AKP បន្ទាយមានជ័យ ថ្ងៃទី០៨ ខែមេសា ឆ្នាំ២០២៦--

ក្នុងស្មារតីបុរេសកម្ម និងការគិតគូរខ្ពស់ពីសុខទុក្ខរបស់ប្រជាពលរដ្ឋតាមបន្ទាត់ព្រំដែន រដ្ឋបាលខេត្តបន្ទាយមានជ័យ នៅព្រឹកថ្ងៃពុធ ទី៨ ខែមេសា ឆ្នាំ២០២៦នេះ បានចេញសេចក្តីប្រកាសព័ត៌មានលម្អិតមួយអំពីវឌ្ឍនភាពនៃការផ្តល់ដីឡូត៍ និងផ្ទះសម្បែងជូនប្រជាពលរដ្ឋដែលរងគ្រោះដោយសារសកម្មភាពហ៊ុំព័ទ្ធបន្លាលួសពីសំណាក់យោធាថៃ។

ប្រជាពលរដ្ឋនៅក្នុងភូមិសាស្ត្រយុទ្ធសាស្ត្រមួយចំនួន រួមមាន៖ ភូមិជោគជ័យ និងភូមិព្រៃចាន់ (ឃុំអូរបីជាន់ ស្រុកអូរជ្រៅ) ព្រមទាំងភូមិសាមគ្គី ភូមិត្រពាំងសំរោង ភូមិផ្លូវបំបែក និងភូមិបន្ទាយមានឬទ្ធិ (ឃុំគោករមៀត ស្រុកថ្មពួក) បានជួបប្រទះការលំបាកយ៉ាងខ្លាំង បន្ទាប់ពីយោធាថៃបានដាក់បន្លាលួស និងទូកុងតឺន័រហ៊ុំព័ទ្ធ ដែលធ្វើឱ្យពួកគេមិនអាចចូលទៅរស់នៅលើដីធ្លី និងផ្ទះសម្បែងស្របច្បាប់របស់ខ្លួនបាន។   
ក្រោមការចង្អុលបង្ហាញដោយផ្ទាល់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដំណោះស្រាយរយៈពេលខ្លី និងមធ្យមត្រូវបានដាក់ចេញជាបន្ទាន់។ គម្រោងសាងសង់លំនៅឋានបណ្តោះអាសន្នត្រូវបានបង្កើតឡើងនៅភូមិស្លក្រាម ឃុំស្លក្រាម ស្រុកស្វាយចេក ដែលមានលក្ខណៈពិសេសដូចជាផ្ទៃដីសរុប ៤០០ ហិកតា គ្រប់គ្រងដោយសមាគមអតីតយុទ្ធជន។ហេដ្ឋារចនាសម្ព័ន្ធ មានការរៀបចំប្រព័ន្ធផ្លូវ ទឹក ភ្លើង និងតម្រូវការចាំបាច់សម្រាប់ការរស់នៅសមរម្យ។យន្តការផ្តល់ជូន ការចាប់ឆ្នោតយកលេខក្បាលដីឡូត៍ ដើម្បីធានាតម្លាភាព និងយុត្តិធម៌។

    ឆ្លើយតបទៅនឹងការព្រួយបារម្ភរបស់បងប្អូនជនភៀសសឹកមួយចំនួនដែលទើបចុះឈ្មោះថ្មី ហើយមិនទាន់ទទួលបានផ្ទះ រដ្ឋបាលខេត្តបានអះអាងយ៉ាងច្បាស់ថា"រាល់ការដោះស្រាយ គឺធ្វើឡើងទៅតាមជំហានៗ និងនីតិវិធីច្បាស់លាស់ ផ្អែកលើបញ្ជីឈ្មោះដែលបានចុះដៅ។ បងប្អូនដែលបានចុះឈ្មោះក្រោយនឹងទទួលបានតាមលំដាប់លំដោយ មិនមានការរើសអើង ឬការបោះបង់ចោលឡើយ"។ 
រដ្ឋបាលខេត្តក៏បានអំពាវនាវដល់សាធារណជន និងអ្នកសារព័ត៌មាន មេត្តាជួយផ្សព្វផ្សាយព័ត៌មានពិតនេះ ដើម្បីចៀសវាងការយល់ច្រឡំដែលបង្កឡើងដោយព័ត៌មានមិនច្បាស់ការណ៍។ អាជ្ញាធរនៅតែបន្តខិតខំកសាងផ្ទះបន្ថែមទៀត ដើម្បីបញ្ចប់ការលំបាករបស់បងប្អូនជនភៀសសឹកឱ្យបានឆាប់រហ័សបំផុត។ 
នេះគឺជាសក្ខីភាពមួយដែលបង្ហាញពីការយកចិត្តទុកដាក់លើសន្តិសុខ និងសុខុមាលភាពប្រជាជននៅតាមព្រំដែន ខណៈដែលកម្ពុជាកំពុងពង្រឹងការគ្រប់គ្រងដែនដី និងការអភិវឌ្ឍន៍សហគមន៍ឱ្យមានស្ថិរភាព ទោះស្ថិតក្នុងស្ថានភាពប្រឈមជាមួយភាគីជិតខាងក៏ដោយ៕
ដោយ ឈុន សារ៉ាត