AKP កំពង់ឆ្នាំង ថ្ងៃទី៩ ខែមេសា ឆ្នាំ២០២៦--លោកឧត្តមសេនីយ៍ទោ សួន សុជាតិ ប្រធាននាយកដ្ឋានជនបរទេសអន្តោប្រវេសន្ដ និងជនភៀសខ្លួន បានមានប្រសាសន៍នៅក្នុងកិច្ចប្រជុំផ្សព្វផ្សាយស្ដីអំពីនីតិវិធីនៃការគ្រប់គ្រងជនអន្តោប្រវេសន្ដនិងជនភៀសខ្លួន នៅសាល់ប្រជុំសាលាខេត្តកំពង់ឆ្នាំង កាលពីថ្ងៃទី៨ ខែមេសា ឆ្នាំ២០២៦ ដោយមានការចូលរួមពីលោក ឈឹម វុទ្ធា អភិបាល រងខេត្តកំពង់ឆ្នាំង ប្រតិភូតំណាងក្រសួង លោក លោកស្រីអាជ្ញាធរក្រុង ស្រុក ឃុំចៅសង្កាត់ អធិការក្រុង.ស្រុក ព្រមទាំងនាយប៉ុស្តិរដ្ឋបាលទាំង៧១ ទូទាំងខេត្តផងដែរ។

ក្នុងឱកាសនោះលោកឧត្តមសេនីយ៍ទោ សួន សុជាតិ បានមានប្រសាសន៍ថាការរៀបចំបែបបទ នីតិវិធី និងលិខិតបទដ្ឋានគតិយុត្តសម្រាប់ការងារបច្ចេកវិទ្យាព័ត៌មានក្នុងអគ្គនាយកដ្ឋានអន្តោប្រវេសន៍សិក្សាស្រាវជ្រាវអំពីការវិវឌ្ឍប្រព័ន្ធបច្ចេកវិទ្យាព័ត៌មានអន្តោ ប្រវេសន៍អន្តរជាតិ និងផ្តើមមតិស្នើសុំអភិវឌ្ឍ និងលើកកម្ពស់សមត្ថភាពប្រព័ន្ធបច្ចេកវិទ្យាព័ត៌មានអគ្គនាយកដ្ឋានឱ្យឆ្លើយតបតាមបរិបទថ្មី គ្រប់គ្រង ថែរក្សា ការពារសុវត្ថិភាពទិន្នន័យ និងថែទាំប្រព័ន្ធបច្ចេកវិទ្យាព័ត៌មានរបស់អគ្គនាយកដ្ឋាន អន្តោប្រវេសន៍ គ្រប់គ្រងប្រព័ន្ធទិន្នន័យមុខសញ្ញាអន្តោប្រវេសន៍ និងធ្វើបច្ចុប្បន្នភាពទិន្នន័យជាប្រចាំ និង ឆ្លើយតបការស្នើសុំពិនិត្យទិន្នន័យមុខ សញ្ញាអន្តោប្រវេសន៍ ដើម្បីដាក់ជូនអគ្គនាយកដ្ឋានពិនិត្យសម្រេចនូវលក្ខណៈបច្ចេកទេស និងមានឯកសារយោងច្បាស់លាស់ ដើម្បីចៀសវាងការភ័ន្តច្រឡំ ឬការបន្លំឯកសារ។ ចំពោះកូនជនបរទេសដែលមានអាយុគ្រប់ការ ហើយមានឈ្មោះក្នុងបញ្ជីឪពុកម្តាយ ត្រូវតែមកបំពេញបែប បទស្នើសុំការទទួលស្គាល់ជាផ្លូវការ ដើម្បីទទួលបានសិទ្ធិស្នាក់នៅ និងបំពេញកាតព្វកិច្ចស្របតាមច្បាប់នៃព្រះរាជាណាចក្រកម្ពុជា។

ទន្ទឹមនឹងនេះលោកបានបន្តថា ការគ្រប់ គ្រងជនបរទេស គឺជាកិច្ចការដ៏សំខាន់ដែលទាមទារឱ្យមានការយកចិត្តទុកដាក់ខ្ពស់ ដើម្បីធានាបាននូវសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គដែលអាជ្ញាធរក្រុង-ស្រុក និងប៉ុស្តិ៍នគរបាលរដ្ឋបាល ត្រូវយកចិត្តទុកដាក់ក្តាប់ឱ្យជាប់នូវស្ថិតិ និងការរស់ នៅរបស់ជនបរទេសក្នុងមូលដ្ឋានរបស់ខ្លួន ដើម្បីបង្កលក្ខណៈងាយស្រួលដល់ការអនុវត្តនីតិវិធីថ្មី៕

ដោយ៖ បៃ ស៊ីថុន