AKP បន្ទាយមានជ័យថ្ងៃទី០៩ខែមេសាឆ្នាំ២០២៦--ក្នុងស្មារតីចងចាំ និងដឹងគុណចំពោះអ្នកមានគុណបំណាច់ និងការផ្តល់ភាពកក់ក្តៅដល់ប្រជាពលរដ្ឋដែលរងគ្រោះដោយសារភ្លើងសង្គ្រាម នាព្រឹកថ្ងៃទី០៩ ខែមេសា ឆ្នាំ២០២៦នេះ ឯកឧត្តម កែ គឹមយ៉ាន តំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រព្រមទាំង លោកជំទាវ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសូត្រមន្ត បង្សុកូល និងសំណេះ សំណាលសួរសុខទុក្ខជាមួយមនុស្សវ័យចាស់ អតីតនិវត្តន៍ជន និងជនមានពិការភាព។

ពិធីដែលពោរពេញដោយក្តីមេត្តាធម៌នេះ បានរៀបចំឡើងនៅទីតាំងពីរផ្សេងគ្នា រួមមាន មណ្ឌលជនភៀសសឹកក្នុងវត្តច័ន្ទស៊ី ស្រុកអូរជ្រៅ និងមណ្ឌលភៀសសឹកឃុំស្លក្រាម ស្រុកស្វាយចេក ខេត្តបន្ទាយមានជ័យ ដោយមានការចូលរួមពី ឯកឧត្តម លោកជំទាវ អ្នកតំណាងរាស្ត្រ ឯកឧត្តម អ៊ុ រាត្រី អភិបាលខេត្តបន្ទាយមានជ័យ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និងថ្នាក់ដឹកនាំជាច្រើនរូបទៀត។
    
ក្នុងឱកាសសំណេះសំណាលដ៏មានអត្ថន័យនោះ ឯកឧត្តម កែ គឹមយ៉ានបានពាំនាំនូវការសួរសុខទុក្ខដោយក្តីនឹករលឹកបំផុតពីសំណាក់សម្ដេចតេជោ ហ៊ុន សែនប្រធានព្រឹទ្ធសភា និងសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនចំពោះបងប្អូនប្រជាពលរដ្ឋទាំងអស់។

 ឯកឧត្តមបានគូសបញ្ជាក់ថា រាជរដ្ឋាភិបា លកម្ពុជាមិនដែលបោះបង់ចោលប្រជាពលរដ្ឋណាម្នាក់ឡើយ ជាពិសេសបងប្អូនពលរដ្ឋភៀសសឹកដែលធ្លាប់បានឆ្លងកាត់ការលំបាក និងការរងគ្រោះពីសង្គ្រាមឈ្លានពានលើដែនអធិបតីភាពកម្ពុជាកាលពីកន្លងមក។

ឯកឧត្តមបានមានប្រសាសន៍សង្កត់ធ្ងន់ថា«ការចុះមកសួរសុខទុក្ខ និងរៀបចំពិធីតាមបែបសាសនានាពេលនេះ គឺជាការបង្ហាញឱ្យឃើញនូវការយកចិត្តទុកដាក់ខ្ពស់បំផុតលើសុខុមាលភាព និងជីវភាពរស់នៅរបស់ចាស់ព្រឹទ្ធាចារ្យ អតីតយុទ្ធជន និងបងប្អូនមានពិការភាព។ បងប្អូនគឺជាសាក្សីរស់នៃប្រវត្តិសាស្ត្រ ហើយការលះបង់របស់បងប្អូនក្នុងការឈរជើងការពារទឹកដី គឺមានតម្លៃមិនអាចកាត់ថ្លៃបាន»។  
 ទន្ទឹមនឹងការសួរសុខទុក្ខ ឯកឧត្តម កែ គឹមយ៉ាន និងលោកជំទាវ ក៏បានរៀបចំពិធីសូត្រមន្ត បង្សុកូល ដើម្បីឧទ្ទិសកុសលផលបុណ្យជូនដល់បុព្វការីជន និងយុទ្ធជនដែលបានពលីជីវិតក្នុងបុព្វហេតុជាតិមាតុភូមិ។ 

ជាមួយគ្នានេះ ឯកឧត្តមបានផ្តាំផ្ញើឱ្យអាជ្ញាធរគ្រប់លំដាប់ថ្នាក់ បន្តតាមដាន និងជួយសម្រួលរាល់ការលំបាកនានារបស់ពលរដ្ឋក្នុងមណ្ឌលភៀសសឹកទាំងនេះឱ្យបានទាន់ពេលវេលា ជាពិសេសការធានាឱ្យបាននូវសេវាសុខាភិបាល និងសុវត្ថិភាពសង្គម។

ភាពស្និទ្ធស្នាល និងកាយវិការសប្បុរសធម៌របស់ ឯកឧត្តម និងលោកជំទាវ ក្នុងថ្ងៃនេះ មិនត្រឹមតែបានផ្តល់នូវសម្ភារឧបត្ថម្ភ និងថវិកាប៉ុណ្ណោះទេ ប៉ុន្តែបានក្លាយជាកម្លាំងចិត្តដ៏ធំធេងសម្រាប់មនុស្សវ័យចាស់ និងជនមានពិការភាព ឱ្យមានក្តីសង្ឃឹម និងភាពកក់ក្តៅក្នុងសហគមន៍ក្រោមម្លប់នៃសន្តិភាព៕

ដោយ ៖ឈុនសារ៉ាត