AKP ភ្នំពេញ ថ្ងៃទី០៧ ខែមេសា ឆ្នាំ២០២៦ -- អេមីរ៉ាត់អារ៉ាប់រួមបាននិយាយថា ការការពារដែនអាកាសរបស់ខ្លួនបានស្ទាក់ចាប់មីស៊ីលចំនួន ១៤គ្រាប់ និងយន្តហោះគ្មានមនុស្សបើកចំនួន ១៩គ្រឿងរបស់អ៊ីរ៉ង់កាលពីថ្ងៃចន្ទ ខណៈដែលការកើនឡើងនៃភាពតានតឹងនៅតែបន្តកើតមាននៅទូទាំងតំបន់។

ក្រសួងការពារជាតិបាននិយាយនៅក្នុងសេចក្តីថ្លែងការណ៍មួយថា មីស៊ីលផ្លោងចំនួន ១២គ្រាប់ មីស៊ីលបញ្ជាពីរគ្រាប់ និងយន្តហោះគ្មានមនុស្សបើកចំនួន ១៩គ្រឿងត្រូវបានបាញ់ទម្លាក់។

ក្រសួងបាននិយាយថា ការវាយប្រហារថ្មីៗនេះបានធ្វើឱ្យមនុស្សបួននាក់រងរបួសដោយមានរបួសចាប់ពីស្រាលទៅធ្ងន់ធ្ងរ ដែលធ្វើឱ្យចំនួនសរុបនៃអ្នករងរបួសឡើងដល់ ២២១នាក់មកពីសញ្ជាតិផ្សេងៗគ្នាចាប់តាំងពីការវាយប្រហាររបស់អ៊ីរ៉ង់បានចាប់ផ្តើមនៅថ្ងៃទី២៨ ខែកុម្ភៈ។

យោងតាមក្រសួង បានឱ្យដឹងថា ប្រព័ន្ធការពារដែនអាកាសរបស់អេមីរ៉ាត់អារ៉ាប់រួមបានស្ទាក់ចាប់មីស៊ីលផ្លោងចំនួន ៥១៩គ្រាប់ មីស៊ីលបញ្ជាចំនួន២៦គ្រាប់ និងយន្តហោះគ្មានមនុស្សបើកចំនួន ២.២១០គ្រឿងចាប់តាំងពីការចាប់ផ្តើមនៃការវាយប្រហាររបស់អ៊ីរ៉ង់។

សេចក្តីថ្លែងការណ៍បាននិយាយថា ទាហានអេមីរ៉ាត់អារ៉ាប់រួមពីរនាក់អ្នកម៉ៅការស៊ីវិលម៉ារ៉ុកម្នាក់ និងជនស៊ីវិលចំនួន ១០នាក់មកពីសញ្ជាតិផ្សេងៗគ្នាត្រូវបានសម្លាប់នៅក្នុងការវាយប្រហាររបស់អ៊ីរ៉ង់។

អរិភាពនៅក្នុងតំបន់បានកើនឡើងចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយលុករួមគ្នាលើអ៊ីរ៉ង់នៅថ្ងៃទី២៨ ខែកុម្ភៈ ដោយបានសម្លាប់មនុស្សជាង ១.៣៤០នាក់រហូតមកដល់បច្ចុប្បន្ន រួមទាំងមេដឹកនាំកំពូលរបស់អ៊ីរ៉ង់ គឺលោក អាលី ខាមេណី (Ali Khamenei)។

ទីក្រុងតេអេរ៉ង់បានសងសឹកវិញដោយការវាយប្រហារដោយយន្តហោះគ្មានមនុស្សបើក និងមីស៊ីលដែលកំណត់គោលដៅលើអ៊ីស្រាអែល ក៏ដូចជាប្រទេសហ្ស៊កដានី អ៊ីរ៉ាក់ និងប្រទេសឈូងសមុទ្រដែលមានទ្រព្យសម្បត្តិយោធាអាម៉េរិក។ អ៊ីរ៉ង់ក៏បានរឹតត្បិតការឆ្លងកាត់របស់នាវាឆ្លងកាត់ច្រកសមុទ្រហ័រមុសផងដែរ៕

ដោយ៖ យា ចិន្ដាខន្ដី (ប្រភព៖ AA-AKP)