AKP ភ្នំពេញ ថ្ងៃទី០៧ ខែមេសា ឆ្នាំ២០២៦ -- អ៊ីរ៉ង់បាននិយាយកាលពីថ្ងៃចន្ទថា ប្រធានអង្គការស៊ើបការណ៍សម្ងាត់របស់កងឆ្មាំបដិវត្តន៍អ៊ីស្លាម(IRGC) ត្រូវបានសម្លាប់នៅក្នុងការវាយប្រហារររបស់សហរដ្ឋអាមេរិក និងអ៊ីស្រាអែល។

ទូរទស្សន៍រដ្ឋ IRIB បានដកស្រង់សេចក្តីថ្លែងការណ៍របស់ IRGC ដែលបាននិយាយថា លោកឧត្តមសេនីយ៍ឯក សេយ៉េដ ម៉ាជីដ ខាដេមី (Seyed Majid Khademi) ត្រូវបានសម្លាប់នៅក្នុងការវាយប្រហារនេះ។

លោក ខាដេមី ត្រូវបានតែងតាំងជាប្រធានផ្នែកស៊ើបការណ៍សម្ងាត់របស់ IRGC កាលពីក្នុងខែមិថុនា ឆ្នាំ២០២៥ បន្ទាប់ពីការសម្លាប់អ្នកកាន់តំណែងមុន គឺលោកឧត្តមសេនីយ៍ ម៉ូហាំម៉ាដ កាហ្សេមី (Mohammad Kazemi) នៅក្នុងការវាយប្រហាររបស់អ៊ីស្រាអែល។

ភាពតានតឹងក្នុងតំបន់បានកើនឡើងចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយលុករួមគ្នាទៅលើអ៊ីរ៉ង់នៅថ្ងៃទី២៨ ខែកុម្ភៈដែលបានសម្លាប់មនុស្សជាង ១.៣៤០នាក់ រួមទាំងមេដឹកនាំកំពូលអ៊ីរ៉ង់ លោក អាលី ខាមេណី (Ali Khamenei) ផងដែរ។

អ៊ីរ៉ង់បានសងសឹកវិញដោយការវាយប្រហារដោយយន្តហោះគ្មានមនុស្សបើក និងមីស៊ីលដែលកំណត់គោលដៅលើអ៊ីស្រាអែល រួមជាមួយប្រទេសហ្ស៊កដានី អ៊ីរ៉ាក់ និងប្រទេសឈូងសមុទ្រដែលកាន់កាប់ទ្រព្យសម្បត្តិយោធាអាម៉េរិក ដែលបណ្តាលឱ្យមានអ្នកស្លាប់ និងខូចខាតដល់ហេដ្ឋារចនាសម្ព័ន្ធ ខណៈដែលរំខានដល់ទីផ្សារ និងអាកាសចរណ៍សកលលោក៕

ដោយ៖ យា ចិន្ដាខន្ដី (ប្រភព៖ AA-AKP)