AKP ភ្នំពេញ ថ្ងៃទី ០៩ ខែមេសា ឆ្នាំ២០២៦-- ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគខេត្តព្រះសីហនុ បានដឹកនាំកិច្ចប្រជុំអន្តរក្រសួង-ស្ថាប័ន ដើម្បីពិនិត្យ និងពិភាក្សាលើលទ្ធផលនៃការសិក្សាស្រាវជ្រាវអំពីទំហំ និងប្រភេទនៃសំណល់គ្រឿងអេឡិចត្រូនិក និងបរិក្ខារអគ្គិសនី ក្នុងគោលបំណងកែច្នៃឱ្យក្លាយទៅជាវត្ថុធាតុមានតម្លៃ។

កិច្ចប្រជុំនេះមានការអញ្ជើញចូលរួមពីថ្នាក់ដឹកនាំ និងតំណាងក្រសួង-ស្ថាប័នពាក់ព័ន្ធ រួមមាន៖ ក្រសួងបរិស្ថាន, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, រដ្ឋបាលខេត្តព្រះសីហនុ ព្រមទាំងមន្ត្រីជំនាញពាក់ព័ន្ធជាច្រើនរូបទៀតកាលពីថ្ងៃទី ៨ ខែ មេសា ឆ្នាំ ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ។

ក្នុងឱកាសនោះ ឯកឧត្តមបណ្ឌិតសភាចារ្យ បានគូសរំលេចអំពីសារៈសំខាន់នៃការសិក្សាស្រាវជ្រាវស៊ីជម្រៅលើសំណល់អេឡិចត្រូនិក និងបរិក្ខារអគ្គិសនីដែលមាននៅក្នុងស្រុក ដើម្បីរៀបចំផែនការប្រមូលទុកដាក់ឱ្យបានត្រឹមត្រូវតាមស្តង់ដារបច្ចេកទេស និងក្រមបរិស្ថាន។ ការសិក្សានេះផ្ដោតសំខាន់លើការទាញយកធាតុចូលសម្រាប់ផលិតកម្មកែច្នៃ ដើម្បីចម្រាញ់ចេញជាវត្ថុធាតុមានតម្លៃជាអាទិ៍៖ ស័ង្កសី, ស្ពាន់, អង់ទីម៉ូនី, កាដ្យូម, មាស, ប្រាក់ និងប្លាទីន ជាដើម។

ឯកឧត្តមប្រធានក្រុមការងារ បានបញ្ជាក់បន្ថែមថា ទិន្នន័យទាំងនេះរឹតតែមានសារៈសំខាន់សម្រាប់ក្រុមហ៊ុនដែលបានដាក់ទុនវិនិយោគលើការកែច្នៃកាកសំណល់ក្នុងស្រុក។

ក្នុងន័យនេះ ឯកឧត្តមបានជំរុញឱ្យមានកិច្ចសហការជិតស្និទ្ធរវាងក្រសួង -ស្ថាប័នពាក់ព័ន្ធ និងក្រុមការងារ ដើម្បីបន្តសិក្សាស្រាវជ្រាវឱ្យកាន់តែស៊ីជម្រៅ ដែលនឹងក្លាយជាទិន្នន័យមូលដ្ឋានសម្រាប់ការវិភាគ និងការព្យាករជូនដល់រាជរដ្ឋាភិបាល ក៏ដូចជាវិនិយោគិន ក្នុងការធ្វើសេចក្តីសម្រេចចិត្តប្រកបដោយប្រសិទ្ធភាព និងភាពគ្រប់ជ្រុងជ្រោយ។

ជាលទ្ធផល អង្គប្រជុំបានសម្តែងនូវការគាំទ្រទាំងស្រុង និងឯកភាពជាស្មារតីរួមក្នុងការប្រមូលផ្ដុំទិន្នន័យ និងសិក្សាស៊ីជម្រៅអំពីសំណល់អេឡិចត្រូនិកក្នុងស្រុក។ 

ទន្ទឹមនឹងនេះ គ្រប់ភាគីពាក់ព័ន្ធបានត្រៀមខ្លួនរួចរាល់ក្នុងការចូលរួមសិក្សាស្រាវជ្រាវដ៏មានសារៈសំខាន់នេះ ដើម្បីបម្រើឱ្យផលប្រយោជន៍សេដ្ឋកិច្ច និងការការពារបរិស្ថាននៅកម្ពុជា៕

 ដោយ៖ ទូច វលក័្ខណ (ប្រភព៖ ក្រសួងសេដ្ឋកិច្ច)