AKP បន្ទាយមានជ័យថ្ងៃទី០៩  ខែមេសា ឆ្នាំ២០២៦--ក្នុងស្មារតីលើកកម្ពស់គុណភាពសេវាសាធារណៈលើវិស័យសុខាភិបាល ឯកឧត្ដម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានដាក់ចេញនូវបទបញ្ជាយ៉ាងម៉ឺងម៉ាត់ដល់មន្ត្រីសុខាភិបាល និងគ្រូពេទ្យទាំងអស់ ត្រូវបន្តយកចិត្តទុកដាក់បម្រើសេវាសុខភាពជូនប្រជាពលរដ្ឋឱ្យបានល្អប្រសើរ ប្រកបដោយក្រមសីលធម៌ខ្ពស់ និងស្មារតីទទួលខុសត្រូវ។

ការថ្លែងបែបនេះ បានធ្វើឡើងក្នុងឱកាសដែលឯកឧត្តមអភិបាលខេត្ត អញ្ជើញជាអធិបតីភាពក្នុងពិធីប្រកាសចូលកាន់មុខតំណែង អនុប្រធានមន្ទីរពេទ្យបង្អែក និងប្រធាន-អនុប្រធានមណ្ឌលសុខភាព សរុបចំនួន ២០ រូប ចំណុះឱ្យមន្ទីរសុខាភិបាលនៃរដ្ឋបាលខេត្តបន្ទាយមានជ័យ នារសៀលថ្ងៃទី០៨ ខែមេសា ឆ្នាំ២០២៦ នៅសាលប្រជុំផ្ការំដួល។

នៅក្នុងឱកាសនោះ ឯកឧត្ដម អ៊ុំ រាត្រី បានសម្តែងនូវការអបអរសាទរចំពោះមន្ត្រីទាំង ២០ រូប ដែលទទួលបានការទុកចិត្តតែងតាំងនាពេលនេះ។ ឯកឧត្តមបានសង្កត់ធ្ងន់ថា ការទទួលបានមុខតំណែងថ្មី គឺជាការទទួលខុស  ត្រូវថ្មីបន្ថែមទៀត ក្នុងការបម្រើជាតិ និងប្រជាជន។ 

ឯកឧត្តមបានណែនាំចំណុចគន្លឹះៗរួមមានសាមគ្គីភាពផ្ទៃក្នុងថ្នាក់ដឹកនាំដែលទើបតែងតាំង ត្រូវចេះសហការគ្នា និងកសាងសាមគ្គីភាពផ្ទៃក្នុងឱ្យបានល្អ ដើម្បីធានាបាននូវដំណើរការការងាររលូន។

ក្រមសីលធម៌វិជ្ជាជីវៈត្រូវយកចិត្តទុកដាក់ចំពោះអ្នកជំងឺដោយស្មើភាព មិនរើសអើង និងប្រើប្រាស់សម្តីផ្អែមល្ហែម ផ្តល់ភាពកក់ក្តៅដល់ពលរដ្ឋដែលមកទទួលសេវា។ការអភិវឌ្ឍសមត្ថភាព ត្រូវបន្តសិក្សារៀនសូត្រ បច្ចេកវិទ្យាវេជ្ជសាស្ត្រថ្មីៗ ដើម្បីឆ្លើយតបទៅនឹងការវិវត្តនៃជំងឺផ្សេងៗ។

ជាមួយគ្នានោះដែរ លោកវេជ្ជបណ្ឌិត ឡេច័ន្ទ សង្វាត ប្រធានមន្ទីរសុខាភិបាលនៃរដ្ឋបាលខេត្ត បានធ្វើរបាយការណ៍បង្ហាញពីវឌ្ឍនភាពគួរឱ្យកត់សម្គាល់នៃវិស័យសុខាភិបាលក្នុងខេត្តបន្ទាយ មានជ័យ។

លោកវេជ្ជបណ្ឌិតបានបញ្ជាក់ថា ក្រោមការដឹកនាំរបស់រាជរដ្ឋាភិបាល និងការគាំទ្រពីអភិបាលខេត្ត វិស័យសុខាភិបាលក្នុងខេត្តមានការរីកចម្រើនយ៉ាងខ្លាំង ទាំងផ្នែកហេដ្ឋារចនាសម្ព័ន្ធ មន្ទីរពេទ្យ មណ្ឌល សុខភាព ការបំពាក់ឧបករណ៍វេជ្ជសាស្ត្រទំនើបៗ និងការបណ្តុះ បណ្តាលធនធានមនុស្ស។ ភាពរីកចម្រើននេះ បានធ្វើឱ្យការផ្តល់សេវាសុខាភិបាលកាន់តែកៀកជិតប្រជាពលរដ្ឋនៅតាមមូលដ្ឋាន កាត់បន្ថយការចំណាយ និងពេលវេលារបស់ពួកគាត់បានយ៉ាងច្រើន។ 

ពិធីប្រកាសចូលកាន់មុខតំណែងនេះ ក៏មានការអញ្ជើញចូលរួមជាកិត្តិយសពីសំណាក់ ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត, លោក-លោកស្រីអភិបាលរងខេត្ត, មេឃុំ-ចៅសង្កាត់, ប្រធាន-អនុប្រធានមន្ទីរជុំវិញខេត្ត ព្រមទាំងថ្នាក់ដឹកនាំ និងមន្ត្រីរាជការនៃវិស័យសុខាភិបាលយ៉ាងច្រើនកុះករ។   

ជាមួយនោះ ឯកឧត្តមអភិបាលខេត្ត បានរំលឹកថា សុខភាពគឺជាទ្រព្យសម្បត្តិដ៏មានតម្លៃបំផុតរបស់ប្រជាពលរដ្ឋ ដូច្នេះគ្រូពេទ្យគឺជាបង្អែកដ៏សំខាន់ ដែលត្រូវតែពង្រឹងគុណភាពព្យាបាលឱ្យបានជាប្រចាំ ដើម្បីឆ្លើយតបទៅនឹងជំនឿទុកចិត្តរបស់រាជរដ្ឋាភិបាល និងសាធារណជន៕

ដោយ ៖ឈុនសារ៉ាត