AKPកំពង់ធំ ថ្ងៃទី០៩ ខែមេសាឆ្នាំ២០២៦--ក្រុមការងារឥស្សរជនឆ្នើមថ្នាក់សាខាកាកបាទក្រហមកម្ពុជាខេត្តកំពង់ធំដឹកនាំដោយលោកជំទាវ លឹម មួយស្រៀន នួនផារ័ត្ន អនុប្រធានកិត្តិយសសាខាកាកបាទក្រហមកម្ពុជា ខេត្តកំពង់ ធំ អមដំណើរដោយលោកជំទាវ លំ គន្ធារី អនុប្រធានអចិន្ត្រៃយ៍គណៈកម្មាធិការសាខា លោក លោកស្រីមន្ត្រីក្រុមប្រតិ បត្តិសាខា មន្ត្រីអនុសាខាបានអញ្ជើញចុះជួបសំណេះសំណាងសួរសុខទុក្ខនិងចែកអំណោយមនុស្សធម៌ព្រមទាំងកញ្ចប់ឃីតស្ត្រីដល់ស្ត្រីសម្រាលកូនតូចនិងស្ត្រីមានផ្ទៃពោះចំនួន៥០នាក់នៅមន្ទីរពេទ្យបង្អែកបារាយណ៍-សន្ទុកស្រុកបារាយណ៍ ខេត្តកំពង់ធំកាលពីរសៀលថ្ងៃទី០៨ ខែមេសា ឆ្នាំ២០២៦។ 

ជាមួយគ្នានេះដែរលោកជំទាវ លំ គន្ធារី អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្តកំពង់ ធំបានអានសារលិខិតរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាដើម្បីស្ត្រីសម្រាល កូនតូចស្ត្រីមានផ្ទៃ ពោះចេះរក្សាសុខភាពអនាម័យដល់កូនចៅមានសុខភាពល្អនិងបញ្ញាវាងវៃ។

លោកជំទាវ លឹម មួយស្រៀន នួនផារ័ត្នបានមានប្រសាសន៍សំណេះសំណាលនិងអប់រំផ្សព្វផ្សាយអំពីការថែទាំសុខភាព ពិសេសស្ត្រីមានផ្ទៃពោះទាំងអស់ទៅទទួលការពិនិត្យផ្ទៃពោះឱ្យបានយ៉ាងតិច៤ដងតាមពេលវេលាកំណត់មុននឹងសម្រាលស្របតាម ប្រធានបទ"រួមគ្នាលើកកម្ពស់គុណភាព សុវត្ថិភាព ប្រសិទ្ធភាពនៃការថែទាំផ្ទៃ ពោះមុនសម្រាលព្រមទាំងក្នុងបរិបទមានគ្រោះអាសន្នឬគ្រោះមហន្តរាយដើម្បីធានាថាទាំងម្ដាយនិងទារកមានសុខភាពល្អ"។ 

សូមបញ្ជាក់ថាអំណោយមនុស្សធម៌ក្នុងម្នាក់ទទួលបានអង្ករចំនួន២៥គីឡូក្រាម មី១កេសត្រីខ១យួរទឹកត្រី១យួរ ទឹកស៊ី អ៊ីវ១យួរកន្សែងពោះគោ១សារុង១ ម្សៅលាបខ្លួនកូនក្មេង១កំប៉ុង សាប៊ូកក់សក់កូនក្មេង១ដប ឈុតមួកស្រោមដៃស្រោមជើងមួយកំប្លែនិងថវិកាមួយចំនួនផងដែរ៕

ដោយ៖ ស៊ុម វណ្ណា