AKP កំពង់ចាម ថ្ងៃទី០៩ មេសាឆ្នាំ២០២៦--ដើម្បីចូលរួមលើកកម្ពស់សុវត្ថិភាពចរាចរណ៍ផ្លូវគោក  ក្នុងឱកាសថ្ងៃបុណ្យចូលឆ្នាំខ្មែរ ប្រពៃណីជាតិ  សាខាកាកបាទក្រហមកម្ពុជាខេត្តកំពង់ចាម បានធ្វើយុទ្ធនាការ អប់រំផ្សព្វផ្សាយ ស្តីពី ការចូលរួមលើកកម្ពស់សុវត្ថិភាពចរាចរណ៍ផ្លូវគោក។

ឯកឧត្តម ទូច ឆៃ នាយកសាខាកាបាទក្រហមកម្ពុជាខេត្តកំពង់ចាម តំណាងដ៏ខ្ពង់ខ្ពស់ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានដឹកនាំក្រុមប្រតិបត្តិសាខា អនុសាខា ស្រុក ទីប្រឹក្សាយុវជន  និង យុវជនកាកបាទក្រហមកម្ពុជា មកពី ២វិទ្យាល័យ និងអ្នកស្ម័គ្រចិត្តកាកបាទក្រហមកម្ពុជាខេត្ត សហការជាមួយសមត្ថកិច្ចនគរបាលចរាចរណ៍ និងគណ:កម្មាធិការខេត្ត សុវត្ថិភាពចរាចរណ៍ផ្លូវគោកបានដឹកនាំធ្វើយុទ្ធ នាការក្នុង រយៈពេល២ថ្ងៃគឺថ្ងៃទី ៧ និងថ្ងៃទី ៨ ខៃមេសា ឆ្នាំ២០២៦ នៅតាម បណ្តាភ្លើងស្តុប ក្នុងស្រុកជើង ព្រៃ( ស្គន់)    និងស្រុកចំការលើ ត្រង់ ( ផ្សារថ្នល់បំបែក)។
      
ក្នុងឱកាសនៃកាធ្វើ យុទ្ធនាការឯកឧត្តម ទូច ឆៃ នាយកសាខា បាន ធ្វើការអំពាវនាវ ដល់ពលរដ្ឋ អ្នកប្រើប្រាស់ផ្លូវទាំងឡាយ សូមចូលរួមគោរពច្បាប់ចរាចរណ៍អោយបានគ្រប់ៗគ្នា , ពេលបើកបរ សូមពាក់មួក ឬ ដាក់ខ្សែក្រវ៉ាត់សុវត្ថិភាព , បើកបរ កុំអោយលើសល្បឿនកំណត់ ពិសេស ពេលបើកបរ សូមកុំនិយាយទូរស័ព្ទ កុំពិសារគ្រឿងស្រវឹង ហើយត្រូវអនុវត្តអោយបានខ្ជាប់ខ្ជួន នូវសាររបស់ សម្តេចតេជោ អតីតនាយករដ្ឋមន្ត្រី ដែលស្ថិតនៅជាធរមាន " ថ្ងៃនេះ ថ្ងៃស្អែក កុំអោយមានគ្រោះថ្នាក់ចរាចរណ៍ " ។
     
ឯកឧត្តមនាយកសាខាបានឲ្យដឹងថារយ:ពេល ២ ថ្ងៃ នៃយុទ្ធនាការ សាខា បានចែកខិតប័ណ្ណអប់រំសុវត្ថិភាពចរាចណ៍ចំនួន ៥មុខ ស្មើនឹង ៥៨០ ក្បាល ។អប់រំអ្នកមិនពាក់មួកសុវត្ថិភាព ចំនួន២៩២ នាក់( ស្រី១៦៧នាក់)  ។ បិទ sticker ចំណាំង ផ្លាតលើ ម៉ូតូ, រ៉ឺម៉កសណ្តោង , pass app ចំនួន ២០០សន្លឹក  និង មានអ្នកចូលរួមទទួលផល សរុប ចំនួន ២,៤៩៦នាក់   ( ស្រី ១៣៤៦នាក់ ) ក្នុងនេះ មានរថយន្ត ៥០៣គ្រឿង និង ម៉ូតូចំនួន ៨២៥គ្រឿង ៕ 

ដោយ៖ឆាយម៉ុត