្ញើជូនដល់វីរៈកងទ័ព ដើម្បីជាការលើកទឹកចិត្ត និងស្តែងឱ្យឃើញពីការដឹងគុណយ៉ាងជ្រាលជ្រៅបំផុត ចំពោះពលីកម្មដ៏ឧត្តុង្គឧត្តមរបស់បងប្អូនកងទ័ពក្នុងបុព្វហេតុការពារជាតិមាតុភូមិ ក្នុងឱកាសពិធី បុណ្យចូលឆ្នាំថ្មីប្រពៃណីជាតិខ្មែរដែលនឹងឈានចូលមកដល់នាពេលឆាប់ៗខាងមុខនេះ។

ឯកឧត្តម បានពាំនាំនូវប្រសាសន៍ផ្ដាំផ្ញើសាកសួរសុខទុក្ខក្តីស្រឡាញ់និងការនឹករលឹកយ៉ាងជ្រៅពីសំណាក់គ្រួសារ ស​ ស យ ក និងឯកឧត្តមប្រធាន ហ៊ុន ម៉ានី ជូនដល់បងប្អូនកងទ័ពយើងគ្រប់ៗគ្នា ។

 ឯកឧត្តមក៏បានបង្ហាញក្តីរីករាយដែលមានឱកាសបានឈរចំពោះមុខនិងថ្លែងអំណរគុណដោយផ្ទាល់ដើម្បីបានបង្ហាញពីការផ្ដាំផ្ញើក្តីស្រឡាញ់និងការនឹករលឹកចំពោះវីរៈកងទ័ពទាំងអស់គ្នា។

ឯកឧត្តម ក៏បានគូបញ្ជាក់ថា ក្នុងនាមជាយុវជន គឺចងចាំអស់មួយជីវិតនៅគុណបំណាញ់និងវីរភាពរបស់បងប្អូនកងទ័ពដែលបានឈរជើងយ៉ាងអង់អាចក្លាហានក្នុងបុព្វហេតុការពារជាតិមាតុភូមិ។

 ឯកឧត្តម គីម​ រិទ្ធី បានគូបញ្ជាក់យ៉ាងច្បាស់ថាថ្នាក់ដឹកនាំក៏ដូចជាប្រជាជននៅសមរភូមិក្រោយតែងតែយកចិត្តទុកដាក់គិតគូរពី សុខទុក្ខនិងនៅជាប់ជាមួយបងប្អូនកងទ័ពជានិច្ចទោះបីស្ថិតក្នុងកាលៈទេសៈណាក៏ដោយ ។ 

ឯកឧត្តមអភិបាលខេត្ត ក៏បានសំដែងនូវការកោតសរសើរដោយស្មោះស្ម័គ្រចំពោះស្មារតីទទួលខុសត្រូវខ្ពស់និងការរក្សាបាននូវវិន័យយ៉ាងខ្ជាប់ខ្ជួនរបស់បងប្អូនវិរៈកងទ័ពទាំងរបៀបរបបនៃការរស់នៅបែបផែននៃការស្លៀកពាក់ក៏ដូចជាសេចក្តីថ្លៃថ្នូរក្នុងនាមជាអ្នកការពារជាតិមាតុភូមិ សាកសមជាសសរទ្រូងដ៏រឹងមាំនៃខឿនការពារជាតិ ៕

ដោយ៖ ទិត ស្រ៊