AKP ភ្នំពេញ ថ្ងៃទី០៧ ខែមេសា ឆ្នាំ២០២៦--កីឡាការិនីទ្រីយ៉ាត្លុងជម្រើសជាតិកម្ពុជា២រូបនឹងត្រូវចូលរួមប្រកួតកីឡាអាស៊ីឆ្នេរខ្សាច់ លើកទី៦ (6th ASIAN Beach Games 2026) នៅទីក្រុងសាន់យ៉ា សាធារណរដ្ឋប្រជាមានិតចិន ពីថ្ងៃ២៣-២៥ ខែមេសា ឆ្នាំ២០២៦ ខណៈអគ្គលេខាធិការ សហព័ន្ធកីឡាទ្រីយ៉ាត្លុងកម្ពុជា លោក ងិន សុខបញ្ញា បានលើកបង្ហាញពីការត្រៀមខ្លួនបានល្អរបស់ជម្រើសជាតិកម្ពុជាទាំងពីររូប ជាពិសេសម្ចាស់មេដាយមាសស៊ីហ្គេម ឆ្នាំ២០២៣។

នេះជាការគូសបញ្ជាក់របស់អគ្គលេខាធិការ លោក ងិន សុខបញ្ញា ប្រាប់ទីភ្នាក់ងារសារព័ត៌មានកម្ពុជា AKP នៅព្រឹកថ្ងៃទី០៧ ខែមេសា ឆ្នាំ២០២៦។ សម្រាប់សមាសភាពកីឡាការិនីទ្រីយ៉ាត្លុងជម្រើសជាតិកម្ពុជា ទាំងពីររូប គឺកីឡាការិនី ផល ស្រីផួង និងកីឡាការិនីខ្មែរ-បារាំង ម៉ាហ្គតមរតក ហ្គារ៉ាប៊ីធៀន ម្ចាស់មេដាយមាសស៊ីហ្គេម នៅកម្ពុជា ឆ្នាំ២០២៣ កន្លងទៅ។ កីឡាការិនីកម្ពុជានឹងត្រូវចូលរួមប្រកួតលើវិញ្ញាសាអាគ័រត្លុង (Aquathlon) ដោយត្រូវរត់ប្រណាំង ២,៥ គីឡូម៉ែត្រ បូកហែលទឹក ១គីឡូម៉ែត្រ និងចុងក្រោយរត់ប្រណាំង ២,៥គីឡូម៉ែត្រ។

លោក ងិន សុខបញ្ញា បានបន្ថែមបែបនេះថា ៖«កីឡាការិនីយើងបានហ្វឹកហាត់ត្រៀមបានល្អ ពិសេសម្ចាស់មេដាយមាសស៊ីហ្គេម កីឡាការិនី ម៉ាហ្គតមរតក ហ្គារ៉ាប៊ីធៀន។ យើងបានពិនិត្យនៅក្នុង System របស់ World Triathlon ឃើញថា ការចុះឈ្មោះសម្រាប់ Women មានចំនួន ២៩រូប (ជាង២០ប្រទេស) រួមទាំងកម្ពុជាយើង ២រូប ដូច្នេះបើយើងចង់ឈ្នះមេដាយសំរឹទ្ធ យើងត្រូវការឈ្នះ ២៦រូប បើមេដាយមាស ត្រូវការឈ្នះ ២៨រូប។ បើពិនិត្យលើ សិទ្ធផល (Performances) វិញ កីឡាការិនីទាំងអស់ មិនលើសគ្នាប៉ុន្មានទេ លើកលែងតែប្រទេសជប៉ុន ម្ចាស់ផ្ទះចិន និងកាហ្សាស្ថាន ដែលជាប្រទេសខ្លាំងក្នុងទ្វីបតែម្តង»៕

ដោយ ហេង ណាលីន