AKP ភ្នំពេញ ថ្ងៃទី០៩ ខែមេសា ឆ្នាំ២០២៦-- ឯកឧត្ដម ឧត្តមសេនីយ៍ឯក ជួន ណារិន្ទ ស្នងការដ្ឋាននគរបាលរាជធានីភ្នំពេញ បានបញ្ជាក់ថា អាជ្ញាធររាជធានីភ្នំពេញបានត្រៀមប្រើប្រាស់កម្លាំងជាង៣៦០០នាក់ ដើម្បីការពារសន្តិសុខ សណ្ដាប់ធ្នាប់ និងសុវត្ថិភាព ជូនភ្ញៀវទេសចរ ក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំមមី អដ្ឋស័ក ព.ស.២៥៧០ គ.ស.២០២៦ និងចូលរួមថែរក្សាការពារទំនៀមទម្លាប់ប្រពៃណី វប្បធម៌ដ៏ល្អផូរផង់របស់ជាតិ ទាក់ទាញភ្ញៀវទេសចរជាតិ-អន្តរជាតិ ជាពិសេសបង្ហាញពីការដឹងគុណយ៉ាងជ្រាលជ្រៅ និងផ្សារភ្ជាប់ពិធីបុណ្យចូលឆ្នាំថ្មីនេះដែរ យើងក៏មិនត្រូវភ្លេចវីរកងកម្លាំងជួរមុខ និងបងប្អូនភៀសសឹក ក្រោមស្មារតីការរួបរួមសាមគ្គីនៃមហាគ្រួសារខ្មែរតែមួយផងដែរ។

ឯកឧត្ដមបានបន្ដថា កម្លាំងទាំងនេះនឹងបែងចែកជាក្រុមសម្រួលចរាចរណ៍ ការពារកន្លែងជួបជុំ ជួយអន្ដរាគមន៍ភ្លាមៗឱ្យទាន់ពេលវេលា ពេលមានហេតុការណ៍កើតឡើង និងកម្លាំងអន្តរាគមន៍ពិសេស ដើម្បីធានាភាពសប្បាយរីករាយជូនបងប្អូនយើងរយៈពេល៦ថ្ងៃ ដែលបងប្អូនប្រជាពលរដ្ឋ អញ្ជើញមកទស្សនាកម្សាន្ដសង្ក្រាននៅរាជធានីភ្នំពេញ មាន៦ទីតាំង រួមមាន៖ ១. នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ២. តំបន់ជុំវិញវត្តភ្នំ ៣. បរិវេណសួនច្បារវឌ្ឍនៈសួនច្បារអតីតទីលានប្រជាធិបតេយ្យ ៤. ស្ពាននាគភ្លោះរមណីយដ្ឋានវត្តភ្នំរហូតដល់ផ្សាររាត្រី ៥. ផ្លូវថ្មើរជើងចតុមុខរាជធានីភ្នំពេញ (Walk Street) រហូតបរិវេណបាសាក់លែន (Bassac Lane) និង៦. បរិវេណផ្សារទួលទំពូង។

ឯកឧត្ដម ឃួង ស្រេង អភិបាលរាជធានីភ្នំពេញ បានបញ្ជាក់ឱ្យដឹងក្នុងកិច្ចប្រជុំគណៈបញ្ជាការឯកភាព ថា ដើម្បីត្រៀមរៀមចំទទួលភ្ញៀជាតិ អន្ដរជាតិ ចូលទស្សនាកម្សាន្តក្នុងព្រឹត្តិការណ៍ (នគរសង្ក្រាន្ត) នៅតាមទីតាំងទាំង៦កន្លែងដោយសប្បាយរីករាយ ក្រោមម្លប់សន្តិភាពដ៏ត្រជាក់ត្រជំ និងក្រោមស្មារតីសាមគ្គីភាព ឯកភាព និងភាពធន់។ ទន្ទឹមនេះ ដើម្បីឱ្យការរៀបចំព្រឹត្តិការណ៍នេះប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈល្អប្រសើរ ព្រមទាំងបញ្ចៀសបាននូវការកកស្ទះចរាចរណ៍នៅជុំវិញទីតាំង រៀបចំព្រឹត្តិការណ៍ អាជ្ញាធរមានសមត្ថមកិច្ចបានរៀបចំចំណតយានយន្តគ្រប់ប្រភេទជូន សម្រាប់បងប្អូនប្រជាពលរដ្ឋដែលមកចូលរួម កម្សាន្តក្នុងព្រឹត្តិការណ៍ នគរសង្ក្រាន្ត ហើយសូមលើកទឹកចិត្តដល់បងប្អូនប្រជាពលរដ្ឋដែលពុំមានការចាំបាច់ សូមធ្វើការពង្វាងការធ្វើដំណើរឆ្លងកាត់បរិវេណទីតាំងខាងលើផងដែរ។

