AKP ភ្នំពេញ ថ្ងៃទី០៣ ខែមេសា ឆ្នាំ២០២៦ -- នៅក្នុងអំឡុងពេលនៃកិច្ចពិភាក្សារវាងប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ាន់តូ (Prabowo Subianto) និងសមភាគីកូរ៉េខាងត្បូង លោក លី ជេម្យុង (Lee Jae Myung) លោក ប្រាបូវ៉ូ បានគូសបញ្ជាក់ពីសារៈសំខាន់នៃចំណងមិត្តភាពទ្វេភាគី ចំពេលដែលមានអស្ថិរភាពសកលលោកកាន់តែកើនឡើងខ្លាំង ដោយសម្តែងក្តីសង្ឃឹមថា ឥណ្ឌូណេស៊ី និងកូរ៉េខាងត្បូងនឹងបំពេញបន្ថែមគ្នាទៅវិញទៅមកជាដៃគូដែលមានផលប្រយោជន៍រួម។

ប្រធានាធិបតីឥណ្ឌូណេស៊ីបានកត់សម្គាល់ថា សមត្ថភាពផលិតកម្ម និងបច្ចេកវិទ្យាទំនើបរបស់កូរ៉េខាងត្បូង ស្របគ្នាយ៉ាងល្អជាមួយនឹងធនធាន និងទីផ្សារដ៏សម្បូរបែបរបស់ឥណ្ឌូណេស៊ី ខណៈដែលលោកបានគូសបញ្ជាក់ពីតម្រូវការក្នុងការពង្រឹងកិច្ចសហប្រតិបត្តិការក្នុងវិស័យសន្តិសុខ និងការពារជាតិ។

ភាគីទាំងពីរបានចុះហត្ថលេខាលើអនុស្សរណៈយោគយល់គ្នាចំនួន១០(MoU) ដើម្បីពង្រឹងទំនាក់ទំនងសេដ្ឋកិច្ច និងពង្រីកកិច្ចសហប្រតិបត្តិការក្នុងវិស័យសំខាន់ៗ ដូចជារ៉ែសំខាន់ៗ បច្ចេកវិទ្យាទំនើប ការថែទាំសុខភាពផ្អែកលើបញ្ញាសិប្បនិម្មិត (AI) និងកម្មសិទ្ធិបញ្ញា រួមជាមួយនឹងវិស័យផ្សេងៗទៀត។ កិច្ចព្រមព្រៀងបន្ថែមបានផ្តោតសំខាន់ទៅលើថាមពលកកើតឡើងវិញ ថាមពលនុយក្លេអ៊ែរ និងការអភិវឌ្ឍរួមគ្នានៃបច្ចេកវិទ្យាចាប់យកនិងផ្ទុកកាបូន។

លើសពីនេះទៀត ធនាគារនាំចេញ-នាំចូលកូរ៉េ និងមូលនិធិគ្រប់គ្រងការវិនិយោគដាណាន់តារ៉ា ដែលជាមូលនិធិវិនិយោគជាតិរបស់ឥណ្ឌូណេស៊ីបានព្រមព្រៀងគ្នាលើកិច្ចសហប្រតិបត្តិការហិរញ្ញវត្ថុ ដើម្បីគាំទ្រដល់ក្រុមហ៊ុនកូរ៉េខាងត្បូងក្នុងការចូលទៅក្នុងទីផ្សារឥណ្ឌូណេស៊ីក្នុងវិស័យដែលមានសក្តានុពល រួមទាំងវិស័យរ៉ែសំខាន់ៗ មជ្ឈមណ្ឌលទិន្នន័យ និងថាមពលកកើតឡើងវិញជាដើម៕

ដោយ៖ យា ចិន្ដាខន្ដី (ប្រភព៖ VNA)