AKP ភ្នំពេញ ថ្ងៃទី០៩ ខែមេសា ឆ្នាំ២០២៦ -- លោកឧបនាយករដ្ឋមន្ត្រីសិង្ហបុរី លោក ហ្កាន់ គីមយ៉ុង (Gan Kim Yong) បានព្រមានថា សេដ្ឋកិច្ចរបស់ប្រទេសសិង្ហបុរីអាចនឹងធ្លាក់ចុះនៅក្នុងត្រីមាសខាងមុខ ខណៈដែលអតិផរណាអាចលើសពីការព្យាករណ៍ពីមុន ខណៈដែលជម្លោះដ៏អូសបន្លាយនៅមជ្ឈិមបូព៌ានៅតែបន្តជះឥទ្ធិពលដល់ទស្សនវិស័យសកលលោក។

លោកបានប្រាប់សភាកាលពីពេលថ្មីៗនេះថា ផលប៉ះពាល់នៃការរំខានដល់ការផ្គត់ផ្គង់ និងតម្លៃថាមពលខ្ពស់ ក៏ដូចជាវត្ថុធាតុដើមនឹងហូរកាត់សេដ្ឋកិច្ច ដែលជំរុញឱ្យថ្លៃដើមអាជីវកម្ម និងការដឹកជញ្ជូន និងតម្លៃអ្នកប្រើប្រាស់កើនឡើង។

ដោយសារជម្លោះដែលពាក់ព័ន្ធនឹងសហរដ្ឋអាមេរិក អ៊ីស្រាអែល និងអ៊ីរ៉ង់ចូលដល់សប្តាហ៍ទីប្រាំមួយរបស់ខ្លួន ប្រទេសសិង្ហបុរីកំពុងរងទុក្ខរួចទៅហើយពីតម្លៃប្រេងសាំង និងថ្លៃអគ្គិសនីខ្ពស់។ លោក ហ្កាន់ បាននិយាយថាប្រសិនបើជម្លោះនេះអូសបន្លាយ អតិផរណាខ្ពស់នៅក្នុងទីផ្សារប្រភពរបស់ប្រទេសសិង្ហបុរីក៏អាចនាំឱ្យមានការកើនឡើងនៃតម្លៃនាំចូលបន្ថែមទៀតតាមពេលវេលាផងដែរ។

លោក ហ្កាន់ ដែលជារដ្ឋមន្រ្តីក្រសួងពាណិជ្ជកម្ម និងឧស្សាហកម្ម(MTI) បាននិយាយថា ក្រសួងរបស់លោកនឹងបន្តតាមដានការអភិវឌ្ឍសេដ្ឋកិច្ចយ៉ាងដិតដល់ ហើយនឹងធ្វើបច្ចុប្បន្នភាពការព្យាករណ៍ផលិតផលក្នុងស្រុកសរុប (GDP) របស់ខ្លួននៅក្នុងខែឧសភា។

ទន្ទឹមនឹងនេះ អាជ្ញាធររូបិយវត្ថុសិង្ហបុរី (MAS) នឹងគិតគូរពីការវិវត្តទាក់ទងនឹងតម្លៃនៅក្នុងការវាយតម្លៃទស្សនវិស័យអតិផរណានាពេលខាងមុខ ដែលខ្លួននឹងចេញផ្សាយនៅថ្ងៃទី១៤ ខែមេសា ឆ្នាំ២០២៦ ខាងមុខនេះ៕

ដោយ៖ យា ចិន្ដាខន្ដី (ប្រភព៖ VNA)