ឯកឧត្តម ឃួង ស្រេង ក៏បានណែនាំឱ្យអាជ្ញាធរមូលដ្ឋានជួយផ្សព្វផ្សាយដល់ក្រុមហ៊ុនឯកជននានា តាមភោជនីយដ្ឋាន និងស្ថាប័នពាក់ព័ន្ធ រៀបចំតុបតែងតាំងលម្អ ភ្លើងពណ៌ ទង់ជាតិ ទង់ជ្វាលាហើយតាមផ្ទះប្រជាពលរដ្ឋត្រូវដាក់ទង់ជាតិគ្រប់ផ្ទះដើម្បីទទួលទេវតាឆ្នាំថ្មី។ មន្ទីរសាធារណការបានបូមលូ បំបាត់ក្លិនស្អុយ និងសហគ្រាសសំណល់រឹងគិតគូរពីការប្រមូលសំរាមនៅទីតាំងសប្បាយភាពទាំងអស់នេះជា ពិសេសធុងសំរាមកុំឱ្យហៀរធ្លាក់ផងដែរ ក្នុងនោះដែរអាជ្ញាធរខណ្ឌត្រូវណែនាំប្រជាពលរដ្ឋមុនចេញពីផ្ទះត្រូវពន្លត់ភ្លើងទៀន ធូប បិទភ្លើងដើម្បីទប់ស្កាត់គ្រោះថ្នាក់អគ្គិភ័យ។

លោក ចាប ឌីណា អភិបាលរងខណ្ឌដូនពេញ ទទួលផ្នែកសន្ដិសុខ សណ្ដាប់ធ្នាប់សាធារណៈ បានបញ្ជាក់ឱ្យដឹងថា អាជ្ញាធរខណ្ឌរួមជាមួយសង្កាត់ យើងត្រៀមកម្លាំង៥០០នាក់ ដោយបែងចែកជា៥ក្រុម ក្នុងមួយក្រុម១០០នាក់។ ក្រុមទី១. ទទួលផ្នែកសន្ដិសុខ សណ្ដាប់ធ្នាបសាធារណៈ និងសង្គ្រោះបន្ទាន់។ទី២. ទទួលផ្នែកបរិស្ថាន។ ក្រុមទី៣. ទទួលផ្នែកអប់រំព័ត៌មានតាមបណ្ដាគោលដៅសំខាន់ៗនៃពិធីកន្លែងសប្បាយភាពនគរសង្ក្រាន្តទាំង៦ទីតាំង។ ក្រុមទី៤. ទទួលរៀបចំសណ្ដាប់ធ្នាប់ទូទៅ និងទី៥. ទទួលសម្រួលចរាចរណ៍តាមបណ្ដាគោលដៅសំខាន់ៗនៃពិធីនេះផងដែរ។

លោក ដោ សម្ផស្ស អ្នកនាំពាក្យសាលារាជធានីភ្នំពេញ បានបញ្ជាក់ឱ្យដឹងថា សម្រាប់កម្មវិធីសប្បាយយភាពនគរសង្ក្រាន្ត៣ថ្ងៃ ចាប់ពីថ្ងៃទី១៤ ដល់១៦ ខែមេសា ២០២៦នេះ យើងមានកម្មវិធីនៅវត្ដភ្នំ យើងល្បែងប្រជាប្រិយថ្ងៃទី១៖ វាយក្អម បោះអង្គុញ លោតបាវ ដណ្ដើមស្លឹកឈើ លាក់កន្សែង ស្ដេចចង់ និងទាញព្រ័ត្រ ចូលរួមលេងដោយមន្ទីរវប្បធម៌ និងវិចិត្រសិល្បៈរាជធានីភ្នំពេញ។ ដល់យប់យើងមានល្ខោនបាក់នៅមុខវត្ដបទុមវតី និងនៅផ្លូវថ្មើឈើង (Walk Street) និងចាប៉ីដងវែង សម្ដែងដោយមន្ទីរវប្បធម៏ និងវិចិត្រសីល្បៈរាជធានីភ្នំពេញ។ សម្រាប់ថ្ងៃទី២. ពេលថ្ងៃត្រង់ យើងលេងល្បែងប្រជាប្រិយនៅវត្ដភ្នំ យើងមានកម្មវិធីសម្បាយភាពដូចថ្ងៃទី១ដែរ និងកម្មវិធីថ្ងៃទី៣ យើងក៏មានលេងល្បែងប្រជាប្រិយដែរ៕

ដោយ សួស សំរិត