AKP ភ្នំពេញ ថ្ងៃទី០៨ ខែមេសា ឆ្នាំ២០២៦ -- អនុប្រធានាធិបតីសហរដ្ឋអាមេរិក លោក ជេឌី វែនស៍ (JD Vance) បាននិយាយកាលពីថ្ងៃអង្គារថាការវាយប្រហាររបស់សហរដ្ឋអាមេរិកទៅលើកោះខាក (Kharg) របស់អ៊ីរ៉ង់មិនមែនជាការផ្លាស់ប្តូរយុទ្ធសាស្ត្ររបស់សហរដ្ឋអាមេរិកទេ ខណៈដែលមន្ត្រីអាម៉េរិកម្នាក់បានប្រាប់សារព័ត៌មានរ៉យទ័រស៍ដោយឡែកពីគ្នាថាការវាយប្រហារបន្ថែមទៅលើគោលដៅយោធាមិនបានប៉ះពាល់ដល់ហេដ្ឋារចនាសម្ព័ន្ធប្រេងនោះទេ។

មន្ត្រីរូបនេះ ដែលបាននិយាយទៅកាន់សារព័ត៌មានរ៉យទ័រស៍ដោយសុំមិនបញ្ចេញឈ្មោះ បានពិពណ៌នាយ៉ាងហោចណាស់ការវាយប្រហារមួយចំនួនថា ជាការកំណត់គោលដៅទីតាំងដែលត្រូវបានវាយប្រហារពីមុនហើយបាននិយាយថា ការវាយប្រហារនេះបានកើតឡើងនៅព្រឹកព្រលឹមថ្ងៃអង្គារ។

លោក វែនស៍ ដែលថ្លែងដោយឡែកពីគ្នានៅទីក្រុងប៊ូដាប៉េស្ត បាននិយាយថា ការវាយប្រហារទាំងនេះមិនមែនជាការផ្លាស់ប្តូរយុទ្ធសាស្ត្ររបស់សហរដ្ឋអាមេរិកទេ ដោយរដ្ឋបាលលោក ដូណាល់ ត្រាំ មានទំនុកចិត្តថាខ្លួនអាចទទួលបានការឆ្លើយតបពីអ៊ីរ៉ង់ត្រឹមម៉ោង ៨:០០នាទីយប់ ក្នុងកិច្ចចរចាដើម្បីបញ្ចប់ជម្លោះ។ ប្រធានាធិបតីសហរដ្ឋអាមេរិក លោក ដូណាល់ ត្រាំកំពុងទាមទារឱ្យអ៊ីរ៉ង់លះបង់អាវុធនុយក្លេអ៊ែរ និងបើកច្រកសមុទ្រហ័រមុសឡើងវិញ ដែលជាផ្លូវទឹកដឹកជញ្ជូនប្រេងដ៏សំខាន់មួយ។

លោក វែនស៍ បាននិយាយថា «យើង​មាន​គម្រោង​វាយប្រហារ​គោលដៅ​យោធា​មួយចំនួន​នៅលើ​កោះខាក ហើយខ្ញុំជឿថា យើងបានធ្វើដូច្នេះហើយ»។

លោក​បាន​បន្ថែម​ថា «យើង​នឹង​មិន​វាយប្រហារ​គោលដៅ​ថាមពល និង​ហេដ្ឋារចនាសម្ព័ន្ធ​ទេ រហូត​ដល់​អ៊ីរ៉ង់​ធ្វើ​សំណើ​មួយ​ដែល​យើង​អាច​គាំទ្រ​បាន ឬ​មិន​ធ្វើ​សំណើ​មួយ។ ខ្ញុំមិនគិតថាព័ត៌មាននៅលើកោះខាក តំណាងឱ្យការផ្លាស់ប្តូរយុទ្ធសាស្ត្រ ឬតំណាងឱ្យការផ្លាស់ប្តូរណាមួយពីប្រធានាធិបតីសហរដ្ឋអាមេរិកនោះទេ»៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)