AKPតាកែវ ថ្ងៃទី០៩ ខែមេសាឆ្នាំ២០២៦--ដើម្បីជួយសម្រួលដល់ការលំបាករបស់បងប្អូនប្រជាពលរដ្ឋក្រីក្រក្នុងមូលដ្ឋាន ក្នុងស្មារតីសាមគ្គីភាពនិងការចែករំលែកក្ដីស្រឡាញ់ ក្នុងឱកាសអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ។

លោក គិន ភក្ដី អភិបាលនៃគណៈអភិបាលស្រុកកោះអណ្តែត បានរៀបចំពិធីជួបសំណេះសំណាលសួរសុខទុក្ខ និងនាំយកអំណោយមនុស្សធម៌ចែកជូនបងប្អូនប្រជាពលរដ្ឋដែលមានជីវភាពក្រីក្រចំនួន ៥០គ្រួសារ។អញ្ជើញចូលរួមក្នុងពិធីនោះដែរដោយ លោក លោកស្រីអភិបាលរងស្រុកកោះអណ្ដែត ថ្នាក់ដឹក នាំ មន្ត្រីរាជការ និងប្រជាពលរដ្ឋចូលរួមជាច្រើនរូបផងដែរ។

ពិធីនេះរៀបចំឡើងនៅសាលប្រជុំរដ្ឋបាលស្រុកកោះអណ្ដែតខេត្តតាកែវ កាលពីព្រឹកថ្ងៃពុធ៦រោចខែចេត្រឆ្នាំម្សាញ់សប្ដស័កព.ស២៥៦៩ ត្រូវនឹងថ្ងៃទី០៨ខែមេសាឆ្នាំ២០២៦។

មានប្រសាសន៍សំណេះសំណាលក្នុងពិធីនោះ លោក គិន ភក្ដី អភិបាលនៃគណៈអភិបាលស្រុកកោះអណ្ដែត បានពាំនាំនូវប្រសាសន៍សាកសួរសុខទុក្ខពីសំណាក់ថ្នាក់ដឹកនាំខេត្ត ជាពិសេសការយកចិត្តទុកដាក់ខ្ពស់ចំពោះជីវភាពរស់នៅរបស់បងប្អូនប្រជាពលរដ្ឋនៅតាមមូលដ្ឋាន។ទោះបីអំណោយទាំងនេះមានចំនួនមិនច្រើនក្ដី ប៉ុន្តែវាគឺជាសក្ខីភាពនៃទឹកចិត្ត និងការរួមសុខរួមទុក្ខរបស់អាជ្ញាធរជាមួយបងប្អូនប្រជាពលរដ្ឋ ដើម្បីឱ្យបងប្អូនបានសប្បាយរីករាយ និងមានភាពកក់ក្ដៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមីអដ្ឋស័កព.ស២៥៧០ ដែលនឹងឈានចូលមកដល់នាពេលឆាប់ៗខាងមុខ។

លោកអភិបាលស្រុកកោះអណ្ដែត ក៏បានផ្ដាំផ្ញើដល់បងប្អូនប្រជាពលរដ្ឋទាំងអស់ ឱ្យបន្តយកចិត្តទុកដាក់ថែរក្សាសុខភាព បង្កើនការដាំដុះនិងប្រកបរបរចិញ្ចឹមជីវិតឱ្យកាន់តែរីកចម្រើន។ព្រមទាំងបានជូនពរដល់បងប្អូនទាំងអស់ ឱ្យទទួលបាននូវសេចក្ដីសុខ សេចក្ដីចម្រើន និងជួបប្រទះនូវពុទ្ធពរទាំងបួនប្រការ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរនេះផងដែរ។

សកម្មភាពមនុស្សធម៌នេះ បានធ្វើឱ្យបងប្អូនប្រជាពលរដ្ឋទាំង៥០គ្រួសារ សម្ដែងនូវក្ដីរំភើបរីករាយ និងថ្លែងអំ ណរគុណយ៉ាងជ្រាលជ្រៅ ចំពោះលោកអភិបាលស្រុកនិងក្រុមការងារ ដែលតែងតែគិតគូរនិងមិនបោះបង់បងប្អូនដែលមានជីវភាពខ្វះខាតឡើយ ។

 អំណោយដែលបានចែកជូន ដល់បងប្អូនប្រជាពលរដ្ឋក្រីក្រទាំង៥០ គ្រួសារក្នុងពេលនោះ ដោយមួយគ្រួសារៗទទួលបាន អង្ករ២៥គីឡូក្រាម មី១កេស ត្រីខ១យួរទឹកត្រី១យួរ និងថវិកាចំនួន២០០០០រៀលផងដែរ ៕

ដោយ៖ អ៊ុច សៀង